Lalkima Zote hlaa confession lungchhiatthlak kha

Hrânghlui zài thiam Lalkima Zote kha a hun lai chuan lãr vet vet tak a ni. A hla dang chu dahṭha ila, a hla pakhata pa ber inpuanna lungchhiatthlak khan rilru a khawih dàn a dang asin aw! Châng khatnaah chuan,

Mapui kan inṭhen lai khan e,

´Zû ka in lo,' ka tih kha;

Mahse, kha tih lai te pawh khan,

Ka rûi reng si a.

Mapui, luaithli núl chunga e,

In rûn lam haw tur a,

Pheilai i han vàwr lai te khan,

Ka lo ruih em vang a lo ni

a ti hliam hliam mai.

Mitthlaah pasal zu ngawlvei neih avanga nupui lungchhia leh mangang taka a nu leh pa hnen pana haw hnak hnak tur, rilru hah avanga mit khur thûk leh dawldáng tak tur te a lang zut zut a.

A thunawnah chuan,

Min ngaidam rawh Mapui,

Thiamna reng nei lo val hi;

Min ngaidam rawh Mapui,

Lung lèm reng reng ka nei lo.

Ih maw! Keimah vàng khân maw,

Suihlung phang rêng rêng a,

Zan mu i chhin loh laite khân,

Ka lo ruih em vàng a lo ni

a ti hial. Zu ngawlvei pasala neite’n hahdam taka mutmu an tuah loh ṭhin dan a va chiang em!

Châng hnihna leh châng thumnaah chuan rûn hmun lèn dun leh châk mah se, an inṭhen tâk dàn pawi ti takin a chhui kîr a, ‘A thlàwn mai an chang tawh si’ tiin.

Châng linaah chuan mihringte hmêlma zu chu dem hialin,

Hringmi tân doral lian ningzû,

Engah ka tawn kher che;

Ka thai duhlai min ṭhentirtu,

Nun rãwng chawltui ningzu,

Chûnnu leh zûapa chinlai unau,

Sam ang inṭhentirtu,

Lanu, val nûn her sualtirtu,

Lu tihai mai i lo ni

tiin mangang au ráwl a chham chhuak ta rãwih mai a ni.

Zu avanga nupa kâra manganna leh buai rûkna tâwk ṭhinte tân inenfiahna tur hla zirtir nei a ni chiang mang e. In nupa pualin vawi khat tal lo ngaithla ve leh ta che.

- VLC Vanlalhriatrenga