AAC Block hman dan

AAC (Autoclaved Aerated Concrete) block hi Mizoten tunhnaiah insak nan kan hmang ṭan ve ta a. Brick aia a zân zawk avang te, kangmei laka a him zawk vang te, sound a proof ṭhat zawk vang te, rem a awlsam zawk leh hna a sâwt zawka hriatna (sum sen tlem zawk) vangtein kan hmang uar chho zel dawn niin a lang.

Zonuam, Aizawla kan in chhawng chung lamah block hi hman ve ka duh a. A chhan ber chu bualin/toilet zawng zawng hi a ban pawna thlawk chhuaka awm turin ka dah vek a, chuvang chuan brick aia a let 3/4-a zâng zawk block hman ka duh a ni. Mahse, block hman dan tur dik tak min hrilh thei an lo awm hauh lo mai a; tihsual ka hlau bawk si. Block hmang fuh lo inchhir fe fe an lo awm ṭeuh chu niin. AAC block-a bang an lo pin tawh han ṭhiat lehte an lo awm nual a. Block hmanga bang ping, khi nasa tak, ṭhiat leh si lo, mahse, tui lo taka enliam ta mai mai lah bo lo.

Tichuan, block hman dan dik ka zawng ta chiam a, a tawpah chuan ka hmu ta a; chu chu IS 6041:1985 hi a ni. He lama thuneitu sang ber Bureau of Indian Standards-in AAC block hman dan tur inkaihhruaina (code) chu kum 1985 daih tawh khan a lo tichhuak tawh hi a lo ni.

Engineer-te ziah awm tak a nih avangin he article tur hi ka ziak ngam lawk lo a, mahse, anni’n an ziak mai si lo. Mimirin in sak nana block kan hman dan lah a dik lo tlangpui niin a lang zel bawk si. Tichuan, inthlahrung tak chungin, tihian ka han ziak ve ta tawp mai a ni. IS 6041:1985 leh hmun dang aṭanga block hman dan tur dik nia sawi aṭangin a tlangpui hetah hian han tarlang ila.

A dahṭhat dan turin bul ṭan ila Block hi hmun hulah dah a, huh leh hnâwng lakah ven him tur a ni. A bawk zawng ni lovin, a tung zawnga rema dahṭhat tur a ni. Tuia chiah loh tur a lo ni a, hman hmain emaw, hman laiin emaw tuia chiah leh tihhuh loh tur a ni. Hman dawnah erawh a panga bâl kai tlenfai nan tuia chiah zeuh a pawi lo. Banga rem pawhin, a chârna atan cement kan hman loh chuan (adhesive kan hman chuan), tui pek a ngai lo. A châr nan cement kan hman chuan a chârna lai chauh tui pek ni mai se. Bang plaster-ah erawh a plaster nan cement kan hman avangin tui pek tur a ni thung.

Block chhah zawng

In pawn bang pinna atan a block size (chhah zawng) tê thei ber chu inches 6 tal a ni tur a ni (duhthusamah chuan 8 inches). In chhung bang pinna atan inches 4-a chhah a tawk thung. A size lian ber ka hmuh inches 4 -a chhah ka hmang ta ringawt a. Bang chhung leh pawn atan inches 4 aia tê hmang kan tam hle. A size lian chu mipuiin kan lei duh vak lo a, chuvangin, a zuartute’n an kawl lo viau hi a lo ni.

Rem dan tur AAC block hi kil dik tak leh ngil taka rem tur a ni a, a sàwi tur a ni lo. Block malin building rihna leh a che vel kha a mal tuar loh nan ‘spirit level’ nena rem a ṭha ber. Block chu rem hmain bang remna lai tur zawn chhuat kha level dik takin cement-a zût phawt tur a ni; hei hi darkar 24 chhung tal dah châr leh ni se. Mahse, in sak laia darkar 24 han nghah chu a har hle, darkar 12 ka nghak thei ṭâwk!

Thir ‘frame’ (rod rem hnan) In bang chu a sei chuan a khamphei zawnga ft 9 danah, ban tê (beam-te) tun zel ni se (kan in hi ban kar ft 15 a ni a, a sang zawngin a lai takah beam tê ka tung). A bang sang lamah chuan ft 4 dan zelah beam tê/rod ṭawn khawm dah ni se. A chiah chiah lo deuh pawhin, a âwm tawkah dah zel ni se. Hei hi bang khi tur venna a ni.

Tukverh, kawngkhar, leh ventilation zawng zawng sirah beam tê emaw, rod (mm 8/6) emaw kham chhuah vek tur a ni a; a bang rem nan adhesive emaw, cement emaw hman theih a ni. Block rem nan hian hetiang atana siam sa adhesive (thil ban) hman a ṭha ber. Adhesive hman chuan block leh block inkar hi mm 3/4 chauha insi lo ni se; cement hman erawh chuan block leh block inkar hi mm 10/12 a ni ang. Adhesive emaw, cement emaw bang rem nan kan hmang hnem thin lutuk a, hei hian bang a tihkhîk duh bakah, ṭul lova sum senna mai a ni.

Thil dang Ruah dawng lam bang chu vawi hnih plaster tur a ni. Block hi a chhung a kawrawng deuh ṭeuh a, tui a ngam lo viau. Kan in chhung pindan banga block ka hman chu khi a awm miah loh laiin, pawn lam bang chu a khi riah deuh vek thung, a chhung lam thleng chuan a khi chhuak lo. Pawn lam bang atan block inches 4 chauha chhah ka hman vang a nih a rinawm. Bualin banga tui lumna khaina lai leh in chhung banga electric plug socket dahnaah hian harsatna a awm ka hlau deuh a. Mahse, harstna a awm ta lo.

India rama AAC block ṭha leh larte chu an awm nachungin, hmun hla tak aṭanga lak aiin a hnai zawk Gauhati emaw, Silchar emaw aṭanga lak hi kan lo hmuh phak a ni ber a. Mi narân tan chuan a ṭha leh ṭha lo pawh hriat a harsa. Chuvang chuan, a chhah zawng lam hi ngaih pawimawh ni se a him ber mai awm e.

Chutihrualin, han khawih leh chawi velin block ṭha leh ṭha lo chu a hriat ve theih a. Block chu han khawih la, a pawn lam leh a kil vel rual lo zung leh mâm lo, tina han kheuh pawha hnip tak a nih chuan a ṭha lo tihna a ni ang. A ṭha chu–mâm leh kil nalh tak, tina sih khawh mai mai theih a ni lo ang.

Han tuihnih ila

In bang pawna hman atan chuan a tlem berah inches 5/6-a chhah, in chhung bang atan inches 4-a chhah hman ngei tur a lo ni. Tin, thir frame (rod rem hnan) hman a ṭulzia pawh tarlan tawh a nih kha. A nih dan tura kalpui dawn chuan AAC block hman hi a hautak hle tih a lang. Engpawhnise, block hi kan la hmang uar dawn chauh a nih hmel a; he article tawitê leh kim lo tak hi block hman chungchangah eng emaw ti tala a ṭha zawnga min kaihruaitu a lo nih theih mial chuan a lawmawm hle ang.

- Prof. LH Chhuanawma