AIZAWL CIVIL HOSPITAL-IN HMA A SAWN

Ram nawm leh nawm loh tehna atana pawimawh tak pakhat chu hriselna lam a inenkawlna ṭhat leh ṭhat loh a ni. Hriselna lam a hmasawn hi hmasawnna kawng a thil pawimawh lehzual bik a ni a, eng ang pawhin thil dangah hma sawn mah ila, hriselna lamah hma kan sawn loh chuan kan hmasawnna a khingbai tho tho ang.

India ramah hian damdawi in quality tehna pawimawh leh hautak zet mai a awm a, chu chu NQAS (National Quality Assurance Standards) tih a ni. Kum 2025 chhung khan Mizoramah NQAS tehna paltlang, damdawi in ṭha bika chhiar 48 lai mai kan nei a, chung zingah chuan Aizawl Civil Hospital a tel. NQAS paltlang tur hian tehfung khirkhan tak tak 5,000 chuang paltlang a ngai a, NQAS certify hospital nih hi thil namailo tak a ni.

NQAS mai bakah hian damdawi in felfai lawmman Kayakalp Award dawng hi kum 2025 chhung khan Mizoramah sawrkar damdawi in leh HWC 193 a awm a, Aizawl Civil Hospital hi chung zingah chuan a tel ve leh bawk. He lawmman hi Swachh Bharat Mission hnuaia Ministry of Health and Family Welfare buatsaih a ni a, lawmman dawng tur hian damdawi inte hian Internal Assessment an tih hnuah, Peer Assessment leh External Assessment te an paltlang a ngai a ni.

Heng a chunga kan sawi lawmman hlu tak tak pahnih dawng tur hian a mawhphurhtute chuan theihtawp chhuahin an hahpui hle ang tih a hriat a. Hriselna kawnga kan hmasawnna tur hi kan ram hruaitu, a bik takin kan Health Minister leh department thawktute'n mutmawh hnarmawhah nei lo se tun dinhmun hi kan thleng kher lo ang.

Mizoram puma NQAS paltlang leh Kalyakalp lawmman dawng damdawi in zawng zawngte hmasawn dan sawi a châkawm rualin, tunah chuan Aizawl Civil Hospital bik hi han thlur bing ta ila. Heta ṭang ringawt pawh hian tuna kan sawrkar kal mekin mipui mimir hriselna a ngaih pawimawhzia a lang chiang hle awm e.

Aizawl Civil Hospital-in lawmman a dawn phênah hian thawhrimna leh inpekna mai bakah, hmanraw ṭha lei a ngai a, thawktu ṭha neih tam a ngai bawk. Hmanraw ṭha leh thawktu ṭha hi sum tam tak sen ngaihna thil a nih avangin sawrkarin hmasawnna tak tak a tuipui loh chuan awlsam tak a neih theih a ni lo.

Tuna Mizoram sawrkar hian hriselna lama inenkawlna hi mutmawh hnarmawhah an nei a ni tih hi hai rual a ni lo a. Aizawl Civil Hospital bikah MUHCS bul ṭan a nih dawn khan thawktu indaih loh phuhrukna turin Aizawl Civil Hospital chu nurse 300, multitasking staff 100, paramedical staff 47 leh medical officer eng emaw zatin thuam belh a ni a. Tun hnaiah kal thlakna – kidney transplant bul ṭanna tur a sum mamawh belh cheng nuai 48 vel pawh Finance Department lamah dil mek a ni. Lung lam enna–cath lab thar leh MRI khawl thar bun a ni a, PSA (Pressure Swing Adsorption) oxygen plant cheng nuai 80 man pawh bun a ni tawh. Trauma Centre building luah luh tawh niin, a chung zawmna tur CSR aṭanga beisei a nih thu thuneitute'n tun hnaiah an sawi bawk.

Hospital hmanrua khawl hrang hrangte’n electric an mamawh reng avangin P&E Department hnenah power line tichak tura dil a nih hnuah Finance Deparmtent-in hemi atana senso cheng nuai 109.43 pawh a pawm tawh a. Mipuite hriselna ngaih pawimawh kawnga kan sawrkar leh minister-te ṭangrual ri ngaihthlak hi mipui tan a thlamuanthlak tak zet a ni. Trauma Centre atan diesel generator thar buaipui mek a nih thu thuneitute hnen aṭangin hriat a ni leh zel bawk.

Tun 2025-2026 chhung hian Aizawl Civil Hospital hmasawnna hi a zuanin a zuang a, kum 2025-2026 chhunga hmasawnna (achievement) an neihte i han tarlang teh ang.

RADIO DIAGNOSIS & IMAGING (RDI)

i) June 2025-ah MRI khawl bun a ni.

ii) X-Ray khawl thar Horizon 630mA chu January ni 21-ah bun a ni a, printer thar a keng tel.

iii) June 2026 khan Trauma Centre-ah X-Ray khawl thar 630mA bakah, Ultrasound khawl thar leh a ken tel thil dangte nen bun a ni.

