YMA VILLAGE PROFILE (ymavillageprofile.org)

YMA Village Profile hi eng nge ni?

YMA Village Profile hi mumal taka YMA branch huam chhunga chhungkua zawng zawng personal information chhinchhiahna (digital data management system) website/mobile application software ni. Database hi Cloud server-ah host venhimna khauh tak nen host a ni. Sorkar leh khawtlang tan demographic data ṭangkai tak ni thei tura Mizorama tlawmngai pawl lian ber Central Young Mizo Association (CYMA) hmalakna pawimawh tak a ni.

Tu siam nge?

YMA Village Profile hi Mizorama software development company lar tak Lailen Consulting Pvt Ltd ten kum 2024-a an siam a ni a. Tunah hian Tuikhuahtlang, Aizawlah an awm. Lailen Consulting hian software development (website/mobile apps), IT consulting, surveillance & monitoring system, IoT development, network infrastructure development, Cloud hosting-ah service an pe a ni. Tunah hian private leh sorkar department eng emaw zatte nen an thawk ho mek bawk.

Software-ah engte nge awm?

1. He software hmangtute user ID leh password siamna.

2. Branch chhunga section dah luhna.

3. Branch chhunga chhungkaw information dah luhna.

4. Mitthi chhinchhiahna–hming, thih hun, vui hun, kohhran, vuitu, ruang chhuak.

5. Hmun dang aṭanga pêm chhinchhiahna–chhungkaw hotu hming, pem chhuahna branch, pemna branch, pem ni, notes.

6. Sum khawnna, sum khawn tur leh sum khawn report ziah luhna.

7. Branch chhunga mihring cheng zat leh mimal profile (hming, nu/pa hming, kum, phone, Aadhaar, EPIC number) tarlanna.

8. Data dah luh tawhte CVS leh Excel format-a export-na.

Software kalphung

Lailen Consulting hi software thuneitu ber (administrator), software problem fix-tu, a ṭul ang zela update leh database vawng himtu a ni a, banch hrang hrang tan user ID leh password an siam vek. Central YMA hi YMA branch hrang hrangte’n data an dah luh theihna tura User ID leh password petu, awareness leh training petu an ni a, branch data dah luh zawng zawng an hmu thei vek bawk. Kum 2025-2026 hian Aizawl city huam chhung YMA branch an target phawt a, a tahtawlin Aizawl pawn lam pawh an tuam zel ang. Branch tinte’n data an dah luhte reng reng hi internet (Cloud storage server)-ah him taka dah khawm vek a ni.

Tute nge software hmang thei?

Software dangte anga mi nawlpui hman theih a ni lo a, CYMA hnuaia YMA branch hrang hrang hruaitu user ID leh password neite chauhvin an hmang thei. Hemi hmang hian branch tinte hian anmahni huam chhunga section hrang hrang tan user ID leh password an duh zat zat an siamsak thei bawk. Branch dang erawh an khawih thei lo thung. He software/portal hi desktop version leh mobile version a awm. Desktop version hi ymavillageprofile.org aṭangin direct-a hman theih a ni a, mobile version hi Android leh iOS atan a awm. Android application hi Google Play Store aṭanga install theih a ni a, iOS application hi Apple App Store aṭanga install theih a ni. Tichuan, YMA branch hnuaia section-te chuan anmahni user ID leh password hmangin chhungkaw hrang hrang data an dah lut mai dawn a, tihsual a awm pawhin edit theih vek a ni.

A ṭangkaina tur

YMA branch-te’n database kan dah luh ṭheuh chuan Mizoram chhunga chhungkua zawng zawng information a awm vek ang. Mahni branch/veng chhunga chhungkaw zat, chhungkaw member zat, YMA member zat, pem thar, hnam dang awm, mipui eizawnna, mitthi neih zat, etc awlsam takin kan hre thei dawn a. Central YMA leh branch tinte hian statistic mumal tak kan nei thei tawh ang a, Central YMA tan branch statistic lak khawmna pawimawh tak a ni ang. Mizo hnam dang kawppui nei hriat theihna pawimawh tak a ni ang a, raltlan census neihna pawimawh tak a ni thei bawk. Inner Line Permit (ILP) nei leh nei loa Mizoram a rawn lut chhui nan a ṭangkai hle bawk ang.

Tlangkawmna

Tunlai khawvelah database vawn ṭhat a pawimawh hle a, ram changkang leh company liante pawhin an ngai pawimawh hle. Central YMA hmalaknaa YMA Village Profile a rawn piang hi a lawmawm a, database lama hmasawnna pawimawh tak a ni. Hetihlai hian, a hlawhtlinna leh hlawhchhamna hi YMA branch-ah a innghat thui hle. YMA branch-te’n taima taka data an dah luh a, an update ṭhat chuan Mizoram mipui statistic pawimawh tak a ni thei dawn. Nakinah ṭhangthar lehkhathiamte pawhin research data source atan pawh an la hmang ṭangkai thei ang. Kan ngai pawimawh lo a nih erawh chuan sum leh thâ sên thlawnna mai a ni ang.

YMA Village Profile hi computer/smarthphone hmanga awlsam taka hman theih tura siam a ni a, hriatthiam loh kan neih pawhin a zirna video tutorial leh PDF file a awm. Theihtawpa chaka data entry turin YMA branch zawng zawngte’n ngai pawimawh teh ang u; a chhawr ṭangkaitu ber tur chu keimahni branch ṭheuh kan ni dawn si a.

- Er. Chhungpuia Renthlei, Senior Technical Officerṭ, NIELIT Aizawl