CM thusawi kaihlek/ tihdanglam chungchang

Vanglaini, dt.03 & 04.11.2019, Vol-XXXIV. No. 259 chhuak Editorial-ah khan 'Zirtirtu lak buaina leh CM thusawi' tih a lo lang a. Vanglaini hian Mizoram MP (LS) inthlan hnuhnung ber hun tepter tawh takah khan MNF Official Candidate Symbol in rawn dah sual palh tawh a. Zep tur a awm loin kan hria, a bikin MNF hotu lawkte thusawi hi in hriat chian tawk loh vang nge, kailek hretin in rawn ziak sual ta zeuh zeuhin kan hria. 

Tun ṭuma Editorial in rawn ziah pawh hi Chief Minister-in Nov. 1, 2019-a SEDP Office a hawn ṭuma a thusawi kha a nih hmel a. CM thusawi kha a ngai ngaia record a niin, ngaihthlak nawn leh theihin a la awm bawk e. Editorial-a in rawn ziah anga CM hian tun hnaia zirtirtu lak chungchang a sawina lam hawi a ni lo a, rem lo chunga hmehbel luih leh kaihlek niin a lang tlat. 

Khami ṭuma CM-in a thusawi awmzia zawk chu MNF Party Flagship Programme 'SEDP' a hlawh­tlin hunah chuan chhungkaw tin sum lakluh a lo pung ang a, kawng hrang hranga mipui harsatna tihkianin a awm ang tihna lam zawk a ni. Kha ta harsatna a sawi kha Education kawk lovin, kan eizawnna leh sum lakluhna hrang hranga harsatna kan tawh mekte hi a ni zawk. 

Education chungchangah Chief Minister hian a sawi­kai zawk chu tun hnaia zir­tirtu lak chungchang buai­na ni lovin, Thingtlang lama zir­tirtu indaihlohna te, sikul ṭha vak lo pawh ni se, sor­kar sikul a nih avanga sum senso hautak lo zawka kan indah ṭhin te, heng sikula zirtirtu transfer and posting-a harsatna kan tawh ṭhin chungchangte a ni. 

Chief Minister hian SEDP hmanga chhungkaw tinin lei rem kan rah hunah chuan, sikul ṭha zawk, a hmaa fate kan luhtir duhna, mahse sum neih loh avanga an tlin si lohnaah khan fee sang zawk pawh pein kan dah thei tawh ang. Transfer and posting harsatna leh a dangte pawh a hma angin chhungkua kan buai tawh lo ang a, tuna Aizawla zirlai tam zawk sikul ṭhaa lutte hi, sorkar sikula zirtirtu transfer leh thil dangin a tibuai lo ang hian kan buai tawh lo ang, a tihna a ni zawk. 

Chief Minister-in public sikul tia a sawi kha sorkar sikul ni lovin, English me­dium leh Private school-te a sawina a ni a, tun hnaia zirtirtu lak buaina in tih lam a sawina kha a ni lo e. 

- R. Lalhmangaiha, Joint Secretary Media & Publicity Department, MNF