Dichotomy buaina: Ronaldo nge Messi?

Thu hma

Mizote football league ngaih hlut em em English Premiere League (EPL) lamah ropui takin Arsenal an champion hnuah, World Cup Football thliin min han nuai ṭha ve leh a. Infiamna zawng zawngah football hi a hnam angin kan ngaihsan bik avangin World Cup pawh kan ti mai mai lo hle! Mizoram sorkar pawhin final tuk kha chu ram pum chhuṭi a ni tiin chawlh a puang hmiah mai a nih kha.

Mahse, heng zawng zawng aia Mizoram football titi luah bertu erawh ‘Ronaldo nge Messi?’ tih hi niin a lang. Football inkhel thiam lem lo, football la thutak em em lo pawhin Messi emaw, Ronaldo emaw, tu emaw zawk zawk hi an lo ṭan viau zel mai a. Football aiin anmahni pahnih hian titi an ti tam zawk hial mai awm e. Mizorama lo haw changte hian zirlai zingah thu ka sawi ṭhin a. Naupangho tan zawhna hun kan hawn hian a tawp lamah, ‘Messi nge Ronaldo?’ tih hi fiamthu ti tak deuh siin min zawh an ching ṭhin. An pahnih hian thiam viau mah se, hetiang ang zawnga ngaihtuahna sen nasat lutuk hi a hrisel lo ve thei viau a. Tun ṭum chu hetiang lam hawi hi rawn ziah ka tum dawn a ni.

A kaikuang – Aristotle

A hmasain dichotomy awmzia sawifiah hmasa dawn ila. Dichotomy chu thil nihna leh nih phung (category) inang lo sawina a ni a. Entir nan, thil lan dan (colour) sawi dawn ta ila ‘a dum emaw, a var emaw a ni’ han ti ta ila, hei hi ‘a dum a var dichotomy’ chu a ni tihna a ni. Entirna pek tur a tam mai – dik leh dik lo, fel leh fel lo, lei leh van, on leh off, leh a dang tam tak. Heta thil nihphung leh nihna (category) hi Aristotle khan a ngai pawimawh hle a, thil sawifiah nan a hmuchhuak a ni ber mai.

He category aṭang hian law of non-contradiction leh law of excluded middle, philosophy leh science zirna inghahna pawimawh tak a hmuchhuak ta a. A tawi zawngin, chu chu dichotomy lo chhuahna pawh a ni ta chiah a ni. Hemi law pahnih hmang hian thil ni kawp thei ngai lo tur, thil hrang hlak – rin chhinna (proposition) kan pek pawha a dikna lo chhuak inang thei miah lo ang chi kha kan nei ta a ni. Entir nan, room chhungah bulb pakhat kan chhi a, room chu a ên loh chuan kan off tihna a ni a, a ên erawh chuan kan on tihna a ni thung. Thil ni thei pahnih chauh, inang miah lo a awm a, hei hi dichotomy kan tih chu a ni mai.

False dilemma

Dichotomy hian harsatna lianpui a nei a, chu harsatna chu he false dilemma hian a rawn hrilhfiah ta a ni. Entir nan, kan bazar a, in lamah kan let ta a. In kan thlen hma chuan kan in kawngkapui chu a inhawn loh pawn a inkhar ang tiin kan ring lawk thei. Chumi awmzia chu, kan va en hunah kawngkapui chu a inkhar lo a nih chuan a inhawng dawn tihna a nih chu. Mahse, kan va en chian chuan kawngkapui chu degree 10 chauhin emaw, degree 5 chauhin emaw a lo inkau thei tlat. Chumi awmzia chu a inkhar chiah lo va, a inhawng chiah bawk lo tihna a nih chu. Helaia inhawng leh inkhar chauh awm thei emaw kan tih lai hian, a inkarah thil ni thei tam tak a lo awm reng a – hei hi false dilemma (emaw false dichotomy) kan tih chu a ni ta a ni.

Hei hi kan hrethiam em aw? Tui hi chawhtawlhah han dah la, i ṭhianpa kha a vawt nge a sá tiin a rintir chhin teh. I ṭhianpa khan duh thlan tur pahnih chauh a nei emaw kan tih lai khan – a inkarah duh thlan tur tam tak a nei thei ṭeuh a ni. A vawt lo a, a sa lo, a lum pep pep tih chauh pawhin a chhang thei che. Tui kha a vawt emaw, a sa emaw chuah ni thei anga va ngaihna kha false dichotomy chu a ni ta a ni.

Messi nge Ronaldo?

Aristotle-a law leh false dichotomy ka ziah aṭang hian ka sawi tum i tinzawn thiam em? Ngun taka i chhiar chuan, Ronaldo nge ropui zawk Messi tih te, Messi nge thiam zawk Ronaldo tih te, leh Ronaldo nge hlawhtling zawk Messi tih te hmanga rin chhinna kan siam zawng zawng hi a chunga kan sawi false dichotomy kan tih ang khi a ni ta vek tihna a nih chu. Chumi awmzia chu, dichotomy-in buaina (problems) leh ṭhat lohna (limitation) a neih zawng zawng a khar chhawng ve vek tihna a nih ber mai. Hetiang chauha thil ngaihtuah hi a hrisel loh em em chhan pakhat chu – zau tak leh chîk takin thil ngaihtuah a tiharsa ṭhin a ni.

