Lei Eden-Thar

Tuk khat chu college bus-ah chuangin college lam panin kan kal a. Hemi zing hian ni dang ang lo takin zirlai bus-a chuang kan tam lo va, regular taka lo kal ṭhin an lo kal loh chuan thawh an hai emaw, first period neih loh vanga kal lo an ni ang e, tiin ding khaw muang tawh lem lovin bus pawh chu a tlang par par a. A nawlpuiin sikul naupang ho pawn exam an zo tawh a, khawpui chhung pawh a thawl ṭha a, traffic jam vel a awm lo bawk nen, rei lo teah Canteen Kual kan thleng ta mai a.

Bus-a ka chuan reng reng hian ka mutthilh apiangin ka rui zel a, lehkha ka chhiarin lu a hai a; chutiang zelin, phone pawh hi ka en thei meuh lo. Chuvangin, exam dawn hun teptêr lutuk te a nih ngawt loh chuan lehkha ka chhiar lui ngai lo va, kawng dung vela thil thleng hi ka thlir deuh chawt mai zel a. Hemi ṭum hian Canteen Kualah tak sawn ṭum danga ka hmuh zen zen loh ka hmu a, chu chuan ka ngaihtuahna a tikal thui khawp mai. Mipa, a hmel en thuaka keini aia u fe awm mi hi a ni a, san pawh a sang ṭha a, a vanglai na nâ nâ chuan a fit ve viau ang; a nih loh vek pawn a chaw ei a tui ve ṭhin viau ang a, nulate pawn gentleman an lo ti ve ṭhin tawh ang a tih tur pianhmang a ni.

Mahse, hemi ṭum hian he tlangval hi, ṭawngkam mawi lo lamah min ngaihsak lo ula, ruak deuh titih hian a rawn kal phei a, a meng hleithei lo ni berin ka hria. A meng chiai chiai a, a chhehvela mi tin mai te chuan an hmu a, an hmuh rualin eng ang mi nge a nih tih an rilruin an teh a, dik tak chuan amah pawhin a inteh tling bik si lo. Mi ṭhenkhatin bûk lung chi hrang hrangin an bûk a, an bûk tling chuang lo va. Ni, amah leh amah ngei pawh a inbûk tling lo va. Chuvangin, maimitchhing titiha kal chu a tan chuan a hrehawm lutuk lo ang a, a chhungte leh a ṭhiante leh mi tu pawh, a kal pelhte'n a hmel an en aṭanga ngaihdan an siam lai hmel a hmu lo chu a tan chuan thil lawmawm ni lo mah se, mi dang ngaihdan rothap tak tak pehhêlna kawng awm chhun a ni si.

Chutianga thlirtu tam tak kara a kal kual vel lai chuan khawngaihtu leh lainattu tam tak a tawng bawk a. Mahse, chung zawng zawng chu engmah a hre lo va, an lainat thu hrilh pawh ni se, a hre chuang lo vang. A chhan chu khawngaihtu hmel hmu turin a mit a meng peih thlawt lo va, khawngaihtu aw hre turin a beng hup bet tlattu a awm si a. A beng huptu chuan a thunun tlat a, a duh dan leh a ruahman angin a tei kualtir reng mai a ni.

Amah thununtu a inthlahdul deuh a, a mit a meng a, nichina khawngaihtu leh lainattu hmel kha a hmuh hmaih a, diriamtu leh bûk tling lotute chu a hmu fiah em em lawi a. Ṭawng ri pawh a hre ta; mahse khawngaihtu leh hmangaihtu aw ri kara diriamtu aw chiah a hre chiang a, a bengkhawn zawk ni ngei tur a ni. Tichuan, aw ri a hriat hmasak ber dawttu chu a mah aṭangin a ni a, chu chu tumah hian min lo hmangaih lo a nih hi tih a ni.

Engtik niah emaw chuan amah thununtu hian a thunun tawh lo vang a, hmangaihtu leh khawngaihtu aw a hria ang a, diriamtu hmel aiin hmangaihtu hmel a bengkhawn tawh zawk ang. Chumi hunah chuan khawngaihna a lo neih ve ṭhin mahni inkhawngaihna bansanin, mi dang khawngaih thei dinhmunah a ding tawh zawk ngei ang.

Bible-ah chuan Eden huan kan hmu a, chumi hmunah chuan nunna thing a awm a, thlahtu hmasate’n rûl bumna avangin nunna thing Pathianin ei thiang lo a tih chu an ei a, an ei ni là lâin chhia leh ṭha an hre ta a. Saruak an nih pawh an hria a, an zak ta em em a ni.

Chutiang chiahin Zoram dung leh vângah Lei Eden thar a lo awm reng tih ka hria a, tah chuan sual bumna chi hrang hrang hmangin ei thiang lo chu an ei a. Chu thei chu chhia leh ṭha hriatna thei a ni ve tawh lo va; an ei ni lâ lâ aṭangin an taksa leh rilru leh thlarau thlengin zawi zawiin an thi a. Chhia leh ṭha an hriat tawh miau loh avang chuan saruak an nih pawh an hre tawh lo. An kutte thil ṭha tih nan an hman thei lo va, an kete erawh chu thil ṭha lo lamah chak takin an pên thei lawi si.

Eden huana bawhchhiatna avanga misual kan nih tawh hnuah pawh Pathian khawngaihnain Isua hmangin min rawn zawng chhuak a. Kan sualte kan sim chuan engtik lai pawhin min ngaidam a, a faa vuahin kan lo awm thei ang hian, Lei Eden thar bawhchhiatna sualah hian mi tu pawh tluin, ei thiang lo pawh ei mah se, Pathian khawngaihna avangin saruak an ni tih an hre leh thei a, simna nen chuan Pa ángchhungah kan lêng za thei a ni tih hriain, he ‘Lei Eden Tharah’ hian kan lo tlu palh a nih pawhin i tho ang u khai.

- Lallianmawia Pautu