Ni tla ngai lo

Ni tla tur hi hlimna nge lungngaihna? Ni chuan tlak a tum a, van pawh a sen ruai mai. Mi tam takin an thlir a, mawi an ti em em a, an hlimpui em em. Chutia ni tla mai tur chu ṭhenkhat tan chuan lungngaihna a ni thung; an ui em em a, ‘tla lo hram se’ tiin duhthu an sâm a.

Pa pakhat hi a awm a, a vanglai ní chuan ‘Good morning, Sir’ tia chibai bûktu a tlachham ngai lo. Mahse, natna danglam takin a tlakbuak ta a, damlo khum betin kum khat leh a chanve dawn hun a hmang ta. Doctor ṭha ber ber zinga a ṭha ber chu pan mah se, ‘Lo inring ru’ tiin a chhungte a chah ta daih mai a. Chu thuchah chu ama lakah zêp tum teh mah se, a hre fuh tlat mai si a; a thin a va ṭhâwng em! Chu thu a hriat rûk ni chuan ring sàn vaha tei vawh vawh ṭhin kha kûn ngalin damdawiin khumah a ṭhu nileng ta a. Zan a lo niha a natna a zual chang phei chuan ‘Dam hian awmzia a awm lo’ tiin a inngaihtuah lungpuam fo a, a cabin riahna man to tak chhungah chuan ka Sir ngaihsan em em chu a mal ngawih ngawih ṭhin.

Tlaiah chuan damdawiin pindan chu thisena luan ang maiin ni tla tur chuan a chhun sen vût a, zan hun lo inher chhuak tur chu a huphurh tak zet. A ring chak tawh lo tak chu veilamah herin, tlai ni tla tur chu a en a, ‘Ni angin ka nunna hi a la liam ve dawn si a maw’ tiin a ngaihtuah a; ka Sir ngaihsan em em chu a lungngai a ni. Mahse, lungngaihna karah chuan a rûk têin beiseina chhetê a lo awm ve ṭhin. A taksa thihna hlim kawr ruam zawh mek chuan beiseina a nei ve ṭhin. Eng nge a beisei? Ni tla ngai lo chu.

Chutihlai mek chuan pitar pakhat hi damdawiin kailâwnah a ding lailâwk a, tlai ni tla tur chu a thlir ve a ni. Ka pi chuan a kut dinglamah chuan chawhmeh sarânga fûn tereuhtê tê a khai a, a tláwm tláwm a thlan khawm a ni. A kut veilama a damdawi bûr sen khai chu a fapa mal neih chhun tan liau liau a ni thung a; bûr khat lek pawh chu kar khat thlan tui fara a thawh chhuah man lawih zu nia. Tlai khat chu ‘A to em mai, a tel lova inenkawl dan a awm ang,’ tiin damdawi bûr sen chu a lei lo ve ngawt a, zana a fapa taksa na lutuka rûm vawng vawng chuan a mittui a tifar a, inthiam lohnain a khat a. Chuta chinah chuan a neih zawng zawng bakah, pûk chawpin damdawi bûr sen chu a lei ta char char a. A va lainatawm tak em!

Ka pi chuan beiseina tam a nei ngam tawh lo va, a fapa neih chhun khum beta mu mek kianga nileng zankhuaa ṭhut bak chu tih tur a nei tawh lo. Chutia beisei tur rêng rêng nei tawh lova a vah lai chuan tlai ni tla tur chu a en vawng vawng a. Ni lah chu a tawrhna hrethiam ni âwm fahranin a sen phút mai si a. Hun rei lo te chhung chu beiseinain a thinlung a luah ve a. Ka pi hian a beisei ve a ni, ni tla ngai lo chu.

Chu damdawiinah vêk chuan pindan pakhat hi a ruak huai mai a, ni tla tur chuan khum chu em lum hem hem mah se, tumah an mu tawh lo. A ruak vek a, nunna a awm tawh lo a ni. Chu khuma mu ṭhin chu tleirawl fel em em, ‘Mami hi chu pasal nei atan a uiawm em mai, a nu leh pain an thlamuanpui si,’ tia an sawi malh malh ṭhin a ni. An duatlai Mami chu thih sualin chu khumah chuan ni tam a lo mu tawh ṭhin a, tlai ni tla tur vawi tam lo thlir liam tawhin, zan ṭihbaiawm tam tak a lo sual chhuak tawh. Mahse, duatlai Mami chu a nu leh pa fanu duatlai kha a ni ve tho va, pangchan te a châk ve ṭhin ang em le? Chutia thih sual reng renga zan tin hun hman chu a tlin ta bik ngang lo va, ni angin a tla liam ve ta a ni. Thihna hi a va râwng em!

A nu leh pate mittui a sûr a, an tawrhna hnem tumin ṭhalai pung kawm chu theihtawpin an zai a, ‘Ni tla ngai lo Zion khawpui, ngaiin ka rûm, ka ṭap chhun ni tinin’ tiin. Kan duatlai Mami’n a kalsan tak a nu leh pa chuan an nghakhlel em em a ni, ni tla ngai lo chu.

Kan Mizopui, kan Kristianpui leh kan mihringpui, he lei hringnun kan zawhpui tam tak hian harsatna an tâwk mek a. Dam lohna khuma bet mek te, damlo awmpuia phurrit tak phurtute leh natna vanga hmangaih chân tate hian hrethiamtu an mamawh a – hnemna, fuihna leh ṭawngṭaina tawp lovin an mamawh. Ringtute tih theih ropui ber chu ṭawngṭaisak a ni; ‘Ṭawngṭaina leh dîlna tinrêngin eng hun pawha Thlarauva ṭawngṭaiin’ tih a nih kha.

He leiah hian ni chhuakin beiseina leh chakna thar min pe ṭhin mahsela, tlai a lo ni a, min liamsan leh mai ṭhin si. Kan beisei a, kan chelh thei si lo. Ni anga tihtlakin kan awm a, kan chaknate a thâmral leh mai ṭhin. Kan beisei ni tla ngai lo hi a awm tak tak dawn em ni? Isaia buah chuan he thu hi a inziak a, ‘I ni chu a tla tawh lo vang a, i thla pawh chu a ral tawh hek lo vang; Lalpa chu i kumkhaw êntu a ni dawn tawh si a,’ tiin.

Tlai a lo ni leh a, tam takin ni tla tur chu an thlir leh ta; tam takin hmuhnawm thlirin an thlir a, tam takin an tlak liampui a. Mahse, ani – rinna chelh tlattu tan erawh chuan ni chu a tla ve ngai lo a ni.

- Nick Lalrinmawia