State Transport Authority leh Aizawl city bus service
September 1, 2025 khan State Transport Authority (STA) chuan Aizawl city bus-a chuan, chhoh leh chhuk (pick & drop) system a tichhuak a, a hlawhchham dêr a. Kumin May 28 khan pick & drop system chu June 1, 2026-a hman ṭan turin a tichhuak leh a. Hei hi chu a hlawhtling tawh em ang chu maw tiin, June 1, 2026 Thawhṭanni khan Ramhlun South stand aṭangin Kulikawn thleng city bus-ah ka chuang a, ka let leh a, Bawngkawn thlengin ka chuang leh a. Israel Point-ah chuan city bus pathum an lo ding tlar pút mai a, ‘E, kan la zâwm hman lo a nih dawn hi,’ ka ti rilru a.
June 5, 2026 -ah city bus-ah bawk ka chuang leh a, zâwm angreng, zâwm lo angrengin bus an tlan. Israel Point-ah bus innghak khawm awm miah lovin a lo thâwl huai a, a thawventhlak hle. Ka kal zel a, a ṭhenin an zâwm a, a ṭhenin an zâwm lo a ni.
July 6, 2026 Thawhṭanni-ah ka chuang leh a; bus stop tinah bus chu bus dang a thlen hma loh chuan an ding leh char char tawh pek a! Nikuma Pu K. Hmingthankaia beidawn chen zetin ka beidawng hman titih a. STA chuan city bus pick & drop system vawng ṭha lote hriattirna tur phone nambar a tar chhuak a; mahse, hei hi Mizo zingah chuan a sawt-saw-hlawt lem lo–mi ṭhut/din khup laia phone-a in-report chu a rem lo a ni.
City bus hi mi rethei zawkte leh dinhmun hniam zawkte tan a hluin a ṭangkai em em a. Damloh thulhah te, office dawr thu-ah te, veng danga khawhar ina kal nikhuaah te, bazar nante leh chhiatni ṭhatni-ah te hian city bus hi a pawimawh em em a. Bus stop-a city bus ding rei loa a kal châng hi chuan a nuam a, mipui tan a thawventhlak ṭhin hle a ni.
Mipui nawlpui veivah nan hian city bus neitute leh driver/conductor-te hian ST thu hi zawm hram se la, a lawmawm ngawt ang. Hlawk loh deuh châng a lo awm pawhin, mipui tana service an ni tih inhrethiam hram se. Ni tin ei chawp zawnga khawsa, motor kalna nei ve lote tan hian city bus hi kan veivah ve theihna awm chhun a nih avangin kan tan a hlu hle a. Chutihlaiin, dan hi Mizoramah hian kan zâwm ṭha lo viau mai a, dan lalna ram leh city te a ngaihawm ṭhin khawp mai. Kan Kristian ramah hian dan hi lal ve teh se.
Khitiang khi kan din hmun a nih tak si-ah chuan rawtna ka’n siam ve teh ang.
1. City bus neitute leh driver/conductor-te hian sawrkar thuchhuah hi zawm ve se.
2. Sawrkar pawhin mipui nâwk thil chu mipui hriat lâwktirna (public awareness) tichhuak hmasa ṭhin se.
3. STA hian bus chhung leh pawn kawngka sira târ tur thu felfai mawi tak siam se.
4. Pick & drop bus service hi ngaiah kan neiha tih dan phunga kan neih thuai theih nan traffic police duty-te leh Transport department hian thawhhona ṭha lehzual nei thei se a duhawm hle ang.
5. Ngaia kan neih theih nan STA-in dan zâwm leh zâwm lote a endik ṭhin ang hian traffic police duty-na hmun leh hmun lo-ah pawh city bus dinna hmun apiangah duty inruatin, bike-in emaw han vei thuak thuak ṭhin se, thla 2-3 ral hnuah han vil nawn leh ṭhin se.
Silent city-ah hian smart city bus service neih hlân a nghahhlelhawm hle mai.
- Prof. H. Lalram Nghinglova