THE BIBLE SAYS SO!

Tun ṭum chu kan Bible (Thuthlung Thar) lehlin thar, English Standard Version atanga lehlin, Bible Society of India-in Mizo Revised Version MTV tia a pho chhuah tâk, a Mizo leh English parallel-a chhut, pulpit leh kristian tih khawmnaa chhiar theih tur ni ngeia lang atangin pawinṭ pahnih la chhuakin i lo enho teh ang u. Chung Bible chângte chu Johana 18:37 leh Rom 12:1 thute hi ni teh se.

Johana 18:37-ah chuan Pilatan Lal Isua kha "Chu! Lal i ni elo?" tiin a zawt a. Kan Bible Thuthlung Thar kan hman lai chuan "Ni e, lal ka ni asin" tiin Lal Isua chhânna fiah takin a ziak a. Kan Thuthlung Thar neih thar erawh chuan "Lal ka ni tih i sawi kha" tiin a letling! English Standard Version (RSV)a inziak kha a inziak ang ang khan a letling a ni. He lai thu hi kan Lalpa hun laia Judate ṭawng hman dan (idiom) kha kan hriat loh chuan kan Lalpa chhânna hi kan hre dik thei lovanga kan letling dik thei bawk hek lovang. Tuna a awm dân hi chuan "Lal ka ni tih i sawi kha" tih hi chhanna fel tak a ni hauh lo.

Mithiam thenkhat -te chuan heti hian an ziak- Lal Isua hun lai khan Juda- te chuan "You say that I am a king" tih kha Judate rilruah chuan "Yes, I am a king" tihna a ni tih a ni (The Applied Bible Commentary, comment on Johana 18:37, Marka 15:2, phek 421). Lal Isua hun laia an tawngkam awmzia ang ngei chuan he laia Lal Isua tawngkam pawh hi lehlin tur a ni! Kan Bible hman lai hian Lal Isua hun laia an hman dan chu zuiin "Ni e, lal ka ni asin" tiin an dah thlap hi, hei hi Lal Isua tawngkam awmzia zawk chu a ni.

Chu lo pawh, Rom 12:1 kha, "...which is your spiritual worship " tia an lehlinna version English Standard Version-in a ziak kha dah ṭhain version danga mi "your reasonable service" tih kha an lalut ringawt mai zu nia!,"in rawngbawlna âwm reng a ni" zu han ti ta ngawt a! ESV hian "...which is your spiritual worship" a ti a ni reng si! ESV-ah version dang an zep lut ta ngawt a nih hi! "...your reasonable service" tia letlingtu version-te chu NET te, NKJV te, Amp Bible te et cetera an awm. "Thlarauva Pathian chibai bukna" tih lam zawnga letling chu NRSV te, NASB te, NIV et cetera an awm. Lehlin dik zawk leh dik lo zawk lam kha kan subject a ni lo va, ESV an letling a nih chuan, "your reasonable service" tih ni lovin "...which is your spiritual worship" tih ngei kha an letling tur a ni, version danga mi la lut ringawt lovin!

Thlarauva Pathian chibai bûk hi thil pawimawh ber, ringtute hmaa chhuak a ni. Chu thlarauva Pathian chibai bûk chu taksa pumhlum pek, Pathian hnena inhlan hi a ni. Inpekna tel lovin thlarau mi nihna a awm thei lo. Pathian chibai bukna tak tak chu A kuta inpek hi a ni a. I nun, a pumhluma Pathian hnena i la pek loh chuan Pathian hi chibai i la bûk lo tihna a ni a, chu chu Setana ramchhung mi i la ni tihna a ni.

- F. Lal Thanzuala, Ph : 9436141242