Deficit school-a thawkte fimkhur rawh se

Themtleng tê zawk ang maiin han inrawlh ve leh ṭhin ila!

Mizoram sawrkar hnuaiah hian deficit school a la awm nual a, kohhran sikulte an ni ber. Sikul dinna pawh rei tawh tak tak an ni hlawm a, changtlung tak tak, zirna lamah pawh Mizorama a ṭha ber berte leh a ṭha pawlte an ni a; Mizoram tana mi pawimawh tak tak lo chher chhuak tawhtute an ni.

Hun rei tak chhung chu kan sawrkar hian deficit-a dah thar a nei tawh lo a, a awm tawh sate erawh deficit-ah a dah ta reng thung a. Tunah hian deficit school hi 27 (M/S 10, H/S 10 leh HSS 7) an awm mek a ni.

Deficit school-a thawkte hi sawrkarin hlawh a pe a, sawrkar sikul (provicialised school) an tlukpuitea zirtirtute hlawh ang zat a pek bakah, hamṭhatna dang chi hrang hrang a pe tel a ni. Sawrkar hnathawk dangte ang thoin Election kaihhnawihah pawh deficit school-a zirtirtute chu hman an ni ṭhin a, booth level officer-te pawh an ni ṭhin. Mizoram Universal Healthcare Scheme (MUHCS) atan pawh an hlawh aṭangin pawisa 'cut' ṭhen a ni bawk.

Heng zawng zawng ngaihtuah hian, deficit school-te hi kohhran enkawl niin, sawrkar sikul ni lo mah se, thawktute hlawh leh hamṭhatna zawng zawng sawrkarin a pek, sawrkar hnathawk dangte ang thoa a enkawl an nih avangin, eng emaw chenah sawrkar hnuaiah an awm a tih theih ang. Sawi uar dawn phei chuan, sawrkar hnathawk ang tak tak an ni ber.

Sawrkarin an hlawh a pek miau avang hian deficit school leh thawktute lakah hian sawrkar pawhin beiseina a nei sang ang tih a hriat a; mimal/kohhran sikul (purely private) zirtirtute lakah ai chuan beisei a nei sang hle ngei ang. Hei hi a âwm em em bawk a ni.

Hetiang a nih lai hian, deficit school-a thawk mi ṭhenkhat chuan sawrkar mitmei an véng lo hle niin a lang. A bik takin social media-ah hian deficit school-a thawkte zingah sawrkar sawiselna lam hawia thil sawi ṭhin te, sawrkar dodalna ang zawnga ngaih theih leh, chutiang zawnga mi dangte fuihpawrh zawnga chête an awm ṭhin niin a lang tlat.

Hlawh min petute mipui vantlang hriata sawisel vak vak hi mi pangngai tan chuan tih loh tur chi a ni. 'Sawrkar sikula thawk kan ni hleinem' ti ni âwm fahrana social media-a sawrkar sawisela dem ṭhin hi deficit school-a thawkte tih âwm loh tak a ni. Zirna lamah sang viau mah se, mahni nihnaa chian lohna leh mâwlna chi khat a ni a, rinawm lohna a ni tel bawk.

Chuvangin, deficit school-a thawkte hi social media-ah an insûm a ṭha. Mahni chhia leh ṭha hriatna hmangin an tih âwm leh tih âwm loh an thliar thiam a ṭha khawp mai. Sikula hotute leh sikul neitu kohhran hruaitute pawhin an en ngun a, an thunun deuh a ṭul–kohhran ai mahin, sikul hotute mawh a ni zawk mah ang.

- Zoramchhana