Central YMA kumpuan - Zirna uar

Central Young Mizo Association (CYMA) Inkhawmpui vawi 72-na N. Vanlaiphai a October 15-17 chhunga an neih zawh takah chuan CYMA Kumpuan atan zirna uar tih an thlang a. Career kaihhruaina chungchanga CYMA beihpui chhuahna ṭhenkhatah min teltir ve tawh avangin kan ṭhalaite cho phur nana kan lo thawhho tawhna han thlir let hian tun aia awmze nei lehzual tura ram kalpui turin hraw fe a kan chet duhthawhna phen aṭang chuan he CYMA Kumpuan thar hi a pawimawh hle mai a. Kan ram tan kawl a tieng dawn a, beiseina thar a nih avangin a lawmawm takzet a ni. 

Zirna uar han tih hian Mizoram dung leh vangah zirna hi chu kan uar na rawh a. India rama ziak leh chhiar thiam tam zawnga chhut pawhin a pahnihna kan hauh char char mek a ni. Amaherawhchu, kan ramin zirna a uar dan erawh chu enfel ngai a tam hle dawn. ‘Zirna uar’ kan buaipui chhohna turah engtiangin nge kan kalpui dawn? Zirna hian a huam zau a, a hnuh tel hi a tam em em bawk. Kumpuan Zirna uar chuan thil tam tak a keng tel dawn bawk. Tuna kan dinhmun leh awmna aṭanga awmze nei zawka kan inhlankai theihna tur hi nu leh pa te, ṭhalaite leh zirna lam buaipuitu sawrkar leh zirtirtute hi he Kumpuan hmalak chho dan tur leh beihpui chhuah danah zaikhata an kal (common platform) tlan a pawimawh hle mai dawn. ‘Zirna uar’ tih hian a tum ber chu engnge ni dawn le? Zirna kan uar a, kan ngai pawimawh vek lawi si. Keimahni kan chiang em? Enge kan duh? 

Zirna chungchang kan sawi ruala a panga bet ve tlat a awm. Eizawnna kawnga sulsutu a nih miau avangin zirna hi a bulpui a ni a. Tunlaia a thawm kan hriat tam ber zinga mi a ni bawk. UPSC leh Staff Selection Commission (SSC) leh a dang hnuaia hna sang inziak tling leh inhlangkai zingah kan ṭhalaite an thlen ve tak loh chungchanga kan Minister-te leh ram hruaitute au thawm kan hre chamchi ta. Suma ṭanpui tura tawktarh te thlengin 

ṭhahnemngaihna in kan sawi ri ta a. UPSC hnuaia competitive examination beitu lah chu an pung hlei thei bawk si lo. 

Central YMA te nena kan hmalaknaah chuan heng UPSC kher lo, Staff Selection Commission hnuaia hna ṭha tak tak, nakina officer rank la thlen ve mai theihna, hlawh ṭha ve tak si, hnaruak sang tam tak ṭhenawm state-ten an lak suau suau te hi insawi hmuhin kan ṭhalaite chu bei ve tura sawmna te siam a ni tawh ṭhin a.  Staff Selection Commission hna diltu exam beitute state dangah chuan centre pakhat aia tam neih a leng tawk, za tam rualin an beih laia keini centre luah khattu pawh awm mang lo te hi engnge a chhan ni ta ang le? 

Heti taka kan ṭhalaite an tawmim chhan hi engnge ni ang? Kan chhui chet chet chuan puanchhuah em atana tlawm thlak ni si, ‘zirna ṭha’ kan neih loh avanga kan ṭhalaiten heng examination bei ngam lo hi an ni thei em? Mahni inrintawkna tel lo hian kan ṭhalaite hi an thenkual a ni ber mai em? Ram pawna hnathawk tura feh chhuah hi a bik takin kan tlangvalte hian a ngam meuh lo em ni? Tuna kan huntawng kan en hian mahni nih lohpui ni anga lan kan tum a nih chuan hei hi kan inphawrh ngam hun a lo thleng ta a ni. 

