Kawng a chhe leh a tawh e!
Kum tin maia Mizoram buaina chu kawng chhia hi a ni a, mipui tan kawng a pawimawh si a, mi rethei aṭanga mi hausate hman vek a nih avangin sawi zui a hlawh pawh hi thil mak a ni lo.
Congress sorkar laiin kawng siam ṭha ṭhin mah se a chhe leh tho a, MNF sorkar hnuah pawh a danglam lo. Beiseina sang tak nena Tlumtea thlir thlira Mizo mipuiin an thlir ZPM meuh pawh a danglam chuang lo a, Mizoram leh kawng ṭha hi inkawp tura duan a ni lo, tih mai tur a ni.
Thiamna a sang zel a, hmanrua pawh a ṭha zel a, mah se kawng erawh a ṭha thei chuang lo. Kawng siam dan hi uluk taka zir an awm ngei a rinawm a, heng mithiamte hi an kut phuar a ni nge an thawk ṭha tawk lo tihte rilruah a awm.
Kawng siam dan formula hria hi Mizo paah hian awm tak maw, an awm a nih chuan biru loin rawn pen chhuak thei se a lawmawm hle ang. Chutihrualin Aizawl khaw chhung kawng erawh a ṭha viau a, tun hmaa kawng chhe reng lai Bawngkawn Red Rose vel pawh RCC chhah ṭha taka an chhun hnu chuan a ṭha ta reng mai.
Duhthusam loh lai awm nual mah se a ṭha lai pawh sawi tur a tam. Mahse, tun ṭumah erawh kawng ṭha duhin han phun chiar leh deuh ila, sorkar beng a thleng lo a nih pawhin mi pakhat tal ben harha an awm chuan a lawmawm hle ang.
Kawng ṭhat rei loh chhan langsar ber chu tui luan kawr ṭhat loh vang a tih ngam. Tui hi mihring tana ṭangkai tak ni mah se a awm lohna tura awm chuan leimin siam thei a ni a, kawng tichhe thei a ni a, a tawi zawngin chhiat rupna thlen theitu a ni.
Aizawl khua bik thlir chuan kumin March thla chho vela siam zawh; World Bank Road kawng chu a tam zawk a chhe leh deuh vek tawh a, kum khat em pawh a daih loh hi sum sen tam tur ngaihtuahin a rilru natthlak hle.
WBR-a kawng chhiat chhan chiang tak chu tui luan kawr mumal loh vang a ni a, Aizawlah mi kan chep avangin khawpui kan zauh zel a. Chenna in leh sumdawnna atana ruahman in ṭhahnem tak WBR leh a chhehvelah in a ding a, tui paihna mumal a awm leh tak loh avangin kawngin a tuar hle.
Hei bakah hian motor lian tak tak, ke 10 chuang neiten thil rit tak tak an phur ṭhin avangin kawng a ṭha rei thei lo. Chutihrualin a chhiat ṭhinna lai bawkah a chhe leh ṭhin a, hmanrua hman ṭhat tawk loh vangte pawh a ni thei bawk ang.
Mizoram sorkar hian kawng hi ngai pawimawh se, ei leh bar bakah sumdawnna thlengin nghawng lian tak a nei thei dawn. Aizawl khaw chhehvel pawh heti khawpa a chhiat chuan, kawng chhiat vanga harsatna tawk hi an tam dawn. Sorkar hian a ngaihven lo emaw kawng siam dan formula an hre lo emaw a nih chuan inthlan leh hunah nghawng lian tak a nei ngei ang le.
- Lalnunpuia