Ram hmasawnna ruhrel (infrastructures) hman thiam leh ramhlui zia politics

Hmasawnna lam

March 3, 2026 zing karah khan FCS&CA Minister Pu B. Lalchhanzova chuan Assembly Budget session buai karah Sairang Rel Station-ah buhfai quintal 25,901, rel wagon 42-a lo kal Rel (Train) a lo hmuak thleng a.

Supply Minister Pu B.Lalchhanzova hian Sairang Rel Station a buhfai phurh thlen a lo ni ta hi Mizoram mipui tan thil chhinchhiah tlak tak a ni a, kan hma lawka furpui lo thleng turah pawh a thlamuanthlak hle dawn a ni a ti. Mizoramin thla khata Buhfai kan mamawh zat hi 97,000 quintals a ni a; 55,000 quintals hi FCI atanga kan dawn niin; 41,000 Qntls hi a thlawna kan dawn a ni. A bak zawng hi Open Market Sale Scheme (OMSS) (Domestic) atanga 830/quintal a lei.

Tunah chuan Aizawl, Lunglei leh Lawngtlai FCI Godown-a dah tur chu Sairang Rel Station-ah hian a lo thleng tawh dawn a. Bairabi Rel station-ah chuan Mizoram hmar lam Godown-a dah tur a thleng ve tawh thung ang.

Supply Department lam hian kawng chhe kara Bairabi buhfai Mizoram chhim lama thiarna atan hian sum engzatnge a hman thin ang. Tunah ringawt pawh Sairang atang chauha lirthei hmanga thiar a nih tawh dawn vangin kalkawng tawi ta sawt vang hian sum tam tak senso thin a tlahniam ngei ang. Hetianga Mizoram hmasawnna kan neihte department dang dang ten an hman tangkai zel hi a pawimawhin hmasawnna sem rualna tha tak a ni.

Power lam lo thlir leh ila. Kan sawrkarin Kawlphetha lama intodelhna turin hma a la chho mek a.

Kum thar tir January thla maiah pawh Tuirini SHP lungphum a nih kha, hengte hi kan sawrkarin hman tangkai nghal zel a tum a. Industrial and Investment Policy pawh ZPM sawrkar hian a siam thar a. India ram company emaw Overseas company a ni emaw, kan rama investment rawn ti duh tan, a thlawna tiam sawrkarin a nei a. Chung chu ram (hmun) pek, kawng sial sak, tui connection leh eng (power) a thlawna pawh luh sak (a bill erawh an hman ang apiang an chawi ve tho ang) te a ni. Heng avang hian Company lian hovin Mizoram hi an rawn ngaihven chho tan hle. Handholding scheme hnuaiah pawh entrepreneur ten hma an rawn la chho tan. Hetianga hmasawnna rahbi thar kan kai pah a, kawng danga department dangin a lo chhawrbawk zel theihna tur ngaihtuah hi a pawimawh hle. Thil dang pawh kan la thlir chho zel ang.

Ramhlui zia politics

MNF kum 10 an sawrkar hnaih lam kum 2008 vel bawrah khan "Ram hmangaihtute thlam" tih Calender kha Congress unau ten an siam hluai mai a. An calender ah khan khatih lai sawrkar Pu Rama leh a khawnbawl upa te thlam tha pui pui kha an tarlang a. MNF sawrkar nin tawhna nen, a thawh pawh a thawkna hle.

Congress an han sawrkar ve leh a, ram hnuk thil tak takah inbei ta lo khan CM Pu Hawla Coconut sawh keh te, a chal hnawih sen te kha opposition party MNF khan an buaipui nasa hle. Mimal tak khan CM kha an bei a ni ber.

Khang ram hlui zia politics khel thang party pahnih khan la rorel ve ngai miah lo party hi an han beihrawn mek a nia. Assembly budget session thu pawimawh leh ramhnuk thil lam sawisel tur an hre lo nge, CM in sak leh a huan thlam lam an buaipui a. Mimal takin an bei mek a tih theih awm e.

Hetiang ramhlui zia politics hi thangthar ten an ning tawh a. Sawrkar ve hrim hrim chaka tuihalna avanga ram hmasawnna tur awm lo, ram tana thil pawi tur eirukna leh thil tha lo pawh ni lo, mimal tih hming chhiatna tur, a saptawnga 'character assassination' an tih ang chi politics chhe tak hmang duh party te tih awm tawk a ni.

Pu Hawla "Chalhnawih sen" an buaipui luih luih lai khan 2013 kum tawpah inthlan an awm a, a beitu MNF kha chu ke van vawr dawt in an tla nawn a. An beih ber Pu Hawla kha chu bial hnihah a la tling ta deuh deuh a. MLA pawh 32 atangin 34 a la nei ta deuh deuh.

Kalphung thar mipui sawrkar pawh hi mipuite hnenah health care system tha, kalkawng tha, ei leh bar hnianghnar, sawrkawr inrelbawlna administration tha a pek zel chuan mimala CM beitu party te hi an la bet zelin a rinawm.

- Hruaia Kawlni