Mizo Kristian martar hmasa ber Chalbuanga Chhangte chanchin ziaktute tih dik tawk lohte

Martar Chalbuanga, Khandaih (Phullen) chanchin hi ka theih angin research ka lo bei ve tawh ṭhin a. Chalbuanga farnu Khuallutthangi tuchhuan zinga mi ka nih ve avangin kan Pu Chalbuanga chanchin ziaktute’n an tih dik tawk loh laite hi ka chhinchhiahin ka vei hle ṭhin a ni. Lehkhabu, article leh sunday school zirlaibuah te a chanchin hi ziah lan a ni a, a lungdawh te hial Phullen khuaah phun a ni. A ziaktute’n an thu lakna emaw, an mahni hrilhtute’n an hrilh dik tawk loh vang ni berin a rinawm. A chanchin a dik lo laite siamṭhat a, a dik zawk anga a chanchin kan neih theihna turin a dik zawk nia ka hriatte ka rawn thai lang dawn a ni.

Chalbuanga pian kum leh baptisma chan ní hi a chanchin ziaktute hian an ziak dik lo vek a. A pian kum hi 1888 a ni a, 1882 ni lovin. Baptisma a chan ní hi November ni 2, 1904 tih hi a dik lo a, June ni 3, 1906 (Sunday) hi a dik zawk chu a ni. Amah hian u pakhat leh nau pali a nei a, an unau zinga a upa ber dawttu a ni. An unau zinga upa ber pathumna anga ziak hi a dik lo.

A hnam hming hi Chawngte a ni a, Chhangte tiin an ziak. Chhangte leh Chawngte hi hnam inunau an ni a, hmanlai chuan hnam inunaute hi an chenna khuaa a tam zawk leh ropui zawk hnam hming hi an pu mai ṭhin a ni âwm e. Chalbuanga pa Thilluta unau thlahte chuan vawiin thlengin Chhangte an inti vek a ni. Chhangte Chawngte kan ni e an ti ṭhin. Chhangte tia ziak hi a pawm theih thoah ngai ang.

A thih hun hi 1906 kum tawp lam niin rin a ni a, a ni leh thla tak hriat theih a ni tawh lo. A kum zat pawh hi 25 anga ziak hi, kum 19 vela upaah dah ila a dik zawk awm e. Isua a rin kum hi 1906 kum tir lam a ni awm e; hei hi baptisma a chan hma a ni.

Ṭhangtharte’n Mizo Kristian martar hmasa ber Chalbuanga chanchin ziaktu emaw, chhiartute’n a chanchin dik zawk an lo hriat theih nan tuna ka han tarlante hi a ṭangkai ngei ka beisei e.

Source:

Synod Archives Record

K. Rohmingliana, Tuivamit, Aizawl (Chalbuanga farnu Khuallutthangi tupa)

- Zohmachhuana Khawlhring, Zarkawt (Mobile no: 9615767372)