MIZORAM POLITICS HER DANGLAMTU ZORAM ṬHALAI RUAL TE BEISEI RAM CHU

Information technology ṭhang zelah khawvel kalphung te, ram hrang hrang hruaitu chanchin te, an sulhnu leh an ram rorel dante awmhmun aṭangin kan lo hmuin kan hre thei tawh a. Kum 1986 state kan nih hnua kan ram politics kalphung nghet tlat tawh, game ang maia khelh fuh tuma kan lo khelh ṭhin, hlawk tum râna politics kan lo luhchilhna thinlung leh rilru puthmang pawh tunah chuan a inher danglam ve ta. Chatuana sawrkar lo tur tia kan lo dîriam leh chêksawlh ṭhin party naupang tê ZPM-in Mizorama rorelna an lo chan theihna chhan bulpui ber chu Mizoram ṭhalai rual, mi hawizau leh lehkhathiam rual Gen-Z kan tihte rualawhna rah chhuah ti ila kan sawi sual awm lo e.

Kan ram politics kalphung nghet lutuk kha

Mizoram chief minister lo ni tawh Pu Zoramthanga ṭawngkam lar tak pakhat chu, “A pumpui tlang chhah leh a rîlphiar fatu hovin an chang ṭhin, mipuite’n an sawisèl ngai lo…” tih kha a ni. Pu Zoramthanga kamchhuak hian hun rei tak kan Zoram politics kalphung a hril chiang viau mai. District council kan nih lai aṭanga kan entawn ber chu India ram politics kalphung a ni mai a. Mi thiltithei, hausa leh criminal case rip tak tak neite thlengin politics leh ram rorelna an thunun chho a, duhtawkin an inchhêk arbâwm a. Sum, rangkachak leh lunghlu chenin an chhêk ru nghêk nghûk a, black money chhehrelh a nasain eirûkna scam lian tak tak a hluar viau ṭhin a nih kha.

India ram politics kalphung chhe lutuk kha state kan nih hnuah kum 40 lai chu kan kalpui chho a. He kalphung hi vawi leh khata khuhhriang lingkhup thaw kanga siamṭhat burh theih a ni lo a, kan moral aṭanga siamṭhat ngai a ni. Arpa chan an chan laia an thlabi hlawhin a phâk reng reng loh tur rosum, in leh lo ropui leh picnic spot siam thei politician hlawhtling kha kan kawl nuk a, Mizoramah politics hi sumdawnna hlawk berah kan chantir a nih kha. “Kawr ṭet hà leh puan ṭet sinte’n rûk an ru lo ang a, necktie awrh leh kawr suit ha ten rûk an ru zawk ang,” tia kan zawlnei Pastor Chhawna’n a lo hrilh lawk hun thim khan Zoram hi a tuam rei hle.

Zêp tur a awm lo; politics luhchilhtuten game kan khêl a, khelh fuh tumin risk kan la ṭhin. A lian ber aṭanga a tê ber thlenga kan politics thlir dan kha mipui sum aṭanga hamṭhatna therhlo hmuha inchhek-arbawm kha kan tum bulpui ber ti ila a sual awm lo e. Politics hi ram hmasawnna leh dinchhuahpuina atan ram changkangte’n an hman laiin, keini erawh chuan sumdawnna hlawk ber atan kan hmang a, a pumpui tlângchhah leh a rilphiar chan tum reng rengin kan phar kual reng mai ṭhin. Engtikah tak Zoramah hian khua vâr ang maw tiin Zoram ṭhalai rualte’n kan ram hi kan lo thlir ṭhin.

