Hamrik hamtu

Mizote hian inkhelh (football) kan ngaina a. Vaiin khawhmu lêk lova cricket an uar thu leh an ngainat thute hi kan sawi ve ṭhin tak na a, keini pawh hian vaiin cricket an ngainat ang deuh chiah hian football hi kan ngaina ve niin a lang.

Hetia han ngaih mai pawh hian tute pawhin Mizo inkhel thiamte hming chu kan hre fur hian a hriat a. Chutiang bawkin football-a inelna kan neih lian deuh hote pawh. Tin, khelmual kan neih ṭhat ho (artificial grass kan phahna)-te thlengin khawi khawiah nge an awm kan sawi thei fur awm e.

Football hming kan lam rik apiangin kan mithlaah inkhel thiam, lawmman, inkhelhna hmun leh hmanrua bakah mipui entu lam an lo lang hmasa ber ṭhin. Inkhelh hmaa kan rilrua lang ve phak lo hamrik hamtu (referee)-te hi inkhelh zawh meuh chuan kan rilru mawlhtu leh kan sawi zui nasat ber an ni ve fo. An tel lova football pangngai (official match) khelh theih miah si lo hi ball pet tur ang mai a lo awmsa tura ngaihna kan neih vang nge kan ngai pawimawh tawk lo hle (Mizoramah)-in a hriat.

Hetiang taka hamrik hamtu kan dah pawimawh tawk loh nachhan hi local tournament hun laia in ham chhawk kalphung ang reng tura ngaite pawh kan la awm a ni mahna. Hamrik hamtu hian mual chhunga mi sawmhnih leh pahnih bakah pawn lama coach, substitute leh mipui thlenga an thunun a ngai a. Chumi mai piah lamah inkhelh hma hauhin tih tur tam tak an nei; entirnan, khelmual inkhelh na tlak a ni em? Inkhelh ṭan mai theih turin engkim peih fel a ni em? Inkhelh ti khaihlak thei tur thil a awm em? Khawchin thlenga an thlithlai a ngai.

Hamrik hamtu chuan khel mual chhunga hamrik a ham hma hauhvin ngaihtuah tur tam tak a nei tihna a nih chu. International Football Association Board (IFAB) Laws of the Game (LOTG) Law 5-ah chuan hamrik hamtuten LOTG kengkawh tur leh inkhel thunun turin thu tawp an neih thu a inziak. Inkhelh chhunga thil thleng (facts of play) chunga hamrik hamtu thutlukna apiang chu thu tawp leh zah tur a nih thu tarlan a ni. Hamrik hamtu mai piah lamah tunlai thiamna; a goal leh goal loh hriatna, ball tawk an awm leh awm loh hriatna leh Video Assistant Referee (VAR)-te nena ṭangkawp pawhin mipui duhkhawp a la ni lo fo. A nih loh avangin referee thu tlukna kan sawisel luai luai ṭhin a nih hi. Hamrik hamtu han awm lo ngat phei se la chu football chuan a nihphung tam tak a hloh nghal dawn tih a lang reng mai.

Chutiang khawpa pawimawh ni chung siin hamrik hamtu chuan ngaihven an hlawh lo fo. An hna tlin taka an thawh chuan an awm ve tih pawh kan hre ngai meuh lo. Inkhel mi awmherh avang emaw aman tih sual a neih emaw chuahvin ngaihven an hlawh ṭhin. Hetianga ngaihven an hlawh loh chhan hi inkhelhna hmanrua lei mai theih ball, corner flag, goal net leh adt. ang mai a thil awmsa dik lo thei lo ni tura kan ruat vang niin a lang.

FIFA chuan hamrik hamtute a dah pawimawh zia kan hria. No referee, no game a ti tawp mai a ni. 2026 FIFA world Cup-ah khan hamrik hamtute ngaihthah theih an nih loh zia a takin kan hmu nawn leh a. Mipui nuaih tam takin hamrik hamtu thutlukna kan sawi zui luai luai a, Argentina inkhelh apiangin sawi zui a tam zual a nih kha. Inkhel ṭhenkhatah chuan inkhel tih tawp a nih rual chiahin inkhelh thiam, an khelh dan kal hmang, a goal mawi leh mawi loh ai mahin penalty an hmuh dan, foul a nih leh nih loh, card a pek leh pek loh kha kan sawi nasa zawk mahin a hriat. Hei hian chiang takin inkhelha hamrik hamtu pawimawh zia a tar lang kan ti thei ang.

Qualified referee nih hi thil awlai lo tak a ni. All India Football Federation (AIFF) hnuaia inziak lut referee ni tur chuan LOTG hriat bel han bakah taksa hrisel ṭhat (physical fitness) a ngai. Hengah hian paltlang tur exam hautak tak tak a awm a ni. Sawi tak angin hamrik hamtu chuan khelmual chhunga inkhel mi sawmhnih leh pahnih leh pawn lama awmte lakah dik tak leh chawp leh chilhin LOTG a dan sawm leh pasarih ngawt mai hmang chuan thutlukna a siam nghal par par a ngai. Heng dan sawm leh pasarih huam chhungah hian peng tam tak a awm leh bakah pawn lamah pawh hian hriattur hriat ngai tam tak a awm. Chungte chu a bu kan keu leh lawk, kan google zuai teh ang tih hman a ni tawh loh reng reng. Chuvang tak chuan exam naah theory leh practical-ah a hranpa ngatin 80% vel daih hmuh a ngai ṭhin reng a ni. School-a letter mark kan tih ṭhin ang vel kha pass mark a ni.

Hamrik hamtu chu leilung pianken ang maia amaha rawn awm, dik nghal thlap tur hian mipuiin kan beisei niin a lang kan tih tawh kha. Ti sual ve thei lo turin kan beisei a; an lakah tehna sang tak kan lek fur; mahse, chutiang ang tak chuan zahna an lakah kan lantir ngai hauh si lo.

Tun dinhmunah football-a hma kan sawn theih nan inkhel thiam chher chhuak turin hmalakna kan nei ve ta nual a, chutiang bawkin a enkawltu coach lam te pawh. Football chungchang hria leh ngaihnawm taka sawi thei pawh mipui tam lam chhut chuan a ngah pawl tak kan ni awm e. Heng kawng a hma kan sawn ang bawk hian hamrik hamtu neih ṭhat lama hma kan sawn chuan ram chhung football-in ṭhan phahin a zahawm sawt dawn bawk a ni. Chumi tur chuan a hmasa berin football lam ziakmi, coach, player, club leh mipuiten hamrik hamtu kan thlir dan hi kan thlak a ṭul awm e. A chhan chu inkhel thiam inkhel mi tan an goal venhim a ṭul anga hamrik hamtu tan football zahawmna humhim a tul ṭhin avangin.

Ngun takin han chhut ila football-a hnuhma kan theihnghilh theih loh tam tak hi inkhel thiam aṭanga chhuak a ni vek bik lo. A chang chuan hamrik vawikhat ham mai te, flag vawikhat han phar te hian inkhel kal hmang ti danglamin sulhnu theihnghilh ngai tawh loh tur a hnutchhiah ve fo a nia.

References:

International Football Association Board (IFAB). Laws of the Game 2025/26, Law 5: The Referee. IFAB.

All India Football Federation (AIFF). Referee Development and Referee Education Programme. AIFF.

FIFA. FIFA Football Regulations and Match Officials Framework. FIFA.

- Jonathan Lalrinmawia, ITI Veng, MFA Referee Committee Member