3 Idiots leh Zoram politics – All is well!

Director Rajkumar Hirani-a'n Chetan Bhagat-a lehkhabu 'Five Point Someone' behchhan a 3 Idiots a siam khan, nuihzatthlak leh hlimawm tak nimah se, ngaihtuahna thûk tak a keng tel a; hmuhnawm mai ni lovin, zirna, hmasawnna leh mihring nunphunga thuchah pawimawh tak min hnutchhiah a ni. Zoram politics nen pawh inzawmna tam tak kan hmu thei. Film aṭanga kan zir chhuah pawimawh ber chu, "Hlawhtlinna ringawt zawng suh, thiamna zawng hmasa la, hlawhtlinnain a ûm zui ang che," tih a ni.

Politics-ah pawh lalna leh thuneihna aiin, mawhphurna rinawm taka hlen chhuah hi a pawimawh. Rancho-a'n degree aiin thiamna leh mi dang tana ṭangkaina a dah pawimawh ang khan, hruaitu dik tak pawhin mipui tana rinawm taka a thawh chuan mipui rin a hlawh thuai ṭhin. Minister ṭhenkhatte chu office aṭanga thupek pe mai lo va, field-ah an kal chhuak tam ta hi hmasawnna lawmawm a ni.

Prof. Lalnilawma, Minister of State hi action oriented leader zinga pakhat a ni. A department chan a hre chiang a, harsatna a awm apiangin a hmun ngeiah kalin a enfiah a, khuarel chhiatna thlen chang pawhin kan hmu vat ṭhin. Chu chu ropuina lantîrna aiin, rawngbawlna rilru leh mawhphurna hlenna a ni. Chutiang hraitute chu mipuiin an rinawmna an hmu a, an rinna a pun phah ṭhin a, mipuiin kan thlamuanpui bakah, department-te nena rorel a awlsam phah bik ang.

Politics-ah hian Chatur-a anga popularity ringawt zawn leh mi dang aia lansarh duhna aiin, mahni mawhphurna phûr taka hlen a pawimawh zawk. Sorkar chu party pakhat tan chauh a piang ni lovin, mipui rawngbawl hna thawktu a ni a, chuvangin, minister tinte'n an department ṭheuh ṭha taka an kalpui mai hi an hna pawimawh ber a ni. Department dang aia lansarh zawk duh vanga lungawi lohna emaw, sorkar chhunga buaina siam emaw a nih chuan hmasawnna a thlen ngai lo vang.

Champhaia KṬP General Conference 2016-ah khan Dr Hrekima'n, "Doctor nih hi ka peih loh hunah chuan ka báng mai tur a ni ang," a tih kha ngaihtuahna thûk tak a ni. Mahni hnaa kan tui tawh lo a nih chuan zahawm taka bân mai hi a kawngkal zawk. Sorkar tihchhiat tumna leh buaina siam hi democracy nunphung ṭha a ni lo.

Tunlai hian opposition lam aṭangin, "Thu dik a duh vangin bân a ni," tih kan hre fo. Democracy-ah sawiselna leh ngaihdan hrang neih chu a thiang. Mahse, thu dik chu sawi mawi ringawt (rhetoric) ni lovin, hmasawnna tak tak tura hman theih a ni tur a ni. Thu dik kan duh a nih chuan party dan leh hraite zah a, zawm thiam a ngai a. Chatur-a'n a speech (by-heart) awmzia hre miah loa a sawi ang deuh khan, thusawi ringawt aiin a awmzia leh a tak tak hriat a pawimawh. Politics-ah pawh rinawmna chu thu chauh ni lovin, hnathawh leh nungchangah a lang chhuak ṭhin.

Social media khawvelah hian mipui chu hriatna nei ṭha tak tak kan ni tawh. Thutlukna kan siam thei a, keimahni ngeiin ngaihdan kan siam thei bawk. Chuvangin, politics hi thumal mawi emaw, slogan emaw ringawtah a innghat tawh lo va; thu leh hnathawh a inrem thlap a pawimawh.

3 Idiots-a ‘All is well’ tih kha harsatna awm lo tihna ni lovin, harsatna hmachhawn ngamna leh hma lam thlir thiamna a ni. Zoram politics pawh hian Virus-a anga kalphung hlui vawn tlatna aiin, Rancho-a anga thiamna, rinawmna leh hma lam thlir thiam hruaitute kan mamawh zawk. Politics-a hlawhtlinna tak tak chu rei tak sorkar theih ringawt ni lovin, mipui thinlunga hmingṭhat leh hnuhma ṭha hnutchhiah a ni.
ALL IS WELL!

- Thangtea Thawmte