Memorandum of Settlement 1986 leh ILP (BEFR 1873–Adaptation of Laws Order 1950) (Dan leh thuneihna inkar thlirzauna)
Mizoram Chief Minister thusawi zûlzuiin mipui leh political analyst-te zingah Memorandum of Settlement 1986 leh Inner Line Permit (ILP) hman dan chungchangah ngaihdan hrang hrang a chhuak zui a. Mipui tam zawkin Remna Thuthlung kan hmuh dan leh India Constitution (Danpui)-in a phuar dan inkar tak hi kan hriat fiah tawk loh ber a ni awm e. He thil hi neutral tak leh dan (Constitutional law) tlawhchhana kan thlir chuan, hetiang hian fiah takin a tarlan theih ang.
Remna Thuthlung (Para 4) leh Article 371(G) Thuneihna:
Mizoram Accord 1986, Para 4 hi India Constitution-ah Article 371(G) angin seng luh a ni a. "The Mizoram Government shall have the power to make laws for the peace and good government of Mizoram with respect to religious or social practices of the Mizos, Mizo customary law and procedure, administration of civil and criminal justice involving decisions according to Mizo customary law, ownership and transfer of land, and other matters," tiin a inziak a ni.
A awmzia tlangpui chu, Mizoram sorkar chuan Mizo sakhaw biakna, khawtlang kalphung, Mizo Customary Law leh ram neih leh insem chungchang (land ownership and transfer)-ah Parliament dan (Central law) reng reng Mizorama hman a nih dawn leh dawn loh thu hlaah dan siam theihna (veto power) a nei a ni, tihna a ni. Mahse, hetah hian thil pawimawh tak kan hmaih thian miah loh erawh chu–border control, citizenship, passport leh Foreigners Act te hi India Constitution hnuaia Union List (Central)-a awm vek a ni.
BEFR 1873 (Adaptation of Laws Order 1950)
'Consult' leh 'Consent' inkar: Inner Line Permit (ILP) hi Bengal Eastern Frontier Regulation (BEFR), 1873 hnuaia hman a ni a. Hemi Regulation hi Union Government (Ministry of Home Affairs) hnuaia Central Act a ni. Article 371(G) nen thlun zawm phêt tum tur a ni lo.
Remna Thuthlung khan Mizo khawtlang nun leh ram chungchangah state thuneihna sang tak min pe a; amaherawhchu, ILP/BEFR regulation hi Central law a nih tlat avangin, State Government hi a consult (berâwn) tur a ni a, consent (a tawp thlenga thutlukna siamtu/veto power) tia ngaih bur tur a ni lo thung. Chuvangin, Chief Minister-in he thil a sawi chhuah hian Remna Thuthlung a hnualsuatna ni lovin, Constitution hnuaia kan dinhmun dik tak (Constitutional realism) a sawi chhuahna a ni zawk.
Mizoram hi kum 1972-a union territory kan nih leh 1987-a state puitling kan nih thleng khan BEFR 1873 (Adaptation of Laws Order 1950) hnuaia Inner Line Permit hi ram chhung ven him nan kan hmang zui reng a. Chuvang chuan, BEFR 1873 hian ILP lung a phûm a, Adaptation of Laws Order 1950 hian Independent India leh Mizoram thlengin, Indian citizen-te laka sovereign legal protection nei turin a rawn din thar leh (adapt) ta a ni.
Thuthlung tichak tura hmalak dan tur (ka ngaihdan)
Accord hi vawiin thlenga kan Constitution hungna pawimawh ber a ni a, mahse, changtlung zawk leh chak zawka kan hman zui theih nan engtin nge hma kan lak ang? Hei hi a thusawi kan khel zui tâka kan Chief Minister point lian ber a ni.
Article 371(G)/Legislation nawr: Central sorkar nawrin ILP/ BEFR 1873 atan hian Mizoram State Assembly-in a duh anga ruahmanna a siam theih nan leh 'consent' tling zui tura Parliament-a amendment nawr kan mamawh.
Special Rules Frame Framework: State sorkarin Union Home Ministry nena inbiakna neiin, ILP pek chhuah leh a enpui hna zawng zawng hi State Cabinet thutlukna thlazar hnuaiah liau liau a awm theih nan executive order/rules chak zawk siam a ngai.
Concensus creation: Mizoram pum–sorkar, opposition leh civil society (NGO)-te inlungruala Delhi-a he issue hi pawm tlanga nawr ho kan mamawh.
Chief Minister thusawi hi Accord sawi hniamna a ni lo va; kan Accord neih sa hi 'Dan anga chak zawk leh changtlung zawk’ (full autonomy on ILP)' ni tura Delhi lam nawr a ngai a ni tih rawn sawifiahna leh thu dik tlang taka puanzarna zawk a ni. Remna Thuthlung hian bul min ṭanpui a, vawiin hian a tak taka chhawm nung a, puitling zawka hman theih tura hmalakna hi Mizoram mamawh ber a ni.
Thil a chìnchhuaka ngaihtuah tluantling duh lo va, total bandh hmanga invau emaw, mipui nunphung tikhaihlak a, thu dik tawk lo hmanga mipuite thunun tum hi puitling taka hmalakna a tling lo. FCAA avanga total bandh kan thlir lêt phei chuan, kha thil khan ni khat pumhlum 'hlohna' bak min thlen hleinem; sorkar leh mipui mimir tan hlohna vek a ni. Leiba hnutchiah a tam teh reng nen hian! A huaihawttute khan, "Total bandh hnuah eng hmalakna hlawhtling nge an neih zui zel?" tih zawhna pawimawh tak hi chhan harsa tak leh an chhan ngam ngai loh tur a la ni fo!
- Thangtea Thawmte