Zoram ṭhalaite’n ram ropui hruaitute sûlhnu kan thlir ṭhin

Kan hruaitute’n a pumpui tlângchhah leh a rîlphiar an chawma an hâwp lai leh sumdawnna hlawk ber atana politics an hman laiin, kum 250 chuang kal ta, 1863 daih tawhah khan America ram hruaitu ropui Abraham Lincoln chuan, “Sawrkar hi mipuite ta, mipuite’n anmahni tana an siam a ni,” (government of the people, by the people, for the people) a lo ti kalh tawh a. An pianna leh seilenna ram chu khawvel ram ropui leh chungnung ber, thil ti thei bera siam tumin America ram hruaitute khan khawvelin a la hmuh ngai loh hmasawnna ropui kha thlentir an tum a, khawvel thunun tumin ‘We are a dreamer’ tiin an suangtuah ram kha a taka chantir tumin kê an lo pên ṭhin.

An mihuai kal tate sulhnu chhunzawm turin American ho chuan ram hmangaih rumrûttu sakáwl bawk an thlang zel a. An ram politics kalphung tarlanna dik tak John F. Kenedy kamchhuakte kha Zoram ṭhalai te hian kan sêprawtui ṭhin. “Ka ramin eng nge min tihsak theih tih aiin, ka ram tan eng nge ka tih ve theih tih hi kan inzawt zawk tur a ni,” tih te chu kan thinlung phêkah kan lo ziak ve kalh ṭhin. America hruaitute ram hmangaihna thinlung hi Zoram hruaitute hian engtikah tak pu ve ang maw tiin Tlumtea thlirin kan lo thlir ṭhin.

US President Harry S. Truman khan, “Politician nih vanga hausa ta min kawhhmuh ula, tichuan, rûkhmang ka hmuhtir ang che u” (Show me a man that gets rich by being a politician, and I'll show you a crook) a tih ang ngeiin, American ram rorelna chhungah corruption-in bû a khuar nghet thei ngai lo. Watergate Scandal vangin Robert Nixon pawh President aṭangin a thlawn hlawl a nih kha. Burma ram hmasawnna ûm phak tuma ṭan latu Singapore hruaitu ropui Lee Kuan Yee khan, “Ram tana i thawh laia i hausa a nih chuan i dam laiin chil an chhâk ang che, i thih ni-ah kut an bêng ang,” a lo ti tawh bawk a. Ûm phak an tum Burma ram erawh ram rorelna chîrî vang leh hruaiyu ṭha an neih loh vangin Singapore chuan a lehpèl ta duai duai a nih hi.

Hringnun damlai thununtu politics

Zoram ṭhalai rualte’n kan ram rorelna kan thlir a, kan hringnun hmakhua kan ngaihtuah a, ram dang awt rêng rêngin kan hringnun kan lo chhiar ve ṭhin. Khawvelah hian kan piang nawn dawn lo a, kan hringnun dam chhung tawitêah hian engtin nge hlim takin kan hringnun kan chhiar ve ang tiin kan hma hun lungkham kan indawmkun ṭhin. Ram rorelna kalphung hian kan hringnun dam lai nite min thunun dan kan hrethiam chho zel a. Kan ṭhenawm ram Burma leh Bangladesh-a ram rorelna kalphung ṭha lo leh an hruaitute lal hrawt vanga an ram mipuite’n an dam chhung ni hrehawm taka an chhiar liam dan te kan hre ṭhin.

Ram hruaitu pakhatin, “Politics ngaihtuah lo chuan amah a inngaihtuah lo a ni,” a lo tih ang chiahin, ram rorelna ngaihven ngai lohna leh mi ṭhate tel ve duh lohna ramah chuan mi âwkhrawlte’n duh tawka lal hrawtin an inchhêkarbawm a; ram rorelna chu sumdawnna hlawk ber atan chantirin ram mipui chan âi chu nawmchenna atan an hmang ral ṭhin. Ram hmangaihtu dik takte hruaina hnuaiah ram mipuite’n intodelh takin, hlim takin, zalen leh thlamuang takin an hringnun an chhiar liam a, ram hruaitu pamham leh eiruk hmangte hruaina hnuaiah erawh ram mipui an rûm ṭhin a, rethei tlawk tlawkin hringnun an vuiliam ṭhin. He hringnun politics hi Mizoram ṭhalai rualte pawhin kan hriatthiam vangin kan ram rorelna chu kan ngaihven zual ta a, pawn lam aṭang thlawp mai duhtawk lovin a chhungah kan luhchilh chho ve ta a ni.

