Zirlai pawlte leh zirlaite

Tun July ni 22, 2026, Nilaini khan Mizo zirlai leh ṭhalai ṭhahnemngaite'n phût neia chaw nghei Sonam Wangchuk leh Cockroach Janata Party invuahte hmalakna an thlawp a ni tih lantirin Vanapa Hall bulah an pungkhawm a, mi an tam hle–mi 5,000 vel lai an ni.

A tuk July ni 23, 2026 khan MZP-in Vanapa Hall kawtah vêk, a hma nia punkhawm chhan ang thoin punkhawm an huaihawt ve leh a, mi 200 êrh âwrh bak an kal khawm lo niin a lang. Vanglaini leh media danga kan lo hmuh danin, Lunglei leh Serchhip lamah pawh MZP huaihawtin zirlaite an pungkhawm a, mi an tam viau thung.

July ni 22-a punkhawmah khan MZP demna a ri ring viau a, nasa takin an sawisel. An sawiselnate kha kawng ṭhenkhatah chuan a âwm viauah a ngaih theih. Chutihrualin, khati taka MZP an dem leh, na tak taka an sawisel a, MZP mamawh lo ang hiala an sawi kha chu an ngaihtuah chiang lo a ni.

Mizorama kan zirlai pawl–MZP leh MSU te hian tun hma aṭang tawhin sawisel an lo tâwk fo tawh. A tlangpuiin–sumdawng, a bikin hnam dang aṭanga sum khawn, politics kailâwn atana zirlai pawl hman, mahni lansarhna leh hamṭhatna tur an zawng, tihte hi a lâr zual a ni.

Zirlai pawl hruaitute'n MZP/MSU hi politics kailâwnah an hmang tih hi a dik thawkhat. 1990s chhoa MZP tharthawh leh a nih hnua President ni tawhte political party-ah an lut zui deuh vek a, pakhat chiah tun thlenga la lut lo a awm. President ni lo, hruaitu dangte pawh party-a lut an tam tawh. Chutihrualin, hruaitu ni tawh zingah political party zawm lo an awm nual bawk.

'Zirlai pawl ni si, hruaitute zirlai an ni tak tak lo,' tih hi sawi a ni fo. Kan hriat tur chu, zirlai pawl tih hming pu mah se, zirlaite kaihhnawih thil chauh khawih tura din an ni lo. Youth movement an ni ber zawk a, zirlai dik tak chauh telna tur leh hruaitu pawh zirlai tak takte chauh nihna tur a ni lo tih hriat a ṭha. Hetiang hi India ram hmun hrang hranga zirlai pawlte nihphung leh kal dan a ni.

Hmân ní, July ni 22-a an punkhawmnaa zirlai pawlte mamawh lo anga ṭawng piap piapte khan 'Zirlai pawlte hi an mamawh hun leh an auh hun a la awm leh ngei ang,' tih ka ringhlel lo. Khati taka zirlai pawlte an dêu vel kha chu an tih loh tawp tur an ti niin a lang. Rilru so bulh vanga ṭawng liam puat te, chêt chiamte hi a ṭha lo fo; fimkhur a ngai khawp mai.

A tâwpkhâwkah chuan kan zirlai pawlte hi ram leh hnam thilah te, sawrkarin tih dik loh a neiha sawrkar nawr a ṭul chang hian mipuiin kan mamawh, kan hmachhuan leh kan auh ṭhin an ni tho tho. Hun kal tawha zirlaite scholarship nawr chhuak ṭhintu chu zirlai pawlte an ni a, sawrkar hna lak dan dik lo chungchanga hma latu ber leh thil ṭha zawk nawr chhuak ṭhintu an ni bawk. Mizo zirlaite leh ṭhalaite tan mai ni lo, ram leh hnam tan thil ṭha tam tak an lo ti tawh; hun lo la kal turah pawh tuna an la ti zel ngei ang.

Hetihrual hian, MZP lam pawhin July 22-a thil thlengte kha inenfiah nan hmang ve se; hma an lakna turte leh hmalak dan turah ngaihtuahna thar hman phah se a ṭha âwm e.

- Kezo