ZPM ka thlir a...

Tun hnaia ZPM party boruak thlir chungin heng thute hi ka ziak a ni. Sawi tur dang tam tak zingah, thu leng vel tinzawnin VUC leh collective leadership chungchang hi i han thlûr bing deuh ila.

I. ZPM Election Manifesto 2018

Kum 2017 August ni 15 khan ramhlui ziate paih a, kalphung thar hmanga mipui sorkar siam a, Zoram thar din turin ZPM hi a lo piang a (P-3). VUC kaihruainaa sorkar ruangam siam te, CM lal hrawtna a awm lohna turin collective leadership ang zawnga sorkar kalpui te, CM leh party president mi pakhatin chelh kawp loh te, CM-in major department a enkawl loh piah lamah, Council of Ministers hnathawh dan a enpui vek tur thu te a inziak a (P-7).

II. ZPM Danpui 2022 Edition

Pawl thil tumte: Politics khelh dan thianghlim lantir, rorelna dik a awm theihna tura thawh, sorkar leh party-ah collective leadership lantir te (P-7); VUC chu sorkar ruangam dintu, House Leader ruattu, Council of Ministers ruatnaah pawh CM-in VUC a râwn tur thu te, party leh sorkar khalh ngiltu leh uaptu, thurawn petu leh zilhhau ngaite zilhhautu, party-in thu harsa a neihte VUC-ah a thlen chuan an thutlukna chu thutawp a nih tur thu te a inziak (P-9).

CM leh party president mi pakhatin a chelh kawp tur a ni lo a, mi pakhatin a zâwnin term hnih aia rei a chelh thei lo. Minister leh party elected OB nihna pawh chelh khawp theih a ni lo. Nihna chu a ruattu tawp ruala tawp tur leh a ruattuin a sîksawi theih a nih thu te a inziak bawk (P-35).

III. ZPM Policy (SDRP) 2022 August Edition

CM chuan Council of Ministers-te ṭha taka avil theih nan work department bik enkawl a nih loh tur thu a inziak a (P-20).

IV. ZPM Campaigners' Handbook 2023

VUC thuneihna leh mawhphurhna dan bu bung 4-ah chiang taka tarlan a nih thu a inziak a (P-5). Heta Dan bu a tih hi Danpui 2022 Edition a nih a rinawm.

Nihna leh mawhphurhnate chu collective leadership-a kalin committee siam a ni tih chu member-te’n an chian thu te, inlungrualna chu mipui hmuh theihin thiltihin lantir reng a nih thu te, kalphung thar chu CM leh party president nih kawp loh te, Council of Ministers leh elected OB nih kawp phal loh te, CM-in pawisa tamna work dept enkawl loh tur bakah, Council of Ministers-te hnathawh dan a enpui tur thu te a inziak a ni (P-6&7).

V. ZPM Election Manifesto 2023

Danpui 2022 leh SDRP 2022 lak tawi ni berin a lang a; chiang taka inziak chu, CM leh party president nihna chelh kawp theih loh leh CM-in work dept a enkawl loh tur thu a ni.

VI. ZPM Danpui 2024

Pawl thil tumte (P-2) leh VUC chungchangah (P-3&4) Danpui 2022 nen danglamna a awm tam lo. Nihna leh mawhphurhna chungchangah (P-25&26) minister leh party elected OB chelh kawp theih a ni lo a (CM tih chu a inziak ta lo a, CM hi minister a ni em tih chu a hrilhfiahtu azir a ni tawh ang). Thildang chu Danpui 2022 nen danglamna tam a awm lo.

Chhui zauna

Change by K. Sapdanga (2009)

VUC tih hi hi kum 2008 Assembly election hma deuh aṭanga sawi rik leh hriat lâr a nih thu leh, Mizoram Democratic Movement lo pian dawna sawihona thupui pawimawh tak a ni a. A dinna kawnga ngaihdan thawhtu ber pawh Pu Bualhranga a nih thu a inziah (P-9) bakah, bung khatna pumpui hian a sawifiah zui a. Bung dangte pawh hi sorkar inrelbawlna kawng hrang hrang sawizauna leh hmathlir ziahna a ni ber. Change tih pawh hi Barack Obama leh Morgan Tsvangirai te politics zinkawng aṭangin inthlahrung taka a lak chhawn thu a ziaktu hian a sawi.

Ka Hringnunphêk by Lalfak Zuala (2024)

Kum 2017 chhoah Zoram Exodus Movement-ah tel tura sawmna a dawn dan te, VUC-a a tel chhoh dan te, ZPM pian dan–kum 2017-a ZNP, MPC leh ZEM ten thawhhona thuthlung an ziah te, VUC hruaitu te, VUC awmzia leh mawhphurhna te tawi kim taka khaikhawmin, chu chu a chunga Danpui leh Policy kan ziah lan takte khi a tlangpui chu a ni. Kum 2023-ah ZPM chuan sorkarna a siam thuin bung a khar.

Pu Bualhranga 'Khuarei Sulhnu' (2020) leh Pu Lalfak Zuala 'Ka Hringnunphêk' lehkhabute hian an hun tawn aṭangin mi pakhat lal hrawtna hnuaia rorelna kal sual ṭhin sawifiah nan Bishop Creighton hnena Lord Acton lehkhathawn ṭawngkam lar tak, 'Power Corrupts, Absolute Power Corrupts Absolutely' tih thu an ziak lang ve ve a ni.

Heng ka thuziakte hi i chhiar chhuah vek chuan zawhna tam tak i neiin ka ring a, a chhanna chu nang, a chhiartu pek tur a ni e. ZPM party boruak vir vel pawh ngaihdan fel tak i siam hnuah chauh fet takin i lo teh dawn nia.

- Jordan Joute, Aizawla mi ngei