FCRA AMENDMENT BILL 2026

‘The Foreign Contribution (Regulation) Amendment Bill 2026’ chu a full text ka chhiar chhuak ve hram ta a. Chipchiar lutuk lo deuhin, technical lam pawh sawi tam lovin, sawi hlawh berte ka hmuh dan tlema ka han tuihnih ve ang e. Ka chhiar sual emaw, ka hrilhfiah dik lo emaw a awm thei. A thu inzawmna atana mi tam takin hriat tawh sa sawi nawn lehna pawh a awm nual ang a, chhiartute hriatthiamna ka ngen e.

FCRA-a in-register hi thil har tak a ni a, Congress sawrkar laiah pawh khan in-register duh, nimahsela registration phal loh pawh an awm nual a ni. Tunah phei chu a har leh zual a ni awm e. Global village-ah kan awm mek a, khawvel mihringte inzawmna pawh a awlsam zel a. India aṭanga foreign lam sum thawn duh leh foreign aṭanga India lam sum thawn duhte pawh an pung zel a ni. Mimal sumah chuan, bituk zat aia tam lo foreign sum hmuh chu danin a phal a. Sakhua pawl, school, hospital, orphanage, NGO leh pawl dangte erawh chu foreign aṭanga sum an hmuh duh chuan FCRA registration neih a ngai a ni. Chuvangin, FCRA registration neih chu foreign aṭanga ṭanpuina dawng ṭhin sakhua pawl leh pawl dangte atan chuan thil hlu tak a ni.

Pawlte chuan foreign aṭanga sum an lak luh theih dan kawng pahnih an nei. A pakhatna chu sum lo luhna (source) leh a hmanna tur duan sa chi a ni a; hei hi chu FCRA registration neih kher loh pawhin vawi khat atan Central sawrkarah dil chi a ni a, dil zel theih a ni. A pahnihna chu source hriat hmasak ngai lo leh a hmanna tur duan hmasak ngai loh chi, FCRA tih hi a ni a. Sum hmuh hunah erawh chuan a source, sum hmuh zat leh a hmanna kimchang chu chartered accountant audit report hmangin sawrkarah thehluh ṭhin tur a ni.

FCRA kaltlanga foreign sum hman phal lohna pawh sawrkarin chiang takin a tarlang a, hetiang hian FCRA sum hman phal lohna chu a tlangkawm theih awm e. Politics tihna (political activities), sakhua inlettir luihna (forced conversion), hnam leh hnam inrem lohtirna (communal discord), a pung beiseia sum dahna (speculative investment), mi dangte leh pawl dangte tan foreign sum lak luhsakna (fund transfers) leh administration senso atan 20% aia tam hman (excess administrative work) te an tel. Politics thil tihna atan hman phal lohnaah hian, sawrkar laka helna leh hel pawlte atana foreign sum lak luh pawh a huam ve; he khapna dan hi chu pawm theih lohna tur awmin a lang lo.

Chutihlaiin, kumina FCRA Amendment Bill 2026 chungchanga sawi hlawh ber leh pawm harsa bera lang chu, pawl pakhatin FCRA registration a neih tawh loh chuan, FCRA sum hmanga an ram lei, in sak leh property dangte chu designated authority (thuneihna pek thuneihtu) enkawlnaah a awm ang a, designated authority chuan a âwm bera a ngaih Central/State sawrkar department-ah emaw, local authority kutah emaw a hlan ang a, anni chuan mipui (public) tan an hmang dawn a ni tih hi a ni. Tin, FCRA sum hman bâng a awm chuan Consolidated Fund-ah dah a ni ang a, mipui tan hman a ni ang, tih pawh hi sawi a hlawh ve hle.

FCRA registration hi kawng thumin a tawp thei a. Pakhatna chu, FCRA sum hman phal lohna atana hman emaw, sum hman danah dik lohna hmuh a nih avang emawa sawrkarin a titawp a ni. Pahnihna chu, registration tihnun thar (renew) loh avangin automatic-a tawp a. Pathumna chu, FCRA neih chhunzawm an duh tawh loh avangin mahni duhthlannain an registration an surrender thei bawk. FCRA Amendment Bill 2026 anga kal tur a nih chuan, FCRA suma lei leh sak property-te neih reng theihna tur chuan FCRA registration nei reng a ngai dawn tihna a ni a. Chutihlaia khirh em em chu hei hi a ni: FCRA registration tinung reng tur chuan kum hnih chhungin cheng nuai sawm (Rs 10 lakhs) hmuh reng a ngai dawn a, chutiang zat an hmuh loh chuan an registration chu titawp theih a ni. Kum hnih dana regular taka cheng nuai sawm hmuh reng chu pawl ṭhenkhat tan chuan a har hle ang.

