MANE MANE TEKEL UPHRSIN
Kum ral ta zawng zawngte kha, Aw, koh kir leh theih ni sela, Tih fakna hla kan sak ṭhin ang tak hian, kan nun hlui hian min aû lawm lawm mai zawng a nih hi. Kum 40 dawn sorkharna fawng lo in vawn chhawk tawh MNF leh Congress sorkhar pawh, Mane,mane tekel upharsin, Bukin i awm a, i tling ta lo. Tuna Sorkharna fawng chelh mektu ZPM pawh kan Buk a, kan buk tling lo va, Hei erawh hria i la, Eng Party Sorkhar pawh buk tur hian Lalpan tumah a ruat lo, tih hi. Kalphungthar sorkhar pawh, a pawh fân a dul ta em ni? Sorkhar hna thawk ai kal anva tam leh ta em, Ni e, kan ringtu nun pawh Satel thlûn ang patin a mar reng thei lova, Thlarau zawngin peih mahse, tisa erawh a chak si lo, alo tih ang deuhin Mihring hi kan kal chak reng thei lova, hriat thiamna mual a ṭanga kan thlirte pawh hi a ngai a sin, Nang sorkhar sawiseltu khan, i chhungkua leh i Lawina Party kal phung i hria a, in chak loh lai khan, eng nge i tih? Mipui ten nawrh an huai hawt lai khan, khaw nge i awm? Min vote tlingtute ti lung awi vek tur hian, eng Ram sorkhar mah hi anla chawr chhuak lo chu a nih hi. A chhan chu maw! Pathiana damna zawng lovin, Mihringah damna kan zâwn vang a ni,
Kan Sorkhar leh Gilead-ah thinghnai damdawi a awm lova, kan hrisel thei lo a nih hi. Rilru hrisel tak nei tur chuan, hna thawh tam a ngai a, thlan tla lovin hlawk tak thawh kan tum a, chu chuan, vuivaina bak min thlen si lo,
Sorkharah kan dam lova, kan beisei contract hna kanin daih si lo, chu mai ala ni lo, Kan chhungkaw hnaivaite kan vuipui a, kan beisei erawh mahni ṭanghma haina mai a ni, kan ram hian engmah min pek tûr a nei lo, kan ram tân hian eng nge kan pek ve ang? Thilṭha leh ropui tak pek tûr kan nei lo,a ni thei e, Rinawmna leh dikna erawh kan pe thei, chu chu khua leh tui ṭha te tih tur a ni, mahse, a theih chin china kan ram siam ṭhatna tur sum pawh pen hram kan tumna hian, Kan Ram hruaitute kan ti luhai a, a nihna taka hman tur Budget pawhpen a ni ṭhin. Hei hian hna ṭha a nihna ang a thawh theih loh phah fo a, a pawi tak zet a ni, sorkhar hmasa-ah khan, Electrict Power siam chhuak tur khan, engzat a tam nge Kan state sum a luan ral tak kan hre vek, kan theih nghilh bik lo, a ṭha ber ni awm tak leh dik ber ni âwm takin, tuna a rak ring ringah anla ṭang a, zahna chang lah an hre hlawl si lo,
Matthaia 7:3-4 (MGB) Tin, engatinge mahni mita khanchhuk awm chu ngaihtuah si lovin, i unau mita hmawlh te tak te awm chu i hmuh ni?
Engtin nge i unau hnênah, ‘I mit ata hmawlh te tak te kha mi lak chhuahtir rawh,’ i tih theih ang? ngai teh, nangma mit ngeiah khanchhuk a awm reng si a.
Kan Sorkhar kal mekte pawh in en fiah se la, mahni thu tiama ding nghet turin, an ke cheh rahbi tuk ṭha rawh se. Thu tiâm, tiâm tluka awl leh, Thuruk zep tluka har a awm lo, anlo tih angin, ṭawng chin tur leh Thu tiâm chin tur thliar thiam tûrin, an hmui leh kâ veng ṭha tawh se la, an lama Bukna Patla ain khai reng, tih hi vawng reng rawh se.
Nitin hian in siam ṭha tûr kan ni a, kan thu tlukna alo dik lo a nih chuan, sut ngam ila, ngaihdam dil hreh lo sela, ka tih tawh chu, ka ti tlang tûr a ni, ti a, ṭang tlat ṭhinte hi mi fing an awm ngai lo, Rorelna dik hi Luipui angin he khawvela hian a luang ngai dawn lova, famkim lohna khawvela cheng kan ni a, kan rel dik vek thei lova, kan ti dik vek thei hek lo, tih hi kan pawm thiam a ngai a ni.
Thufingte 20:23 : Bukna dang dang hi LALPA mithmuhah thil tenawm a ni a, Khin dik lo hi a ṭha lo a ni. Kristian rama Sa buk a tling lova, kan chini lah buk tling leh tling lova zawrh leh hralh a ni te hi, Mizo te mirin awm hnam kan nih loh zia pho langtu mai a ni.
Tuna kan ram buaina hi, tu thiam loh nge? School tam tak khar mek a ni a, a chhan mithiam zawk ten an ziak kur ngeinguai tawh a, Sorkhar schoola thawk ten an fate an thawhna shoolah an kal tir duh loh chhante hi, mak in ti ve em? An hlawh zatve chauh hlawh, Privat schoola an dah zawk tlat te hian ngaihtuahna ava ti thui ve, Hlawh tlem zawk ten ṭha hnem ngai takin naupang an zir tir theih laiin, hlawh tam zawk ten, an zirtir thei lo, tihna a ni a, Sorkhar in sum tam tak a sen a bang chuang si lova, a nei nung deuh fa ten Private Schoolah an fate an kal tir vek mai si a, Sorkhar School chu khar mai alo ngai ta a ni hi. Tute mawh nge? Sorkhar maw? A teuhin a hnai lo mai, Sorkhar school hian Zirlaite tân Competitionte hi kumtin buat saih ve se la, ṭhahnem ngai takin zirtir ve bawk se la, sum tam zawk sen ngai Private school hi an ṭhiat mawlh mawlh ve ang chu mawle, eng hna pawh thawk i la, kan hlawh phu tawka kan thawh ve hi a Pathian thu em em a sin, Private schoolah kanin dah a, hei a result a chhuak a, kan lungawi lova, sorkharah kan dem a, keimahni lam erawh in en fiah kan tum leh si lova, dik kanin ti em? School naupang kan neih tlem chhan hi eng vang nge? Zirna kan kalpui ṭhat loh vang a ni tih hi, a chiang mai lawm ni? Mipuite hian kan buk ve che u a nih hi.
Mane,mane,tekel upharsin.
- Zothansanga, Chhiahtlang Kawnveng, Ph : 9612333536