Zoram tan ṭhalaite kan pên chhuak

Hmanah chuan Zoram ṭhalaite kan ngawi ṭhin a, kan ram politics kha tel vena tlaka kan ngaih loh vangin kan luhchilh ngam ngai lo. Mi hausa leh thiltitheite kutah kan dah a, mi rethei tan Mizoram politics-ah hmun a awm ve turah kan ruat ngai lo. MLA candidate ngam chu a hausa tur a ni tih kha mipui nawlpui ngaihdan a ni. Ram hruaitute’n duhtawka ram an rawk lai pawhin kan mifing leh lehkhathiam te an ngawi tlat ṭhin. Mahse, tunah chuan engkim a inher danglam ta.

Irish philosopher Edmund Barke chuan, “Thil sual leh ṭha lo dinchanna tura thil pawimawh ber pakhat chu mi ṭhate engmah ti lova awmtir leh ngawihtir tlat hi a ni,” (The only thing necessary for the triumph of evil is for good man to do nothing) tiin, an ram mi ṭhate au chhuak tur leh pên chhuak turin a fuih ṭhin. French ram rorelna chîri lutuk hnuaiah an ram hruaitute’n nuam tinreng tâwla lal an hrawt lai khan an ram miṭha leh philosopher–Voltaire, Jean Jacques Rousseau leh Montesquieu te khan thu dik hmangin mipui mit kha tivar lo se revolution leh reformation kha a thleng kher lo ang. Mipui mit tivâra thil ṭha leh ṭha lo thliar hrang thiam tura finna thu au chhuahpui ṭhintute au chhuahna leh pên chhuahna hmunah ram hruaitu leh ram mipuite’n kawng dik an lo zawh ṭhin.

Zoramah pawh ṭhalai rual lungfingte au chhuakin an lo pên chhuak ta; rorelna ṭhutthlengah mithar an ṭhuttir ta a nih hi. No turn in back tih angin hnuchhawn rama hawi kir zai an rêl tawh lo. USA President kalchhuak Barak Obama khan an ram ṭhalaite kha ram rorelna siamṭha turin a pawn aṭang ni lo, a chhunga luhchilh turin a fuih ṭhin angin, kan ram rorelna huangah Zoram ṭhalaite kan zuang lut ve ta.

Huaisen takin kan vâwt a, kan lum bawk

‘I lum leh lum la, i vawh chuan vawt law law rawh’ tih angin mahni duh dan leh ngaihdan huaisen taka kaltlangpui ngam Zoram ṭhalai zingah kan pung zel a. Politics kalphung ṭha lo laite huaisen takin kan sawisel a, fak tlak kan fak bawk. Greek philosopher Plato khan, “One of the penalties for refusing to participate in politics is that you end up being governed by your inferiors,” (Ram rorelna huang chhunga tel duh loh nghawng chhuah leh hremna chu mi ṭha lo leh chak lo zawkte rorelna hnuaia hringnun chhiar liam hi a ni) tiin ram rorelna a intât lut turin mi fel leh ṭha te a fuih nasa ṭhin. America President Woodrow Wilson chuan, “Neutrality is a negative word. It does not express what America ought to feel. We are not trying to preserve the foundations on which peace may be rebuilt,” tiin ramin harsatna a tawh laia ngaihdan au chhuahpui ngam lo leh pên chhuak ngam lo te a dem a ni.

