MHIP-te’n an ti dik tlat mai

Chanchin thar aṭanga kan lo hmuh danin, ni 6.8.2026-a MHIP-te'n thu thar thehdarhtute an kawmnaah, indeusawh nana hmeichhe thawmhnaw hman an duh lo thu kan lo hria a. He thu-ah hi chuan kan hmeichhe hruaitute hian an sawi dikin a lang tlat mai. Mi ṭhenkhatte'n kan CM hi dawihzep an ti emaw, huaisen an ti emaw chungchang chu kei, eng party mi mah ni lo hian sawi zui ka tum lo.

Keini Mizote'n tun hma aṭanga dawihzep entir nana hmeichhe pawnfen kan lo leklam viau ṭhin hi chu a fuh lo rêng a ni. Dawizep entir nana pawnfên han leklam êm tur chuan Mizo hmeichhiate hi hmakhawsang aṭangin hmeichhe dawihzep an ni ngai lo. Pathianin duh taka a duan angin mipa kawppui turin nû hnâpin an awm a ni zawk; hei hi dawihzep tihna a ni lo va, mipate’n kan lo hre fuh loh zawk a ni.

A nihna takah chuan, Pathianin kan nihna tur dik tak anga min duan anga mipate nena inkhaikhin ralah phei chuan, Siamtu'n a duan ang aiin (a duan dan pawh chu a lo ni mahna) kan hmeichhiate hi an huaisen zawk tia sawi ngam a ni–Lalnu Ropuiliani. Tunlaiah chuan state pawn leh India ram pawn dai dar thu-hla chen hian.

Pathianin kan nih dan tur dik taka a duan anga chhût chuan mipate hi nêp viau zawkin kan lang em? Lal (chief) mumal tak kan neih ṭan, Zahmuaka aṭanga vaiin min hneh tak, 1890 inkar vel kha mipate kan ropui lai ber a ni ang em? Ralthuam neih ṭhat lamah te, ral do tam lamah te, hausak lamah leh kawng hrang hranga British kha an chungnun zawk avangin, 1890-ah Kumpinu hnuaiah kan lo awm lo thei ta lo a ni.

Hun a kal zel a, kan pipute nena inkhaikhina râlah chuan kan lo hausain, lehkha kan lo thiam a, kan lo ṭhahnem ve ta zawk hle. Heti chung hian mipate hi kan ram area veng him zo lo, inti-mipa tak si kan ni fai ta vek zâwk em? Kan hmeichhiate veng him zo lo kan ni tawh em? Ruihhloa sumdawngte hlauh loh kan ni em? Kum 1890 hma lamah kha chuan a mi chengte pawh kan la hlang ṭha khawp mai a, hnam ziarâng leh nunphung pawh a la mawi. Kan pasalṭhate ramri sah pawh a la zau ṭha hekhawk hle. Tunah chuan kan buaina chin hi zim ta hle, e.g, Vairengte area-ah leh a dangteah a ni ta zawk em? Mipate hian ṭan lak kan va ngai teh lul êm!

'Mi dawihzepte' koh el nana ‘Pawnfên feng rawh’ tih emaw, pawnfen infêntir emaw hi pipute aṭanga tih dan phung kan hnâwl a ni lêm lo a; mahse, a lo ṭha lem lo. Hei ai hi chuan (figuratively), "I puan ven kha paih rawh," tih emaw, (ringtute tihah a mawi lo nâin, a lema entir lo thei lo tlata inhria kan nih tlat erawh chuan) puan ven sa inpawh thlaksak lai anga a lema entir te emaw, kawng danga entir emaw hi a ṭha zawk tawh ang em? Engpawhnise, indeusawh hrim hrim a thu emaw, a lem nêna entîr emaw hi kan Lalpa Isua chanchin ṭha nen a inrem lo a, chin loh theih a ṭha zawk hle.

- Dr J.T. Vanlalngheta, Writer's Lexis & Law