I MUHIL THEI NA NGE?
Zanah i khum nuam tak maiah i mu a, nimahsela, i muhil thei ta reng reng lo mai a, i let tawn, i let tawn ringawt a, muthilh i tum nasat poh leh i harh tulh tulh emaw tih mai tur a ni si a. I muthilh thei loh vangin thil chi hrang hrang i ngaihtuah a, i rilru ngaihtuahna a vak kual nasa hle a ni. Mihringte hi kan taksaah hrisel lohna eng emaw a awm avangte hian a muthilh theih loh fo va, Eng emaw lungkham lian tak kan neih vang te, rilru tina ngawih ngawihtu thil kan tawn avangte pawhin muthilh theih loh chang hi kan nei bawk ṭhin a ni, Chutiang ni lem lo, taksa hrisel pangngai leh rilru natna nei chuang si lo va, muthilh thei miah loh hi a awm ve fo bawk a. Muthilh theih hi thil pawimawh tak a ni a, kan taksa hrisel nan leh kan rilru hahdam nan pawh thil tul tak a ni awm e, Chuvangin, tui taka i muhhilh theih nan eng thilte nge i mamawh tih i ngaihtuah fo a ngai a ni.
He thil pawimawh tak mai, kan sawi lai hian, rilru lama mi pangngai phak chiah lo, enghelh leh vei pawh nei lem lo, mutui em em mai mihring a awm theih a, heng ang mite hi thil ei thei tak, chaw ei tui em em si, mut duh tak an ni duh hle a. Tin, thatchhiat avanga mu reng ringawtte pawh an awm ṭhin a ni. Kan Baibul pawhin :- "Aw, thatchhepa, eng chen nge i mut dawn? Eng tikah nge i muhil chu i thawh dawn?. (Thuf 6:9) a ti reng a. Heng ang mite muttui dan leh mut theih dan hi kan sawi tum an ni lo a, Mihring nun pangngaia nung tho si, taksa hrisel lohna nei si lo. thil eng emaw avanga muhil hleithei tlat lote hi kan sawi tumte chu an ni. Pathianin hahdam taka kan mut siai siai nan zan min siam sak a, chu zan min siam saka kan muthilh theih loh tlat chuan, kan taksa pawhin a tuar thei hle si a.
Mihringte hi Pathianin awm mai mai turin min siam lo va, hah tak leh rim taka hnathawk tura a siamte kan ni. Chuvangin, ni tina hah taka kut hnathawktute hi zanah pawh an mutui tlangpui ṭhin niin an sawi, mi hahdam lutukte hi zanah pawh an mutui lo deuh ni awm a ni, A bikin khawpuia cheng chhuna hnathawh tur nei lova ṭhu nileng ṭhakte hi zanah tui taka mu thei lo an tam ṭhin a ni awm e. Pa pakhat kum 60 chuang tawh khawpuia cheng hian, hrisel lohna engmah ka nei si lova zanah ka mu thei ngai reng reng lo mai, tiin min hrilh a. Kei chuan "I theih ang angin chhunah i taksa sawizawi ṭhin teh, i thei phei chuan thlan chhuak zawih zawihtein bei la, Awm hahdam lutuk avangte hian mut theih loh hi a awm chawk a nia, tiin thu ka rawn a, Ka thurawn ang chuan chhunah a theih ang angin a taksa a sawizawi ta a, zanah tui takin a muhil thei ta niin a sawi a ni, Mihringte hi kan awm awl lutuk hian kan taksa tan ṭhat lohna tam tak a neih avangin kum upa lam pawh ni ila, a theih ang angin mahni in chhungah chet tam tum hram ila, zana kan mut theih nan pawh a ṭha hle tih kan hriat a ngai a ni.
Hei lo pawh hi zan muttui nana mi ṭhenkhatin an hman ṭhin chu, zan mut dawna tui luma inbual hi a ni, mi ṭhenkhat erawh chuan nipui lai chuan zan mut dawna tui vawta inbualin mut a tui duh a ti bawk a. Eng pawh ni se, khawlum lai leh khawvawh laiin tui lum leh tui vawt chu a hman hun a awm ni turah ngai ila, a ṭha a nge, chuvangin, i muttui nan zan mut dawnah inbual ve ṭhin teh, i muttui phah mai thei a ni.
Tin, zana kan mut theih lohna tam tak hi chu, kan mut dawnah rilru tihah thei thil kan ngaihtua vak vak avang te, Eng emaw hlau ruk riau kan neite pawh hian mut tui a har hle a ni. Chuvangin, i mut dawnin i rilru tihahna tur thil chu ngaihtuah lo hram la. Hlauh ruk riau thil i neih pawhin veng him tur chein Lalpa hnenah ṭawngṭaiin, a hnenah inkawl tir rawh :- "I mut hunin i hlau lo vang a, A ni, i mu ang a, tui takin i muhil ang. (Thuf 3:24) tiin Pathian thuin min hrilh si a. Pathianin kan hahdam nana a siam zahah hian, Amah ringtute chuan. "Thlamuang takin ka mu ang a, ka muhil bawk ang, Lalpa, nangmah ngei hi a ni, mahni chauh pawha him taka mi awm tir ṭhin hi ni. (Sam 4:8) tiin tui takin an muhil ṭhin a ni. Nang Unau duh tak, I muhhilh theih loh zan a lo awm pawhin i rilru vak kual tir vak vak lovin, Pathian pawlna hun remchang i nei tih hria la, Pathian kutah lawm takin tlulut mai rawh, "Kei zawng ka mu chu ka lo muhil ta a, ka han harh leh a, Lalpa chuan min lo chelh reng ṭhin a ni. (Sam 3:5) i ti mai dawn a ni.
- Hausanga Hauzel