KRISTIAN HLA BU 2026 EDITION A CHHUAK TA

Kan nghahhlelh êm êm Kristian Hla Bu phek 776 laia chhah, hla 650 awmna, 19th (Tonic Sol-fa) Edition chu lei theihin a awm ta a, a lawmawm tak zet e.

Kristian Hla Bu chhuak hmasaho kha (hriat theih chinah), 27th Reprint, April 2024 thleng khan phek 682-a chhah, hla 600 chuanna a ni a. Kristian Hla Bu chhuak thar chungchang hi Youtube-ah te pawh a awm avangin tam tak ziah ka tum lem lo.

Ka rawn ziah chhan tak erawh chu, a hmangtute beisei loh lam a ni daih mai. A tawp lama ṭawngṭai dân tur entîrna (sample) 15 awm hi a ni a; ṭawngṭai dan inkaihhruai nan a hlu êm êm mai a; chutihlaiin, bu hmasa lamah kha chuan, ṭawngṭai tih tawp nan "... kan dil e" tih ang chia tâwp hi a ni vek a.

Ṭawngṭai bul ṭan nana 'Pa' kan address hmasa a nih tawh chuan, "... kan dil a che," tia ṭawngṭai(-na) tihtâwp hi a ṭawng inrem dan zawnga chhûtin a dik zawk mai ni lovin, Bible thu nen pawh a inhmeh zâwk êm êm a. Mahse, hetiang hian bu hmasa lamah chuan tihtawp loh vek a ni thung. A bu hmasa lama Lalpa (Ṭawngṭaina leh inhlanna tel lovin) ṭawngṭai tihtawp dan kha a ṭha lo e, kan tihna ni lovin leh, hman dan (usage) ṭha zawk hman loh vanga inthlahrun phah chuang lovin, ringtute chu inzir zel tur kan nih vang zawkin, bu hmasaa mite edit-a tuna chhuak a, "... a che" tih a lo ni ta vek hi chhinchhiahin vawng ila.

Tun hmain Vanglaini chanchinbuah te kan lo ziak tawh a, Pathian biak inkhawma 'Rilru sawi/insawi ṭawm’ hunah te pawh kan lo sawi chhuak ve tawh ṭhin a. Kan ziah vang leh kan lo sawi vang chu a ni hauh lo vang a, hetia ṭawngṭai tihtawp dan ṭha zawk leh biblical zawk a rawn chuang ta hi a lawmawm êm mai a, kan sawi lo thei lo a ni e. Kohhran mite pawhin zawm hram hram kan tum dâwn nia.

Kristian Hla Bu chhuak hnuhnung ber (a thar ber) hi a ram a zau zêl nân Lalpa'n mal sâwm mawlh rawh se.

- JT Vanlalngheta