Kan ṭhalaite inrin tawklohna hi a veiawm khawp mai. Kan ram hruaituten sum tam tham tak mai tawktarh an duh hial ta hi ṭha­hnemngaihna mah ni se a manganthlak lehling a ni. Thu bengverh pakhat chuan heti hian a ti a: “Sakawr chu lui lai thleng pawhin i kai lut thei ang, mah se, sakawr chu tui i inluihtir thei hauh lo ang” a tih ang deuh hian tumna tak tak nei lo, inringtawk bawk si lo chu competitive exam centre-ah tihtak zeta bei tura hruai luh chu a harsa a ni. UPSC exam beia lo sual ve tawh tan chuan ‘sum lawmman hmanga inthlem’ hi chu a nuihzatthlak em em thung. Hemi kan thlen rual chiah hian kan harsatna bulfukna kan thlir nghal tur, hraw ber chu kan ‘zirna’ hi a ni ngei ang, a dang chu a tesep deuh (pawimawh em em tho)- chhungkaw inenkawl dan te, kan khawtlang nun boruak te leh boruak leng vela thiamna sang ziktluak inelna te hi a ni thei. Heng zawng zawng hi kan chinfel tel loh chuan kumpuan hian awmzia a nei thui hauh lo ang. 

Chhungkaw boruak te, khawtlang nun boruak thawl hulh leh thiamna enghelhna boruak lengvel (academic environment) awm lo lutuk te hi beih hle ngai vek kan harsatna an ni ang. Sawi tur tam tak a awm avangin he thuziak tawite hian a khawrh kim thei dawn lo. A bul thum ber ni a puh ngam chu zirna ṭha emaw zir dan ṭha neih kawnga kan inenfiahna tur tlem erawh chu tarlang ila. Ṭhalaite inrintawklohna awmtirtu lian ber chu thiamna ziktluak lo, chhungrila mimal tinin an pai dawrawm hi a ni fo. Chu thil chu ‘zirna ṭha leh zir dan ṭha’ neite zingah a awm thei lo ti ila a sual lo ang. Chu chhungril inthun khahna chu kan ṭhalaite hian an nei ṭha lo a, an mamawh tih huaisen taka tarlan ngam a ni. 

Kan ram zirna hi zirchiang turin syllabus leh curriculum-ah kan let leh a ngai dawn a ni. Mithiamte hrilhfiah dan chuan syllabus hi zirlaiten an course zir tur subjects te leh subject chhunga a ṭhen hrang (topics) te a ni. A tlangpui taka course-in a khuh kim tur pharhna a ni. Board emaw zirtirtute infawkkhawmin an riruat a ni chawk ṭhin. Kum khat emaw course khata zir tur riruang siamna a ni. Curriculum erawh hi chu zirtur subject bung leh chang aṭanga ṭanin college emaw school a zirlaite course an beih chhunga thiamna a chawmna tur kalphung, chipchiara ruahmanna a ni a, zirlaiten thiamna famkim an chawk chhuah theihna tura anmahni thun khahna leh zeizia (skill) an zirna a ni thung. 

Syllabus hi ‘descriptive’ an ti a, a tlangpui deuh zawi zawi a nih avangin zirtirtuten an kalpui dan a inang thlep thlep lo thei. Curriculum erawh chu ‘prescriptive’ an ti a, a chichiar em em a, zirna khata zirtirtuten an kalpui dan pawh a in man tawn tlang ṭhap tur a ni tiin mithiamten an sawi ṭhin. Zirna inkhaidiat- pawl hniam aṭanga pawl sang zela inthlun dan pawh uluk taka zam a ngai ṭhin a, khaidiat inzawm ṭha lo a awm palh theih avangin tih mai mai thiang lo a ni a, a huam chin pawh a zau lo thei lo a ni. Ram tam takah chuan sawrkar emaw a bika mithiam rual an ruatten an buatsaih ṭhin. Zirlaite thiamna dik taka an chawmlenna hmanrua a nih avangin curriculum hi an duhtui em em vek a ni. 

Entirna pakhat chiah lo zep ila: India ramah hian college ṭha zual an thlang ṭhin. College ṭha tia sawi zingah pawh an curriculum hi a inthlau thei khawp mai. New Delhi-a Lady Sriram College of Commerce ho syllabus chu college dang nena danglam tak a ni bik lo a, mah se, an curriculum han ena college dangte nen khaikhin chuan a danglam khawp mai. Han zir chiang ila an college graduate chhuakte chu New York emaw London emaw Mumbai-ah te thawk dawn pawh ni se an zei nghal ang tih ngam a ni. An zirtirtu pakhat sawi dan chuan zirtirtuho hian thla thum emaw thla 6 danah an curriculum an ennawn a, hun tawng mil turin an curriculum hi an her danglam fo ṭhin tih a sawi. 

