Aizawl khawpui - Dark City
Mizoram - Switzerland of the East tih ang deuhin, duhthusamna thilah mi tu tute emaw chuan Aizawl hi eng hming hming emaw an puttir ṭhin; ṭhenkhatin 'No Honking City' an ti a, a ṭhenin 'City of Smile' an ti, a dangte pawh a la awm ang. Tun ṭum chu 'Dark City' han ti ve cháwr mai teh ang ka hmu thim hle mai!
Zanah hian Kulikawn aṭangin tlangdung kawngpui zar zarah Bawngkawn thlengin ka tlan ve fo a, state khat khawpui ni ve si hi, kawngpui leh khawlai a thim ang reng viau mai. Êng lai bik a awm nameuh mai a, a tam berah erawh chuan a eng tâwk lo em em a, a thim a ni ber zawk. Kawngpui dunga in nei mimalte'n an in pâwn lama êng an chhit zawng zawng hi awm lo phei se chuan a thim lehzual hle ang. Hei hi tlangdung kawngpui, kan kawngpui lûn ber a ni a, kawngpui pênhleh dangte phei chu a thim lehzual.
Zan thimah sual a inlár ṭhin a, thil sual ti tura khaw ênga inlan ngam lote inlâr duh hun chu zan thim a ni. Aizawl khawpui, mi nuai li vel chênnaah hian mi fel leh ṭha tam tak an awm rualin, sual tak tak, pawisak nei lo tak tak, pawi khawih ṭhin an awm ve ṭeuh a; tunlaiah phei chuan ruihhlo ngai an tam hle. Chu'ng mite tan chuan Aizawl khawpui chhung kawngpui leh khawlai êng lo lutuk hi hmun duhawm a ni a; a lehlamah, mi dang, a bikin nunau tan a rálṭi thung.
Aizawlah hian mipuiin taksa sawizawina atana kea kal an uar tial tial a, a tam ber chu zingah kal bawk mah se, hun neih danin a zir loh avanga zana kal ṭhin eng emaw zat an awm. Ṭul leh pawimawha kal chhuah ngai, lirtheia kalna nei remchang lote an awm ṭeuh bawk ang. Chutiang mite tan chuan zan rei pawh la ni lo, dar 8-9 velah pawh ni se, khawlai a ên ṭhat tâwk loh avangin a him loh palh a hlauhawm hle a ni.
Zanah hian lirthei headlight hi a chhun hniam chi (low beam)-a dah tur tih hi zirtirna kan dawn dan a ni. Mahse, Aizawlah zan lamah street light a en loh êm avangin motor leh kea kalte him tlân zawk nan a chhun thui chi (high beam)-a dah a ṭul fo. A chhan chu, low beam hmanin kawngpui sira awmte emaw, kawng kân tur emawte hmuh lâwk a harsa tlat. High beam hman lahin, mahni tâwk zawnga tlânte tan harsatna a thlen ve leh thei tho bawk si. Street light tlem vang vek a ni.
Aizawl khawpui hian enkawltu AMC a nei. AMC hian kawng ṭhenkhatah chuan hna an thawk ṭha a ni mai thei; zan lama khawlai tihênah an thawk chhia ka ti hle. Ṭang lehzual teh se. Phai lamah leh ram dangahte khawpui kawngpui dunga streetlight intlar ṭhût a, khawlai a tihên bakah, khawpui a timawi hle. Khawlai/kawngpui tiêngtu a nih piah lamah, zan lama khawpui chei mawitu a ni nghal tihna a ni.
State sawrkar a ni emaw, AMC a ni emaw, kan Zawlkhawpui hi 'Dark City' a nih tawh loh nan zan lamah han tieng ût mai se, a nuamin a va mawi dawn em!
- Zoramchhana