I BEIDAWNG EM NI?

Mi zinga awm pawh nuam i ti lo a, hlim hmel i hmu peih mawlh lo a nih kha. Mahnia i awm lahin i vanduaina ringawt i ngaihtuah a, i rilru a kal bing ngut ngut bawk si. I hma lam hun a thim lam hlir i ngaihtuah vak vak a, mite aia vanduai bik riaua inngaiin i harsatna tawh chu kiang thei tawh lo turin i ngai a nih kha. Mite awm dan leh nunphung i han en ṭhin a, an vannei bik riauin i hria a, harsatna leh buaina nei ve mang lovin, tluang takin hun an hmang bik emaw i ti a; engthawl takin mite chu an awm thei bik a ni si a, tiin i ngaihtuah a. Eng vanga vanduai bik nge ka nih tiin i lung a awi thei mawlh lo a ni. Khawvelah hian piang ve lo ila ṭha tur titein i ngaihtuah a ni maw; dam man pawh awmin i hre lo a ni. I phurrit tak hi hrethiamtu che an awm lovin i hre tlat a, hriatthiampui tur chein tu hnenah mah i sawi ngam si lo va, tiraw.

A nih leh, tunah hian i beidawng viau a, nang ang hian tute hi nge beidawng ve ṭhin. I beidawng hi i thiam loh a ni em? Nang ang thoa beidawng vete chu eng vanga beidawng nge an nih ve le? Khawvelah hian tute nge beidawng ve ṭhinte chu i hria em? Ka hrilh ang che.

He khawvelah hian mi beidawng ṭhinte chu mi pangngaite an ni ber a, mi beidawng ngai lote chu mi ang lote an ni asin. Mi beidawng ṭhinte hi hmasawn tuma ngaihtuahna thui tak nei ṭhinte an ni tlangpui a, dinchhuah tuma rual elna nei mi an ni tlangpui ṭhin. Chuvangin, tuna beidawng taka i awm hi inthiam lo duh reng reng suh ang che, mi pangngai, rualelna nei mi i nih vang a nih kha. Beidawng miah loin awm ta la, mi pangngai i ni dawn lo tihna a ni.

Chuvangin, unau duh tak, nang chu mi pangngai i nih avangin hma lam pan zel i duh a, thil tum leh ruahmanna ṭha tak tak i nei a, chu i thil ruahhman chu tihtihlawhtlin i tum a, i bei a. I hlawhtling nghal loh avangin i beidawng a nih kha; i bei a dawn avang khan thiam lohna pakhat mah i nei lo e.

Chuti chu, mi dang beidawng ve ṭhinte chu eng thil vanga beidawng ve ṭhin nge an nih le? Beidawn chhan chi hrang hrang a awm. Tlangval pakhat ruihhlo ngai pawh, ruihhlo a tih ṭhin sim tumin camping-ah vawi tam tak a lut a, chhanchhuahna home-ahte a awm zak zak a, ruihhlo a tih loh chuan a taksain a tuar bawk si a. Nimahsela, ruihhlo ngaia thih ai chuan, ‘Ruihhlo sim a tuma a thi’ tih ka duh zawk tiin a bei ta a, a sim thei ta a ni. Tunah hian kohhran upa hial a ni tawh asin.

Hmeichhe tleirawl hmelṭha deuh mai pakhat pawh hi tlangval pakhatin a bum a, a chetsualpui a, a rai ta hlauh mai a. A tlangval lah chuan a ngaihsak zui duh si lo. Chu nula tleirawl beidawng chu intihhlum hial a duh a, a inngaihtuah nasa em em a. Ka intihhlum chuan chatuan hremhmunah ka kal ang a, ka chhungte an zak bawk dawn a ni, tunah hian a duh duhin min hmmusit rawh se, tiin a bei let ta a. A nau pai chu ṭha taka chawi tleiin, amah phawhin pasal ṭha tak sawrkar hnathawk ofticer a nei nghe nghe a ni.

Sikul naupang pakhat hi kum tawp exam-ah a pass loh avangin a ṭhiante’n an hmuhsit hle mai a, a beidawng chu sikul kal tawh loh a rilruk hial a. Nimahsela, a pa'n a remtih loh avangin a kal leh hram a, nasa zawka zirin Mizoramah pakhatna a ni hial a ni.

Patling pakhat chu a beisei anga a fate an awm loh avang leh a duh anga an chhungkua dinhmun a siam rem theih loh avangin a nun a beidawng em em a. A beidawn avangin zu a in ta ṭhin a, chu chuan a beidawnna chu a tiziawm miah lo va, a zual zapui vaihlenhlo an tih ang maiin beidawnna khur thuk lamah a hruai lut ta zel a ni.

Nu pakhat pawh a pasalin zu leh ruihhlo a ti nasa mai a, a beidawng chuan a pasal chu ṭhen mai a rilruk a. Nimahsela, an inneih thutiam a hre chhuak a, a ṭhen ta lo a; a pasal chuan a nunte simin kohhran hruaitu hial a ni leh ta a ni.

Nang pawh chhiartu duh tak, tunah khan i beidawng hle a ni mai thei. Amaherawhchu, beidawnna hi inhnehtir lul suh aw. I hma lamah eng thil ṭhain nge hmuak che i hre si lo va. Beidawnna hi a hmang thiam tan chuan hlawhtlinna kawnga min hruaitu arsi eng mawi tak ang a ni a; chawimawina parṭhi leh lallukhum kan dawnna tura hmangaihtu pa rorum tak a ni si a.

- Hausanga Hauzel