CHATUAN RAM MIN PANSAN TA

Kristiante insawi thlamuanna ṭawngkam mawihawih, a taka innghahna tlak ni si lo, mithi vuina, khawhar in, thlan nghahna, inrâlna, pulpit aṭanga mitthite chanchin sawina leh insûnna huna titi nikhuaa ṭawngkam kan leklam êm êm chu, ”Chatuan ram min pansan ta,” tih hi a ni.

Mizo pipute ngaihdanin, mi a thih hnuah a thlarau chu mitthi khuaah a kal a, mitthi khua chu khawvel dang, mitthite awmna hmun a ni a, chu hmun pan tur chuan an thlarauvin Rih Dil a paltlang a ngai tih an sawi ṭhin. Mi ṭha leh hmingthang, ram tana thawk ṭha leh pasalṭha te chu ‘Pialral’ an tih hmun ropui zawkah an kal thei a, mi dang zawng chu mitthi khua – pialralah an awm mai ṭhin niin an ngai bawk.

Thih hnua pialral kan insawihmuh ang deuh khan vanram/chatuan ram kan insawihmuh ṭhin a. Mahse, vanram/chatuan ram hi pialral ang bawkin a awmna chiang taka hria leh hmu an la awm lo. Chuti chungin kan thih hnua insawi thlamuan nan ‘Chatuan ram min pansan ta… chuti khati’ tiin kan insawi thlamuan ṭhin.

Bible-ah, ”Thih hnu chuan nangmah hriat rengna a awm si lo va…? (Sam 6:5). Thih hnuah hriatrengna nei tumah an awm lo. Chutihlaiin, thih hnuah pawh engkim la hre zui zel ang hrima kan han sawngbawl vel ṭhinte hi a bikin hming bula Rev. dah chin tan phei chuan tih chi loh tak a nih hmel.

“Mihring fate thlarau chu chung lamah a chho emaw, ramsa thlarau chu hnuai lamah leiah a chhuk emaw tih tu nge hria?” (Thuhriltu 3:21). Thih hnuah kan thlarau kalna hria tumah an awm loh lain, “Ani chu vanah vantirkohte'n hlim takin an lo lawm lut tawh …” tia kan han inhnem ṭhin phei hi chu a huaisen thlak viau lo maw? Thih hnua van khawpui kawngkhar hawng thei anga kan insawi thlamuan ṭhin te, thih hnua vanram/hremhmun pan nghala mifel leh misual inthliar hrang nghala kan insawi khum ṭhinte hi thil tih chi a ni lo.

Sam 146:4–A thawin a chuahsan a, ani chu a leilungah a kir leh a; chumi ni ngei chuan a ngaihtuahnate chu a bo nghal a ni. Thih veleh ngaihtuahna a bo nghal a nih si chuan mihring chuan engmah a hre tawh lo va, a thihni la lain a hriatna zawng zawng a bo tihna a ni. Mitthi vuituin, ”Lei hrehawmna tem tawh lovin van aṭang khian min rawn thlir reng a ni,” an han ti leh ringawt zel a, dâwt inhrilh pah hlirin kan invui liam ṭhin ni berin a lang.

Milem bia emaw, ringtu a ni emaw, mitthi reng rengin a thih aṭangin hriatna a nei tawh lo. A taksa chu lei vaivutah kir lehin a ṭawih ral a, vaivutah bawk a chang leh mai a, amahah hriatna a nei tawh lo. Ramsa leh mihring thlarau chu thih hnuin chung lam nge hnuai lam a pan tih hriat a ni lo. Mihring erawh Pathianin a thlarau a kawlsak a ni mai!

Lusûnte inhnem nana “Ani chuan chatuan ram min pansan tawh a, vanramah nuam deuhvin a awm tawh alawm… chuti khati,“ kan han ti thlazen ṭhin hi chu ringtu nihna dik tak kan hre chiang tawk lo tihna a ni. Kristian kohhran rawngbawltute hian Grik thawnthu emaw, hmanlai Mizo sakhaw rin thu emaw mai maiah innghat tawh lovin, Pathian thu dik tak hmangin inthlamuan ṭhin tawh zawk ila a lawmawm ngawt ang.

- Dr. C. Lalrampana