Mizoram School-ah te hian Principal leh zirtirtuten curriculum ennawn turin sawihona (brainstorm discussion) te hi an nei ve tawh ṭhin reng em? Tawnhriatna aṭangin zawhna awm chu- Curriculum thlirna nei ṭhin leh tunlai hun mila ennawn zat zat zirna in engzatnge kan neih? Headmaster emaw Principal-te helam vei tak engzat nge kan neih? Sawrkar lam aṭang pawhin he thil endikna (inspection) te kan uluk em? 

Chutichuan, kan ram zirna a bikin kan School (High School leh Higher Secondary thlengin) syllabus lam hi chuan mi ram a pawl pha vek a, a hniam bik e han tihtur a ni bik lo. Kan ngai pawimawh leh kan bihchian ṭul erawh chu ‘curriculum’ kan kalpui dan hi kan hlawkpui ber ni thei leh pawi khawihtu lian ber a ni thei ang.  Kan state chhunga curriculum kan kalpui dan inpawt mar ṭha lo a tam an tih te hi thu dik a ni em? Skill leh academic content an tih lai tak zirtirtuten kan zirlaite kan luhpui dan te hi siamṭhat ngai lai awmna tur a ni thei em? 

Langsar tak kan ram zirna curriculum a nghet taka zung kaih chu by-heart system (rote-learning) an tih hi a ni. Education mithiam zingah chuan he system hi an hnawl vek. Kan rama kan kalpui mek erawh chu School aṭanga college thlengin ‘by heart system’ hi kan uar em em a ni. Syllabus-in a pek tel lehkhabu a tarchhuahte topic tam zawk hi zirtirtuten note te siam lehin kan in by-heart tir chiam a, zawhna pawh essay-type question siamin by-heart sa kha chhanna (answer) atana an beisei ang kha ni lehin marks te chu First Class leh Distinction tlinna khawp te kan inpe leh ṭhin. Kan ramah hian Board exam atana insawrbingna (board exam oriented) lama intlansiakna hi kan ti lutuk te pawh a ni thei ang. 

Competitive exam system-ah chuan objec­tive type te, short-answer type leh essay type te chawhpawlhin zawhna an rawn siam ṭhin tlangpui. A subject hre chiang, ngaihtuahna fim leh fiah tak an ni em tih competitive exam chuan a hre duh ṭhin si a. A subject hre chiang mang lova by-heart a zir tan chuan hetiang zawhna hi buaina a ni fo. Kan ṭhalaite inrintawklohna ni fo chu hei hi puh tur pakhat a ni. A chhan chu by-heart system a innghat tan chuan tunlai khawvel inelna hi an tana ruat a ni ve lo a ni ti hlawl mai ang. 

A dawt leh ah chuan heng competitive examination zawng zawng deuh maiah hian Test of Reasoning an tih mai hi ṭhahnem tawk tak a awm ziah bawk a. Hengte hi kan school curriculum-in a khuh ve loh te a lo ni leh a. Coaching class lam aṭanga inthuam chak kan tum a, a ṭhen chuan an ṭhatpui ve nual thei chungin a bulthum aṭanga a hma fe aṭanga a zeizia kan inthun muk loh chuan coaching class ringawt chu a harsat chin a awm tawh ṭhin. 

Lehkha chhiar tam hi inchhung khur leh school-ah kan in fuih ṭha lo hle. School curriculum ulukna apiangah project work te an zirlai an tihtir nasa a, anmahni inhai veng turin thil tam tak an chhiar a ngai a, research ang zia zanga an beih a ngai ṭhin. Zirtirtuten a awlsam zawng ngaihtuaha ‘note’ in by-heart tir boruakah chuan lehkha inchhiar zautirna boruak a awm vak lo. Tin, kan inchhungkhur tin hian ‘academic environment’ thiamna tuihalna boruak a nei lo a, lehkha hi kan chhiar tlem tlangpui a ni. Competitive exam a ni emaw, zirna sang university ṭhaa intat lut tur chuan ‘test’ kal tlang a ngai vek tawh. Hengah hian zirna ṭha aṭanga zir chhuakte chuan mahni inrintawkna neiin an dingchang nge nge ṭhin. 

Central YMA hian ‘kumpuan’ ah duhtawk mai lovin he zirna thu hi luhchilh se. Zirna uar hian thil tam tak a pai tel a, a hma a zau hle a, thawh hautak fe pawh a ni dawn. Chuvangin, sawrkar lam hotute nena ṭha taka thawkhoin seminar leh sawihona uluk takin nei ṭhin se. Tuna he thuziakin a rawn khawih hi chu kumpuan thupui kil khat thlirna chauh ang pawhin a ngaih theih awm e. 

- R.L.Rinawma