Hmeichhia aiin mipa kan ṭawng tam ta!
Tun hma chuan a tlangpuiin Mizo mipate hi ṭawng tam vak lo, phunchiar lo leh mi rêl ngai vak loa sawi kan ni ṭhin a; hmeichhiate hi phunchiar zawk leh mi rêl chîng zawka ngaih leh sawi an ni ṭhin. Mahse, tunah chuan Mizo mipate'n kan hmeichhiate aiin kan ṭawng tam ta mah niin a lang–a bik takin social media-ah.
Tun hma deuh chuan Mizo mipa, ṭawng tam, mi rêl chîng deuh leh phunchiar deuh chu hmeichhe tih âwm tâwk lek tia ngaih an ni ṭhin a. 'Hmeichhia nghal loh...' tih te, 'Hmeichhia ang mai' tih ṭawngkamte pawh a awm. 'Hmeichhia pathum an ti ti khawm tawh chuan mi rêl an nei ngei ngei' tih ṭawngkamte pawh sawi a ni ṭhin bawk. Heng aṭang hian hmeichhiate an ṭawng tam a, mi rêl an chîng zawk ṭhin ni ngeiin a lang.
Kan khawvel a danglam chho ve zel a, thil thar, ngaihdan thar, chîn dan thar a awm chho zel. Social media pawh kan hmang nasa ta. He social media hian Mizo mipa zia a thlâk ta viau mai. Tunah chuan Mizo mipate hian ṭawng tam, mi rêl leh phunchiarah kan hmeichhiate kan khûm ta ni berin a lang!
Social media hrang hranga thu leh thlalak post leh mi dangin an comment-te hi han en ila, group hrang hrangah hian hmeichhia aiin mipa an ṭawng tam zawk a, an phunchhiar tawh zawk tih in hmu thei ang. Mizo mipate'n hmeichhiate aiin mi chhiatna lai sawi an chîng zawk a, thu dik tâwk lo leh thu dik tluantling lo post/comment an chîng zawk tlat zu nia!
Tun hmaa hmeichhe sawi âwm tâwk leka an ngaih thil tam tak chu tunah chuan hmeichhiate aiin mipate'n an sawi peih tawh zawk. Mipate an phunchiar tawh zawk a, mi chanchin sawia mi rêl an ching tawh zawk tih ngam a ni tawh tlat.
Mizo mipate kan ṭawng tama kan phunchiar tâk zawkna leh mi rêl kan chîn tâk zawkna hmun lah hi a darh zau chi a ni leh zel a. Hmeichhiate'n mi an rêl tamna hmun chu titinaah a ni a, hretu an tam lo, a thleng thui lo. Mipate phunchiarna leh mi an rêl ṭhinna hmun erawh social media a nih miau avangin a darh zau a, a thleng thui a, Mizoram pawn thlengin a darh thei. Chuvangin, mipate'n ze ṭha lo kan lan chhuahtirna hmun hi a mualphothlak lehzual a ni.
Mipa pawh, hmeichhia pawh, ṭawng tam, phunchiar leh mi rêl chîng deuhte hi an ngeiawm ṭhin a, an huatthlala em em bawk. Hetiang mite hian mi ngei an hlawh duh nge nge a, miin an kâwm ṭha peih lo tlangpui–hei hi chu kan hriat tlan sa vek a ni.
Aw le, Mizo mipate'n kan hmeichhiate kan khûmna hi a mawi lo a nia. Insûm ila, ṭawng tam lo a, thil eng emaw hlekah lo sawi ve phêt i tum lo deuh teh ang u. Phunchiar lutuk lo ila, mi rêl zet zet lo ila; Mizo mipa ze ṭha ṭhinah kha i kîr leh ang u hmiang.
- Zoramchhana