American writer leh Nobel laureate Elie Wiesel chuan, “We must take sides. Neutrality helps the oppressor, never the victim. Silence encourages the tormentor, never the tormented,” (Ṭan lam kan nei tur a ni. Awn lam neih loh hian tuartu ni lovin rapbettu leh hnuaichhiahtu te a ṭanpui zawk. Ngawih reng hian nghaisatu leh sawisatute a tihuangtau ṭhin, insawisaktirin inhnuaichhiahtir ngai suh) a ti a; ngawih reng vangin hringnun tâwiteah tuar hreptu kan nih theihzia min lo hriattir. Italian moral philosopher Dante Alighieri phei chuan, “The darkest place in the hell are reserved for those who maintain their neutrality in times of moral crisis” (Harsatna tawh lai pawha ngawih chuh rengte tan hremhmun thim lai ber zuahsak an ni) tiin, harsatna hmachhawn tur leh chingfel tura huaisen taka ke pên turin an ram mipui a tur na hle bawk.

Zoram ṭhalaite pawhin huaisen takin ram rorelna huangah duhthlanna huaisen kan lantir ta. Kum 40 zet Mizoram rorelna MNF leh Congress-in an lo thununna sawi ṭhiattu chu Mizoram ṭhalaite au chhuah vang leh pên chhuah vang a ni. Zoram politics hi luhchilh tlak a ni lo, a ṭawp lutuk tia ngaihdan nghet tak kan lo neih ṭhin chu thlak hlawkin, ‘Zoram hian bung thar a kái tur a ni, kan ram rorelnaah mi ṭha lote tan hmun a awm tawh tur a ni lo’ tiin an au a, an pen chhuak ta a ni.

Beiseina meichher êng chuai raih kha

Engtin nge he ram hi kan siam ṭhat leh theih ang a, kan moral chhe lutuk hi engtin nge kan kan siam ṭhat leh ang tia tuihal ṭhalaite beisei ram chu kum 40 kal ta chhung khan an hmu thei si lo. Sum sem leh a thlawna dawn hmangin thatchhiatna ruamah mipui kan tlu lut a, thawhrimna hnualsuata awlsam taka hausak châkna chuan Zoram mipui moral a tichhe zo tawh si. Thlantui fara káwla ni chhuak chhiara nunkhua sual ṭhinte beidawnna ram, thawkrim lova mipui chan ai hmanga inchhêkarbawm ṭhinte vawk lallènna ramah Mizoram a chang chho a nih kha.

Sawrkar hnathawk tam takte’n duh tawka nuam tâwlin, aikal an la sup sup a, sawrkar office inenkawlna buarchuar lutuk vangin duh hun hunah an kal a, an haw a, inneihna leh picnic-naah an kal zûr zut a, office dawrtu mipui mangang aurawl a ring hle ṭhin. Sawrkar hna lak ni se, thil ti thei hmelhriat nei lo ṭhalai rual tan vàna rah ang hlauh a ni si. Department lian tak taka dvertisement kaltlang lova hna laka duhsak zawng thun ruih ruihna khan Zoram ṭhalaite thinlungah beidawnna a thlen nasa hle.

Smuggling sumdawnna hluar lutuk vangin zan khat thilthuah corepati an chhuak thar thut thut a, kuthnathawktute mangang aurawl karah ṭhâl khawro laiin ṭek tlain Burma kuhva phur motor-te a lo dêng alh leh hluah ṭhin. Zan khat thil thua hausa thut hote’n an black money tih white-na turin ram, in leh lo an lei zawt zawt a, Aizawla inhmun to chakzia leh sum hlutna tlakhniam chakzia kha ṭhalaite’n kan hai lo. Ruihhlo hluar lutuk vangin kan ṭhalai rualte thlân khurah an liam zawih zawih a, ruihhlo ngâite enkawlna rûnah an inêkbeng a. Engtikah tak kan ram rorelna lui hnâr hi fîm ang maw tiin kan thlir ṭhin.

Kuthnathawktute’n an sawhthing thar lah rate chhiat kumah chuan dah ṭawih mai kha kan tih theih awm chhun a ni mai a, beidawnna mittui nen an thlir ṭhin. Risk an la a, thlâm tlaitlânah rilru mangang takin “Sawhthing rate hi kuminah chuan han ṭha ve hlauh se la aw” tih kha kuthnathawktu chhungkaw pa beiseina neih chhun chu a ni.

