KAN LA TLAI LO

Kan pam party sorkharna inthlak zut karah hian opposition apiangte’n ram leh hnam an hmangaih thar zel a. Sorkhar fawng an vawn meuh chuan ram an hmangaihna chu a lo dai leh hman ta emaw ni, ram leh hnam aiin contract lian an hmangaih zawk a. Dam chhunga sorkharna vuan tûr emaw an inti a, tu thurâwn mah an dawngsawng duh lo. Mahse, dik taka tite, dik lo taka ti ṭhinte pawh hun chuan a her liampui zel a. Sorkharna chelhtu hun pawh a her liam a, an tih sual an hre chhuak a, thupha an chawi a.

Ih maw, kan nun hluite hian min ko ṭhin mah se, hawi kir a, siamṭhat theih a ni tawh lo. Hawi kir duh suh, engmah kan nun hlui hian min hrilh tur a nei lo. Tuna kan chelh mek hi rinawm taka vuan tlat turin thutlukna siam ila, kan kalsan tak kan sulhnu siamṭhat leh tum zawng, hmeichhe khawlo laklawh tawh siamṭhat tum nen a danglam chuang lo. Dâwta phat mar a ṭul leh ṭhin. Vawiinah hian thil ṭha tih tûr kan hre lo a nih pawhin, thil ṭha lo, kan tih loh tawp tûr sawi lo tura kan inven a ngai a ni.

Kan nun hluite hian min um phak zel si a, chu chuan kan nun a pal hnawk a, kan ke chheh a petek leh ṭhin. Mi rin kan hlawh chhuak zo tawh lo va, kan chhungkua thlengin mite en tleu kan hlawh ṭhin a ni. Dikna chu a ngawi reng a, dik lo zawk chu au ring viau mah se, mualpho hun a nei leh nge nge ṭhin.

Bul ṭan ṭha leh tûra Lalpa’n hun ṭha min la hawnsak lai hian kan sulhnu, nun hluite chu vui liam ila, kan nun hluite chuan min âu ṭhin mah se, haw kir lovin, hnuchhawn ngam ila. A siamṭhat theih lai apiang siam ṭhain, kan ram, kan hnam tluchhe mek siamṭha tûrin kan fin, kan thiamna hmangin i din thar leh ang u hmiang. He kan ram neih chhun, lem chang thiam apiangte dinchanna ram hi nang leh kei lo hi chuan siamṭhatu dang a nei lo.

State dangte hmasawnna thawm ri kan hriat mek laiin, keini hi kan hnung tawlh reng dawn em ni? Bawhchhiatna fa hrin kan ni a, dai sual, tih sual nei lo khawpa uirenu dêng hmsa thei awm bik lo mah ila, kan hmaah dikna a awm chhung chuan, mimal tinte hian dik taka kan tih phawt zawngin, state dangte’n Mizoram an fakna thawm kan hre thuai ang.

Duhâmnain min sal beh chhung chuan ram leh hnam hmasawnna hi a ṭhan a ṭhu reng dawn a, ei leh bar intodelh lohna ram hian chhiatna bak min thlen lo vang. Biakina kan nung chang hi pawn lama kan chhawm nun a hun ta. Pathian fakna hla kan sakte hian kan nun sâwi danglam tawh rawh se. Heti taka inkhawm tamna rama hian ngati nge dik a ṭulna hmuna kan dik zawh loh ṭhin? Pathianin kan nunah thu a nei lo em ni? Biakin hi lem chan nân mai em ni kan hman?

Mizo Kristiante kanin enfiah a hun ta. Kan sulhnu hi ṭhangtharte’n an la rawn sawi dawn. Kan tu leh fate’n an ngaithla ngam ang em? Vawi tam tak chaw lo nghei tawh, harsatnain a kiansan ngai loh, mangannain a chên chilh reng, ka hringnun hman mek angah hi chuan dikna bakin hmun a chang lo asin.

Bianga thlan tui luanga ni tin kan mamawh thawk chhuak peih lote avang hian kan ram thau sâwk mektu hnam dangte hian sum leh paiah min ṭhansan mek a, zirna lama ni se, min tlansan a. Eng show show emaw kan buaipui chhung hian IAS an inziak tling a, kan hmuhsit em emte hi nakina chuan kan bawrhsap an la rawn ni ang a, ‘Ka pu’ kan la ti dawn a ni.

Aw le, hun a liam a, kan kum pawh a tam ve zel a. Mi dik lote’n chan ṭha an chan reng hi tihtawp a hun ta e. Mizo lanu val rual, lehkha thiam tak takte u, kan ram, kan hnam tung ding turin in finna leh thiamna mut bopui mai lovin, tho u la, rawn ding chhuak tawh ru le. Kan ram leh hnam hian chhantu a ngai a, khua kan la tlai lo ve.

Mipui rawngbawl tura inpe kan force mi, inlungling tak takte pawh hi hmeh mih an ngai ta. An nihna an hai zo tawh a, civil mi laka hleihluak taka an che ṭhinte hi a khamawm tak zet tawh a ni. Siam ṭhat tûr a va tam em.

Kan politician pumpui lian tak takte pawh hi hna thawh kawr ha tura kan tirh liam a ngai. Mahni tuh loh rah seng tum reng renga phusate pawh an hmaah darthlalang hûnsak ila, chhungkua hlawh phu lova khawsak sangte pawh hnuh hniam an nih theih nan, an eirukna hai lansak ila. Hetianga hma la tûr hian mi dikte tân khua kan la tlai lo ve.

- Zothansanga, Chhiahtlang Kawn Veng, 9612333536