He dan famkim lohna pakhat chu, FCRA tihtawp theihna chhan leh vang pakhatnaah hian, registration titawpsak pawlte’n appeal theihna clause a awm lo hi a ni, ka chhiar danah chuan. Chuan, a hun taka renew hman lote tan pawh renew ṭhat lehna procedure-te hi a khirh hle âwm e. Chuvangin, dan hman sualna tur kawng zau takin a inhawng tlat a ni. Eng emaw chhuanlam siamin, tu pawl emaw chu FCRA sum hman sual anga puh theihna an zawng kual ang a, an FCRA titawp a nih hnuah chuan an property-te chu chhuhsak theih an nih dawn ta a ni. Dik lohna nei lohte chungah chuan hetiang thil hi thleng lo hram se!

FCRA registration tihtawp hnua FCRA sum hmanga an neih moveable leh immoveable property te chu designated authority kutah leh Consolidated Fund-ah dah a, mipui tan hman tur a ni ang tih hi, a tum ber chu–pawl dintu (founder)-te emaw, pawl enkawltute emawin anmahni mimal property atan an lak loh nan leh an insem lohna tura venna ni berin a lang. Chutiang case-te chu khawi hmunah leh eng hunah emaw a lo awm tawh vang pawh a nih mahna. Chutianga case awm theih lakah invenna tura duan a nih chuan, a ṭhatna lai a awm ve a ni.

He dan hnuaia thil laklawh em em nia lang pakhat chu hei hi a ni: foreign contribution leh a ram chhunga (domestic) contribution te hmang kawpa ram an lei leh in an sakte ṭhen hran dan turah hian chiang taka sawifiah a ni lo. FCRA sum eng emaw zat hmanga din school, hospital, orphanage, etc. te chu dissolve a ni tawh a, a function tawh loh chuan, account-a sum luh leh hmanna enin eng emaw chen chu FCRA sum zat a hriat theih ang. Mahse school, hospital, orphanage, etc. te a ding rih a, mipui tan a function ṭha hle rih a nih chuan, FCRA registration an neih tawh loh pawhin mipui rawng an la bawl rih tho tihna a ni a. Chutiang chu nih si, eng vangin nge FCRA sum an hmuhte pek kir vek leh kher chu a ngaih ang, tih hi zawhna lian tak chu a ni.

Tuna Bill awm danah chuan, FCRA hnuaia foreign sum lo hmu tawh sakhaw pawl, school, hospital, orphanage leh pawl dangte chu an rawngbawlna ṭha takin kalpui rih mah se, an FCRA registration a tawp tawh chuan, FCRA an neih laia foreign sum an lo hmuh tawh zawng zawng chu pek kir leh vek a ngai dawn tihna a ni. FCRA sum pek kirna tur erawh chu donor-te hnenah ni lovin, designated authority kutah emaw, Consolidated Fund-ah emaw a ni thung. Hei hi a mak hle. Chuvangin, he dan hi mithiamte duan chu a ni ngei ang a, mahse, chhanna aiin zawhna a titam zawk tlat. Ngaihtuahna zau zawk leh fim zawk hmanga ngaihtuah ṭhat leh a ṭul tak zet a ni.

Worship place (biak in) erawh chu he dan hian a huam lo ang tih a nih leh si a. Foreign sum hmanga biak in sak telin, conversion leh religious activities neiha inpuhna chu a ni lo em ni, thingtlang lam sakhua dang mi ṭhenkhatte chuan Kristiante khinna dik loh (false accusation) siam a, an helna ṭhin ber chu? Ni e, FCRA Amendment Bill 2026-ah hian thil ṭha leh ṭha lo te an inchawhpawlh tlat a ni. He Bill-a worship place (biak in) erawh chu a huam lo ang tih hi exception leh safety clause chu a ni ve hrim hrim a. Chuvangin, he Bill hi a negative vek lo e. He clause aṭanga thlîr chuan, he dan hi minority sakhuate atana dan khirhkhân siamna lam ni lovin, foreign sum hmanna dik lam a kâwk zawkin a lang.