Engkim tan hun ruat a ni

‘Engkim tan hun ruat a ni’ tih angin, kan tawrhna zawng zawngte chuan Zoram ṭhalaite thinlungah hriatthiamna a tuh ta zawk a. Mizoramah hian rorelna dik leh ṭha zawk a piang thei a ni tih chu kan tlangau hla a lo ni ta. Mahni inchhêkarbawm leh a thlawna sum sem dawn thlahlel reng reng lovin thawhrimna tlangaupuitu party naupang tê chu ṭhalai rualte chuan rorelna ṭhutthlengah an ṭhuttir ta a ni.

Taimakna leh tawrhchhelnain a chher hriam Pathian hnam thlan Israel fate chu oil lipui chunga nuam tin tâwlho Arab ramte’n an hneh thei ngai lo angin Mizoram ṭhalai rualte hi kan moral a dik a, taimakna leh tawrhchhelna hmanga chher hriam kan nih phawt chuan khuavel kan chhîng ngei ang.

Ram hmasawnna sum leh pai hi keimahni ta ngei a ni tih kan hriat chian êm vangin hmasawnna sum hman chungchangah kan thîkthu a chhe tawh. Sum sên leh hnathawh a inmil em tih hre chiangtu kan ni a, tu’ma zirtir leh hrilhfiah kan ngai lo. Dik taka hmasawnna atana mipui sum hi hman a nih phawt chuan he ram tan hian Zoram mipui hian chhiah pêk kan hreh lo a, kan sawisel ngai lo.

Ram kaihhruai tum dan policy sawi tur hre hauh loa kum 20 kal ta vela finfiahna pawh awm thei lo hmanga mimal inbeihna te, finfiahna document pawh phawrh tur hre hauh lova mimal inbeih vak vakna politics hi ṭhalai te ngaihnêp berte zinga mi a ni. Ṭhalaite hian ram hmangaih vanga politics luhchilhtu leh sumdawnna atana politics luhchilhtute hi kan thliar hrang thiam viau bawk.

Zoram ṭhalaite beisei ram chu dik tak, fair tak leh langtlang taka mi nawlpuiin kan chhawr theih hmasawnna hna thawh a ni. Mi tinin an chhawr nghal theih kawngpui ṭha kan hmuhin kan hlim a, dik leh fair taka sawrkar hna exam-a tlingte kan lawmpui. MUHCS kaltlanga inenkawlte bianga lawmna mittui luang kan hmuhin kan lawmpui a; ni sensa hnuaia an sawhthing thar hralhtu kuthnathawktu hlim hmel chu kan lawmna thlentu a ni.

Ram mipui sum hi kan in chhungah hian khawh lut zur zurin liam zur zur se tih hi Zoram ṭhalai rual ‘Gen-Z’ te beisei ram a ni lo hauh lo mai hi Mizoram vanneihna a ni. ‘Aw Zoram nuam, suihlung phâng lo la… Lalpa chakna ringin kan bei zel dawn hmelma doral,’ tiin pheilai kan vâwr chho ta.

Kan ram hmasawnna tura sum lo kal hi a tam leh tlem lamah kan buai lo a, dik tak leh a nih dan tur ang thlapa hna thawhna atan hman a ni em tih hi a ni kan zawhna zawk chu. Tunah hian thalaite beisei ram a thleng chho mêk zel niin a lang. An hmangaih Zoram enkawl tura party naupang tak hnathawh kawr an hâktir ZPM ministry tan fimkhur taka ke an pên a ngai a. Eirukna thawm thangva hriat tur awm ta lote hi thehmeh angin reh hlen se. Tlak huama huaisen taka hna kan thawk dawn titute hian huaisen leh dik taka Zoram tan hna an thawh zel chuan ṭhalai rualte hian Mizoram enkawl tur hian hnathawh kawr an hâk chhunzawmtir zelin a rinawm e.

~ Lalnunmawia Pachuau