A 'bridge' an paih daih!
Aw, ka nghakhlel em, van in thlen hunin,
Lawm taka i hmel ka hmuhin;
I kut khenna ser chu ka vuan ang a,
'Ka hmangaih che' tih ka duh a.
A chunga mi hi Dr. Ramdinthara Sailo hla phuah, "Zaiin ka hril dawn i hmangaihna hi" tih hlaa mi, 'A tawpna atan' tiha mi (a bridge) a ni a; kum 2000 vela a phuah a ni mai thei. Kristian Hla Bu kum 2004-a tihchhuahah khan telh a ni a, kumin 2026-a KHB siam thar lehah pawh a tel zel a; mahse, a bridge–a chunga hla thu kan tihlan erawh a tel ve ta lo–an paih daih!!!
Kristian Hla Bu (KHB) thar sawi zuina Synfo lamin an buatsaih kan hmu zui a, "Zaiin ka hril dawn i hmangaihna hi" tih hlaa a bridge an paih chhan pawh an sawi. Paih a nih chhan an sawi chu–kohhran inkhawmah a bridge sak dawnah zai hruaitu leh mipui an buai thin vang, tih a ni. Pakhat phei chuan, "A bridge lai kan thlen khan kan buai ziah," a ti! In pawm zawng a ni em? In awih em?
Khawi kohhranah emaw, eng emaw chánga zai hruaitute leh mipui lam han buai deuh hlek ṭum chu a awm ngei ka ring; mahse, "Kan buai ziah" han tih em em tur a ni meuh em?
Keini kohhran chu kan buai ngai lo. Kan kohhran anga buai lo hi Mizorama kohhran tam zawk an ni zawk lo'ng maw? Sunday school-ah hian Senior department-ah eng emaw chen ka awm a, he hla hi kan sak zin pawl a ni. Zirlai vekin rimawi chi 5–khuang, keyboard, ṭingṭang, tingtang ri thûm (bass guitar) leh drums hmangin zai an hruai a, an buai ngai miah lo–naupang/tleirawl tê tê pawh an buai lo.
Mipui lamin an sawi zui dan ka hmuh ve phak chinah chuan, a bridge an paih ta daih hi tha an ti lo zel a, an ui viau hlawm a; a tha zawk alawm, ti ka la hmu ve lo. He hlaah rau rau pawh an duh zual lai a nih thu sawi pawh an tam mai.
KHB hmangtu Presbyterian Kohhran leh Baptist Kohhran te chuan KHB hi kan ring hle a, KHB-a a awm dan, inziah dan hi chu dik turah kan ngai thin. Kum 10/20 a liam ang a, KHB-a a awm dan hi ṭhangthar lehzualte chuan an hriat dan a ni chho dawn a, hlabu dang ṭhenkhatah a phuahtu phuah dan dik tak awm bawk mah se, chung chu an hmu ve tawh kher lo mai thei. Kan rin ber KHB-ah a tel miau si loh chuan a phuahtuin a phuah dan dik tak hi kan hre lo tial tial ngei ang.
Chuvang chuan, "Zaiin ka hril dawn i hmangaihna hi" tih hlaa tel ngei, a phuahtuin a phuah tel ngei, mi tam takin an ngainat lai tak an paih ngawt mai hi chu a zialo tak zet a; a phuahtu zahlohnaah pawh a ngaih theih ang. A phuahtu an ráwn hmasa, an ti a. Ràwn pawh ni tehréng se, a phuahtu tan chuan KHB-a a tel loh mai hlauhthawn rûkna rilru nen, lo 'aw' mai loh ngam pawh a ni nang. A phuahtu hian a lo 'aw' tawh hnuah paih a duh lo leh a, amah betu chu vawi 2/3 biak tumin a call a, mahse, call a la (pick) ta tlat lo nia sawi a awm. Hei hi a dik a nih chuan, a phuahtu hi a hmin lo hle tihna a ni.
Kohhran ṭhenkhatah eng emaw chángin an lo buai deuh a nih pawhin, tualchhung kohhran zawng zawng huama "Kan buai ziah" han tih tur chu a ni lo; hla thua tel ngei han paih phahna tur khawp chu a ni lo a ni. Mi hla phuah lo paih ṭhen ngawt hi a zah theih lohthlak deuh chuan a lang; a inlulinthlak deuh roh bawk! A bridge lai kha KHB-a tel chi-ah an ngai ngang lo a nih chuan, hla thu kim loa dah ai chuan, he hla hrim hrim hi dah loh ngam mai zawk àwm tak a ni àwm asin.
~ Kezo