Gen Z, achtung!
German ṭawnga 'achtung' tih hi attention, caution tihna a nih thu sawi thui kher lo ila. Tun hnaia Gen Z-ho nawrhna huaihawta Delhi tuallaia buaina an siam kha kan hre ṭheuh awm e. Hemi chungchangah hian kan tih luatah léngin kan zir sual palh ang tih hlauhthawn thilthu tawitê han sawi ila, Mizoram context-in.
Kha nawrhnaa bultumtu ber Cockroach Janata Party (CJP) kha eng registered political party mah ni lovin, tun kum May thlaa Chief Justice of India Justice Surya Kant-a ṭawngkam chheh sual elsênna atana ruling BJP hming kaihleka satirical movement an din a ni a. An thil tum leh hmalaknate kha a ṭhat hle rual hian, keini tribal (ST) Gen Z ṭhalaite tan hian han thlawp viau hi a ṭha ber ang em tih ngaihtuah a pawimawh ang.
Kan hriat ṭheuh angin India ram pumpuiah hian sawrkar hna lakna (recruitment)-ah te, zirna in sang zawka admission-ah te, hnaa promotion-ah te, ST tan mai ni lo, SC, OBC, etc tan hian reservation a awm thluah a, a percentage pawh a inang lo (ST tan chuan 7.5% a ni). He thil hi General category-a awm vai kan tihho hian helh tak tê hian an helh eltiang a. Kum 1990-a Mandal Commission Report protest rapthlakzia pawh kan la hre hlawm awm e (Gen Z-ho pian hma). Reservation duh loh vanga kha agitation-a mahni intihhlum hial pawh pawi ti lova khawnvartuia inleih a, inhâl hlum tumte thlah kal zel kha tuna Gen Z kan tihte chu an ni ta a ni.
Tun hnaia social media outburst ṭhenkhat ka lo chhiar ve-ah khan, reservation issue bawk rawn tharthawh leh an awm nual takah chuan ngaihtuahna a kal thui hle mai a. He issue hi nakinah chuan CJP-ho hian an rawn tharthawh leh ngei ngei dawn niin a sawi lawk theih tlat. A chhan bul berah chuan, justice leh equal opprtunity hi an pawl rilru laimu a ni miau a ni.
‘Mizo mipa chu an awm khawm tawh hi chuan an titi an titi a, a tawpah zahmawh bawk an sawi leh ṭhin,’ an tih ang deuh khan, vaiho pawh (a bik takin zirlaite leh sawrkar hnathawkte) an han titi an han titi a, a tawpah chuan reservation an helh thu bawk an sawi leh ṭhin.
Mizote hian he ST reservation kan chhawrzia hi kan hre tâwk lo a ni mai thei–central services leh civil services kan ûksâk lutuk loh vangin. Kan unau Manipur, Meghalaya leh Assam lama mite chuan an chhawr nasa mai a, reservation issue hi an bengkhawn em em a ni tih hi hai rual a ni lo. Kum 2023-a Manipur tlangmite leh Meiteite inkara buaina pawh kha ST quota vanga lo irh chhuak a ni kan ti thei ang.
Meitei hoin General quota, SC quota leh OBC quota zawng zawng an hauh vek hnuah pawh ST quota-a luh theih dan ngaihtuahin, Scheduled Tribe zinga tel ve duhin hma an la a, chu chu kan tlangmi unaute khan an chanvo nasa taka pawh hêk tumna a nih hriain a dodal nan lungawi lohna an lantir a; a hnu zela thil thleng kha chu kan hre vek âwm e. ST reservation hi awm lo ta se Mizote hian IAS,IPS, IFS, doctor, engineer, etc. heti zozai hi engtikah mah kan nei lo vang tihte pawh chhût ngun a ngai.
July 22, 2026-a Aizawl Vanapa Hall kawta zirlai kal khawm (Gen Z protest)-ah khan, protest chhan solid tak chiang fek fawka sawi awm lo mah se, au chhuakte ànhla ṭhenkhat han ngaihthlak hian, ngaihtuahna an sêng tlem deuh em aw a tih theih a. MZP an han àn khum chiam te kha, an khawthlir a thui tawk loh vang a nih ngei a rinawm. Hruaituteah duhkhawp lohna a awm a nih pawhin, MZP hmalaknate kha chu kan hnam survive nan a pawimawh tak zet a ni tih hi Gen Z lam pawh hian lo study ve deuh sa a duhawm hle mai. Illegal Chakma issue, Citizen Amendment Act, delayed ST scholarship, Assam-Mizoram boundary issue, etc. te kha ngaihzam leh ngaihthah chi a ni miah lo.
Gen Z ka fuih duhna dang leh pakhat chu, rualúte leh naupang zawkte pawhin Gen Z hi engtin nge an hmuh tih hi an ngaihtuahnaah awm se la; mut heh, tho tlai generation, khawlaia insual rawn ching generation, phone bih reng generation, emaw, ngaihdan thlak zung zung generation tia hriat an hlawh loh nan. CJP-ho agitation-a tharum thawhna ang chi phei kha chu kan lo copy atan hian a duhawm miah lo. Chutiang tendency kan nei a nih ngat phei chuan ngaihtuahna kan sên thar a ngai ang. Anni hi chu protest, rally, demonstation, bandh, etc. an neih apianga buaina siam a, sobatage activity leh unruly behaviour tihlan ngei ngei hi an tum a ni tlangpui a; police-te tan pawh lathi-charge leh tear gas lo chu duh thlan tur a vâng hle a ni tih pawh kan hriat tel a ṭha ang.
- Mal Sawma