He Bill hi pass ni ta se, Mizorama kohhrante a nghawng tur bik ngaihtuah ta ila. FCRA sum tel vea din school, hospital, orphanage leh kohhran program dangte chu eng emaw avanga an FCRA chu tihtawp a nih pawhin, FCRA sum hmanna tel ve kohhran property leh a program-te chu an la kal zel hlawm tho a rinawm a. Chuvangin, property chungchangah chuan designated authority-te kutah hlan a nih pawhin, Kristiante majority nihna state-a kohhran leh mipui rilru tina zawngin dik lo taka thil an tih a rinawm lo. Chuvangin, hlauhthawnna tur chu tih tehchiamin a awmin a lang lo, FCRA sum hmanna a dik phawt chuan.

He article ziaktu lawina kohhran, Evangelical Church of Maraland (ECM) leh a rawngbawlna pêng hrang hrangte chu foreign puina sum dawng lovin, a tir aṭanga mahni kut leh kea ding kohhran an nih avangin, FCRA Amendment Bill 2026 hian a nghawngna tur a awm ve lo. Chutiang kohhran chu an awm nual a rinawm. Kristiante minority an nihna hmunah erawh chuan, mahni kut leh kea ding thei rih loh kohhran, school, hospital, orphanage leh thil dangte an awm nual rih ang a. Chuvangin, foreign aṭanga puihna dawng mek pawh an awm ang. Chumite atan chuan he dan hian hman sualna leh Kristiante chan a chhiattir theihna kawng a siam thei.

Kohhran chuan sawrkar thil tum leh ruahmanna te pawm theih loh a nei a nih chuan, political party leh pressure group te tih dan anga kawngzawh ve hi kohhran tih dan tur leh kal dan tur ṭha ber a ni ang em tih erawh chu ngaih dan leh pawm dan a inang hlawm lo a ni. Kawngzawh hi thil sual chu a ni hauh lo. Chutihlai chuan, he article ziaktuin kohhran tana tih dan tur leh kal dan tur ṭhaa a ngaih chu hei hi a ni. Sawrkar thiltum, ruahmanna leh thiltih te chu kohhranin ṭha lo nia a hmuh a, a pawm theih loh a nih chuan, political party leh pressure group te tih dan anga kawng zawh ve mai lovin, kohhran a nihna hre reng chungin puitling taka ṭawngṭaina nen sawrkar hnenah thlen (representation neih) a ni. Kohhran chu a danglam tur a ni.

Ni e, FCRA Amendment Bill 2026 hi sawrkar laipui chuan ram tana thil ṭha nia a hriat avanga a duan chu a ni ngei ang a, nimahsela, chhanna aiin zawhna a titam zawk daih a ni. FCRA kaltlanga foreign sum an hmuh hman sualte an awm chuan sawrkarin dan angin action la mai se la. Chutianga ni lo a, sawrkarin dik lohna a hmuh avanga FCRA a titawpsakte chauh ni lovin, a hun taka renew thei lote leh anmahni duhthlanna avanga FCRA registration surrender tawhte thlengin, an pawl leh institution-te chu an la ding rih a, an rawngbawlna pawh a kal ṭha reng chungin, FCRA sum hmanga ram lei, in sak leh property dangte chhuhsak vekna tur dan siam chu thil ṭha ber niin a lang lo.

Chuvangin, Joint Parliamentary Committee (JPC) chuan ngaihtuahna fim tak hmangin, fimkhur takin he Bill hi zir chiang se la, siamṭhat ngaite siamṭha bawk se la; ram tan ṭha ber tur Bill lo chhuahpui se a lawmawm ngawt ang. Misualte laka invenna dan siam hian India khua leh tuite atana thil ṭhate hlohna leh chânna a thlen palh thei tih hi Parliament leh sawrkar chuan hria se a ṭha ngawt ang.

- Laiu Fachhai