Inkhawm tura kal helmet khum lote
Vanglaini chanchinbuah hian two wheeler khalhtute helmet khum chungchang ka hmu zauh zauh a, article-ah Zoramchhana'n a ziah bakah, a hmain Editorial-ah hial an rawn chhuah tawh. Ni e, helmet chungchang hi sawi a tam a, chutihlaiin two wheeler khalhtu tam tak zawk lah hian Traffic Police awm lohna chinah chuan an khum peih lo tlangpui bawk si.
Nikum 2025 July thla khan zanah social media-ah Khawzawla thil thleng video a darh chiam a. Video-a comment-ah chuan Khawzawl Addl. SP zu rûiin inkhawm kal turte a tibuai a, a power chhuangin man a tum a, inkhawm bâng lam pawh Traffic Police-te ko chhovin a lo dantir a, chuvang chuan ṭhalai an pungkhawm tih a ni, a tawi zawngin.
Kha thil thleng kha an sawi zuinaah chuan, kha Police Officer (Addl. SP) zu rûi khan inkhawm tur two wheeler-a kalte'n helmet an khum loh avangin dan an bawhchhia a, man a tum a, tih te a ni nawk a. Police Officer khan a tih tur a ti a ni, ti zawnga sawi te pawh a awm nual ta âwm e. Inkhawm tura two wheeler-a zinga a tam ber chuan helmet an khum ngai loh thu te, dan an bawhchhiat thu te sawi a tam hle.
Chung thu kal zel nia ngaih theih takin Aizawl Traffic hotu (SP?) chuan LPS-in an kawmnaah ni tain ka hria, Aizawla veng hrang hrangah inkhawm kal turte'n helmet an khum leh khum loh an endik dawn thu a sawi a. Mahse, Order/Notification chhuah erawh a awm lo nge, ka hmu ve lêm lo.
Hei hi a chhan ber nia ka hria chu–Khawzawla inkhawm tur kalte tibuaitu Police Officer rûi chunga duty chhan tumna (dan lova two wheeler khalhte man tum) leh inkhawm tura helmet khum lova two wheeler-a kalte'n dan an bawhchhia a ni tih lan chiantir an tumnaah ka ngai deuh.
Aizawl Traffic SP sawi ang hian kuminah Traffic Police ten Pathianiah Special Drive an nei zauh zauh a. Hmun ṭhenkhatah chuan inkhawm kal tur two wheeler khalh helmet khum lote an man niin an sawi. Helmet khum lo chu man theih an ni miau a, MV Act an bawhchhe miau mai bawk si.
Mahni veng chhunga inkhawm tur two wheeler-a kal, helmet khum lote kan Traffic Police-te'n man tuma an vai duh a nih chuan, an thu a ni a, kan sawi phâk a awm lo. Mahse, an tirêm dawn lo tih erawh ka chiang thung.
Traffic Police an indaih lo va, duty-na âwm takah pawh duty an indah theih loh laia mahni veng chhunga inkhawm tura two wheeler-a kal, helmet khum lote bitum kher erawh a ṭul lem lo. Dan kan lekkawh tak tak dawn a nih chuan, a khalhtu chauh ni lovin, a hnunga chuangte pawhin helmet an khum tur a ni tlat. Hei hi MV Act-in a sawi dan a ni, mahse, Traffic Police-te hian kenkawh an tum chuang lo. An duh chinah dan an rêk bung ve tho.
Heng ka sawi avang hian two wheeler-a helmet khum loh ka sawimawi tihna a ni lo va, helmet khum tura kan innawr dan lai zawk hi a ni ka ziah chhan chu. Dan hi a nihna ang taka lehkkawh a nih dawn chuan two wheeler khalhtu chauh ni lovin, an mi phurhte pawhin an khum tur a ni tlat mai si a. Man tur an va tam dawn tak em! Mahni veng chhunga inkhawm tur two wheeler-a kal, a khalhtu helmet khum lo hi ngaimawh chiam ṭulah ka ngai lem lo ve, kei chuan.
- Vanlalhlanpuia