Yoga Day – Pathiannia hman bik tlat hi!
International Day of Yoga (Yoga Day tiin kan sawi zel tawh ang) hi India rama Pu Narendra Modi sawrkar hnu, kum 2015-ah hman ṭan a ni a, kum tin hman ṭhin a ni. Mizoramah pawh hman a ni ve zel a, a buaipuitu deuh ber chu Health & Family Welfare Department hnuaia peng pakhat, AYUSH hi an niin a lang.
Yoga Day hman hmasak ber kum 2015 khan Pathianni a ni a, Central aṭangin an rawn nawr na viau nge, a ni takah hman a ni. Kumin 2026-ah pawh Pathianni niin, a ní takah hman a ni a, tel tura sawmnaa hming inziak chu HFW Secretary a ni.
Mizorama kan ni pawimawh ber berte pawh Pathianni-ah a tlak chuan Pathianni-ah hmang loin, a hma ni emaw, a hnuah emaw hman a ni tlangpui. Chutihlaia Yoga Day hi Pathianni-ah a tlak apianga Pathianni-ah kher hman a ni ṭhin ni mak ka tih lai a ni.
Mizoramah 'day' pawimawh tak tak kan nei a, a tlangpuiin Pathiannia a tlak kum chuan Pathianni-ah hman a ni ngai lo. YMA Day meuh pawh Pathiannia a tlâk chuan Pathianni-ah kan hmang ngai lo a nih hi. Engati nge Mizoramah hian Yoga a nih tâk avanga Pathianni pawh sawi thei loa a ní takah kher an hman ṭhin tih hi ka zawhna a ni.
Yoga hi Hindu sakhua nen a inzawm tlat a, Yoga Day pawh BJP sawrkar tihchhuah a ni. BJP chu din a nih danah, Hindu sakhaw behchhan pawl RSS political wing (party) niin a lang bawk. Central-a BJP sawrkar chuan Pathianni pawh ni se, hmang ngei turin a rawn nawr ang a, chu chu helaia Mizo Kristian, sawrkar hnathawkte hian an hnial ngam lo a ni thei ang em?
Yoga hi taksa sawizawina ringawt ni loin, Hindu sakhua nen a inzawm tlat a ni. Yoga Day hmasa ber Delhi-a an hmannaah PM Narendra Modi chuan, "Yoga is not just for exercising limbs. If that was true, people working in the circus would be called yogi's," a ti. A thusawi tur ziah saah chuan, "People often think that yoga is just a set of exercises. Yoga is a philosophy of discipline and meditation that transforms the spirit and makes the individual a better person in thought, action, knowledge and devotion," tih a ni bawk. Yoga hi taksa sâwizawina ringawt a ni lo a, rilru sâwrbingna, rilru leh thlarau nun thleng khawih thei a ni tih a chiang viau. Rilru sâwrbingna, rilru leh thlarau nun thleng khawih thei a nihna chu Hinduism aṭanga chhuak a ni a, Hindu rinnaa innghat a ni a; milem biakna chi khat a ni.
Mizo ṭhenkhatin Yoga an lo sawi mawi ve chiam te, Pathian thu leh Kristianna nen a inkalh lo anga sawi te, sakhaw dang zawmna a ni lo anga sawite hi thil awm ve thei tak a ni. Intihchangkanna, intihvengvatna, rilru zau pú nih duhna rilru vangte a ni mahna!
Yoga hi a hlauhawm a ni lo a, Kristian, Pathian ringtute tan hlauh tur a ni hek lo. Yoga duh lotute hian an hlauh vang ni loin, Pathian ringtu Kristiante tih ve chi a nih loh avangtein ti ve lo tur leh inhnamhnawih lo turin an inchah a, kohhran hruaitute pawhin ngenna an siam ṭhin zawk a ni.
Yoga-a taksa an tihchêt dan ang deuh kan ti duh a nih pawhin, Yoga ti kher loin, physical excercise, taksa sawizawi te hi ti mai ṭhin ila a ṭha viau lo maw?
- Zoramchhana