STATE RALMUANG BER
Chapo lam thu ni lovin, Mizoram hi India rama state ralmuang ber kan ni kan ti thin a, hei hi Pathian hruaina a ni tih pawm ila.
Kum 20 chhung rambuaiah kan awm a, a hrehawmzia kha. Road/ movement permit neih ngai, curfew leh kuli hrehawmzia hre pha lo ṭhangthar tam tak kan awm ta. A hrehawm ber chu khaw sawikhawm kha a ni. Chuvangin, remna hlutzia hi sawi thar leh thin a ṭha a ni. Kei hi naupang/tleirawl chauh nih laia vai sipai velh lo tawk tawh leh ka pa hrisel loh vanga kumtlinglo chunga vawi hnih kuli ka ni a, vai sipai thuam phur leh MNF ration phurin.
Kum 1986 June ni 30-a India sawrkar leh MNF te inremna kha kei chuan a chhan pui berah kohhran hote ṭawngṭaina rah ka ti ṭhin. Rambuai nasa taka kan tuar hnu kha chuan Mizoram political party hrang hrang khan remna leh muanna kha policy pui berah an nei deuh vek a. Chutihlaiin MNF lo do pawl pawh an lo awm ve leh deuh tho. Remna kan neih theihna atan khan kohhran hruaitute, khatihlai kha chuan Synod leh Baptist hotute khan theihtawp an chhuah a ni.
Mizote hi eng kan ti nge, inchawimawi hi kan thiam tawk lo deuh tlat mai a. India leh MNF inremna kha Mizoram Peace Accord tih a ni khan ka hria a; Sapṭawng chanchinbuahte khan Mizo Accord ti khan an ziak niin ka hria. Remna kan neih aṭanga state ralmuang ber tih theih kan lo ni ta hi a lawmawm a, ngaihlu ila, hruaitu hlui tu tute emaw a mawi lo zawnga sawi hram tumte hi sim ila. Entir nan, independence an sual hleinem tih te, a kian lo, a tawlh hrut, etc. tih ang vel hi ching tawh lo ila, kan hotu hluite hi zah thiam ila a ṭha ngawt ang. Remna Ni, June 30, 1986 khan Mizorama biakin zawng zawngah lawmthu sawi ṭawngṭai kan nei mup mup a nih kha.
Kan hotu, party hrang hrang hruaitute hi an thu leh hla kan ngaihthlak tam berte an ni a, anni ho hi ṭawng uluk se la a ṭha hle ang. Bible-a hotute nena inhmehbel pawh hi kan uar mah mah deuh a ni. Kan zah em em kan CM hmasa pakhat khan Sinai tlanga thuthlung la tura kan thang laiin Arona hovin sebâwng no in lo bia, ti deuhin a sawi a. MLA pakhat mual liam ta pawh khan Alpha leh Omega a inti a, tunlai hian Mosia ang ziazang deuhvin tu emaw hi kan picture leh deuh em aw ka ti.
Kristian vek kan nih avangin kan political party te, politician-te pawhin Bible thu kan leklam nasa hle. Pathian leh kan ram tan tih te, rorelna dik chu lupui angin luangin luang se, tih te, politics-a Pathian ram thlentir tihte kan thupui hi a ṭha hle. Chutihlaiin, heng kan thupuite hi kan la urhsûn tak tak em le? Kriatian kan ni bawk alawm, a âwm e, tih theih a nih laiin, a thawk a phita Pathian thu hman lutuk pawh hi sim ila, Bible-a hruaitu tu emaw anga in 'picture' te pawh hi kohhran hian khap ila a ṭha hial ang em le?
- Rev. Lalbiaksanga Chinzah