CARDIOLOGY DEPARTMENT

i) Cardiac Catherisation Cath Lab: Cath Lab thar chu January ni 26-ah hman ṭan a ni. A ṭangkainate chu:

a) Lung tihrawl châwmtu thisem zâm block leh block loh enna a ni a, a lo block chuan stent vuah ṭhin a ni.

b) Pacemaker (lungphu battery) a vuah theih.

c) Lung pawp ṭhenkhat a thawm theih.

ii) Damlo zai tawh zat:

a) Coronary angiography–108

b) Angioplasty/Stenting–68

c) Permanent pacemaker implantation–44

d) Temporary pacemaker–12

e) Intravascular Ultrasound (IVUS)–3

f) Pericardiocentesis–1

BIO MEDICAL WASTE STORE ROOM

Bio medical waste hi damdawi ina damlote enkawlna ningnawi, bawlhhlawh dang zinga paih chi si lote a ni ber. Heng bawlhhlawhte fûn ṭhat a, a paihna hmuna paih an nih hma a lo dah lailawkna tur hmun BMW Storage Room hi Trauma Centre hnungah Mizoram Health Systems Strengthening Project (MHSSP) sum hmanga siam thar neih a ni a. Authorization leh Consent to Operate Certifcate pawh kum 10 chhung atan Mizoram Pollution Control Board chuan a pe tawh.

EFFLUENT TREATMENT PLANT (ETP)

ETP hi damlote aṭanga thisen/tuiril chhuak mi dangte tana hlauhawm thei tihthianghlimna khawl a ni a. He khawlah hian OT/Lab/Ward etc aṭanga tuiril chhuakte kal khawmin, damdawi nena sawngbawl a nih hnuah vantlang tui luankawra paih zui ngam a ni a, pangpar tui atan pawh a hman tlaka sawi a ni.

EMERGENCY DEPARTMENT

i) Emergency dept. hi January ni 30, 2026-ah Trauma Centre building tharah an insawn lut.

ii) Tunah chuan Emergency Dept. hi emergency laboratory, X-Ray khawl, Ultrasound te an nei tawh.

MEDICAL RECORD DEPARTMENT

i) Medical Record Department-a damlote medical record chu digitalized a ni a. Hei hi MUHCS atan te, DNB student leh research scholar-te tan a ṭangkaiin, awlsam takin a soft copy pawh a lak chhuah theih a ni.

ii) Online OPD leh cash counter siam belh a nih avangin damlo intlar thui lutuk pawh a ziaawm phah.

OBST. & GYNAE DEPARTMENT

i) Moduler OT tunah hian siam zawh thawkhat a ni.

ii) Maternity HDU thar siam zawh tawh a ni.

iii) QA hnuaiah Laqshya ṭha takin an kalpui.

PAEDIATRIC DEPARTMENT

i) Neonatologist an neih tak avangin SNCU chu ṭha takin kalpui theih a ni.

ii) Paediatric Critical Care lamah super specialist an neih tak avangin Paediatric HDU leh ICU an nei tawh.

Iii) QA hnuaiah Musqan ṭha takin kalpui a ni.

MICROBIOLOGY DEPARTMENT

Trunat Machine, Hepatitist Viral Load en theihna an nei thar a, man chawi ngai lovin damlote en theih a ni.

BIOCHEMISTRY

Heng khawlte hi neih thar a ni:

i) Merilyzer Gluquant AIC

ii) Maglumi X3

iii) Merilyzer Autoquant 800m

iv) Immuno Chemistry an ti thei tawh a, sample rang zawkin an pe chhuak thei tawh.

Phai lam doctor-te thiamna hi kan Mizoram doctor-te thiamna hian a phak vek a, an harsatna ber ṭhin chu khawl/hmanraw ṭha an nei lo ṭhin kha a ni. Mipui mimir hriselna tura sawrkar damdawi in thuam chak kha kan tun hma sawrkar khan a tuipui ve lo fo a, mi harsa zawkte'n kan tuar fo a ni.

Aizawl Civil Hospital hmasawnna kan hmuh hian mipuite kan thla a muang a, sawrkarah beiseina sang tak kan nei a ni. Tunah chuan doctor-te thiamna chawk phûr a, mipuite hriselna tur mutmawh hnarmawha neitu sawrkar kan lo nei ta tih a lang reng mai. Tuna kan dinhmun leh thlen chin hi a tawpna ni lo se, hmasawn lehzual tura min tichaktu lo ni se a duhawm hle. Mizoram mipuiin tun aiin phai lam doctor kan mamawhnate zawi zawiin a tlahniam hret hret turah ngai ila, state pawna kan inenkawlna sum luang ral ṭhin hi a uiawm em em a. Mizoramah medical tourist a tam thei ang ber rawn kal se, kan ram leilung mawina khawvel hriata puan chhuahna remchang a lo nih bakah, ram leilung fate'n hlawkna kan têl dawn a ni.

Medical lama thawktute hi mihring ve bawk an nih avangin tihsual an nei ve châwk ṭhin. An hna hi nunna leh thihna inkar thil a nih avangin an pawimawh em em a, kan sawrkar, Health Minister leh medical lam a thawktute'n Mizoram mipuite rawng ṭha taka an bawl zel theih nan i ṭawngṭaisak fo ang u.

- Jeru Rama