Entir nan, Messi nge ropui zawk Ronaldo han tih hian, tu zawk nge ropui tihah chauh khan kan rilru kan pe ṭhin a, a inkarah leh a behbâwmah thil tam tak a awm thei tih kan hmu fiah thei ṭhin lo. Ropui chu eng tia teh tur nge tih te, footballer ropui nih theihna eng nge ni tithe leh a dang tam tak kan zu chîk tawh lo ṭhin a. Tu nge thiam zawk tih zawhna pawh hi a ni tho. Thiam tehna eng nge? Thiam ber nih theihna tehkhawngah eng nge hman tur? Zawhna tam tak a rawn lang zung zung a ni. Kan thil thlir dan, pawm dan leh hmuh thiam dan a rawn hruai kawi nasa hle tih pawh kan hrethiam thei ang. Heta ṭanga chiang em em mai chu – dichotomy hmang chauha thil kan thlir chuan kan thil hriatthiam dan kha a rawn sâwr zîm nasa ta em em a ni. Sawi dan dangin sawi ta ila – kan thil hriat a tihtawi phah pawh kan ti thei ang chu.

Dichotomy taka ngaihtuah lovin, awmze nei zawka thlir dan tur ṭha pakhat chu – an football zinkawng zir chian a, hriatthiampui hi a ni thei ang. Ronaldo chu taima, tumruh, fuat ngah, training nasa, practice reng peih, insûmthei, in-discipline em em angin kan hmu thiam thei ang a; chungte chuan football khawvelah ropui takin a rawn vawrh chhuak a ni. Messi ve thung chu talent nei ṭha, pianken thiamna nei, che rang, creative, ball thiam, thil man chak em em angin kan hrethiam ve thei thung ang. Ronaldo ang thoin ani pawh heng avang hian football khawvela hlawhtling berte zingah kan chhiar ve theih phah a ni.

Mahse, hetah pawh hian taima leh talent nei ang chauhin kan la thlûr bing leh thei. Hei pawh hi false dichotomy chi khat a la ni tho. Chuvangin, talent leh taimakna chuan an chenna environment chhungah, an club football ecosystem chhungah eng tiangin nge nghawng a neih tih kan zu zawh tel a pawimawh dawn tihna a nih chu. An mihirng mihrinna (personality) te, an chhungkaw background te, an pianna khua leh ram thlengin, chu taimakna leh talent chuan engtin nge hetiang ni thei turin a puih tih kan inzawh a ṭul dawn a ni. A tawi zawngin, heng zawng zawng kan inzawh a, chîk takin thil ni thei zawng zawng (nuance)-te kan khawrh chhuah vek hnuah chuan Messi pawh a lo taima tho a, Ronaldo pawhin talent a nei ṭha em em tho a ni tih kan hmu thiam thei ang.

Lei leh vân false dichotomy pawh hi

Lei leh vân false dichotomy hi Mizo Kristiante chauh ni lo, hnam dang pawhin an buaipui viau a. Mahse, Mizote hi a buaipui nasa pawl leh a nghawng nasat ber kan ni hial awm e! A tawi zawngin, kan Zosap missionary lo kalte kha theologian an ni vek lo a, a ṭhen chu zirtirtu te, a ṭhen chu damdawi lam thiamte an ni ve nawk a. Pathian thu (theology) kha a chin chhuahin min hrilh thûk bik lem lo. Chuvangin, theology kan hriatthiam dan tlanglawn tak pakhat pawh – lei lam thil leh van lam thil ṭhen hran phawkna hi a ni.

Lei lam thil chu chhe thei, tlo lo, belh tlak loh – sual leh ramhuai thil angin kan ngai a. Van lam erawh chhe thei lo – Pathian nena kan inzawmna, hlim tawp hlau lova kan chenna tur angin kan hrethiam daih thung. Hemi avang hian lei lam thil angah kan nem kai tawh hi chu kan ngai pawimawh thei lo. Entir nan, kohhran treasurer chuan kohhran sum chu rinawm takin a vawng a, mahse, office lama a sum vawn chungchangah erawh a rinawm lo viau thei. Biak In chhung thil chu vanram nena inzawm anga kan ngaih avangin kan ngai pawimawh a, mahse, a compound pawna thil awmte erawh eng atan mah kan ti lem lo a ni. A chhan ber chu lei leh van dichotomy hian kan thil hriatthiam dan a rawn hruai kawi nasa lutuk a ni.

Ringtu ṭha tak ni turin kan hnaah rinawm a ngai tel tih te kan hmu thiam lo va. Tin, kan ni tin nun leh vanram nun a inzawm a ni tih pawh kan pawm thiam lo tihna a ni ber mai. Vanram leh lei inkarah hian Kristian nun pawimawh tam tak a awm a ni tih pawh kan hre lo tihna a nih chu. Chuvangin, sorkar leh kohhran tarmit aṭang chuah thil hmuhfiah tum te, rau leh khawvel (rau lo) thlirna tlang pahnih aṭang chauha hriatthiam tum te hi a fuh lo thei viau a ni.

Tlipna

Ziah tel tur a la tam khawp mai! Fel leh fel lo (sual) chauha mi va hmuh tum tlatna te pawh hi thil ṭangkai tak a ni ber lo khawp mai. Hemi avang hian kan dan siamtute pawh, damlo kan taima, mitthi rál taima an nih chuan MLA ṭha angin kan chhuah leh mai zel ṭhin a. Ram tan hna an thawk tak tak em tih lam kan ngaihtuah thleng pha tawh lo ṭhin! Hengte hi thil pawi tak a ni. Mahse, kan sawi vek seng lo ang. He article kaltlanga ka lo sawi tum ber chu – thil nihna leh kalphung hi thil ni thei pahnih hmang chauhin thlir tam lo vang u tih hi a ni. ‘Ronaldo nge Messi?’ tih pawh hian Mizote zingah thil pahnih ni thei hmang chauha thil thlir a tihluar niin a lang. Kan fimkhur a pawimawh awm e.

- Dr. Krista Roluahpuia, IIT Gandhinagar