KA CLASS DAWN!

Assam Rifles Signal Pu hnenah Matric Result a lo thleng a, chu chu kan zirtirtute hnen aṭangin kan hre chhawng ve leh ta kha a nia. A dik turah kan ngai nghal hmiah, kawng dang, a aia ranga hriat theihna tur awm hek lo. Daka a lo thleng nghak dawn ta ila, a tluan viau chuan thla khat hnuah a lo thleng ang a, Pre-University zir turin kan khawtlai hman ngei ang.

Matric pass kan chak em em nachhan College kal tur chuan kein zing dar 6 velah Hnahlan chhuahsanin Champhai panin, kan ṭhenawm tlangval, college kallai mek U Sangliankhuma nen kan chhuak ta hnak hnak mai a. Rilruah Aizawl thlen thuai thuai bak ngaihtuahnaah a lut thei lo. Ani chuan Aizawl chanchin te min hrilh pah zel a, “ Veng pakhatah chuan, “Em?” tia zawhna zawt ṭhin tlangval pakhat a awm a. “Aw,” tia chhan chuan "Chu min cho maw?" a ti a, “Aih,” tia chhan chuan "Chu min cho lo maw ka ti a, aih i ti maw?" a ti leh bawk si a,” a han ti chuh, ka hmulthi hi a ding nghal chum chum mai a. Kei hi min zawt ve ta se engtin nge ka tih ang tih chu Aizawl kan thlen hma zawnga ka rilru luahtu a ni ta.

Champhai chu unau hmelhaiah kan lut a, km 54 vel lai kea kal mah ni ila, college kal tawh tur ka nih avangin hah ka hre lem lo. A tuk zing dar 5 velah kan tho a, MST Bus ticket kan neih loh avangin Champhai aṭanga Aizawl pan tur TMB FULL LOAD chungah kan han ṭhu ta a. E khai, a zo vah mai a, kawngpui chu khutah a ni mai hian ka hria. Primary Sikul kan kal laia kan School khâm kotlanga ṭhu angah ka inchan a, ka lu a hai ta. Khatih hunlaia check gate hmingthang Seling Check Gate tluang takin kan pel a, Bawngkawn kan thlen chuan a thim dawn ṭan tawh a. Electric veng kan han lut thla chu, Power House-ah hian khawl ri ring em em mai hi a lo ri thum vut vut mai a, Hnahlana Helicopter ri kan hriat ṭhin ai chuan ring tak a ni.

PACHHUNGA UNIVERSITY COLLEGE tih lian pui mai a lo intar kulh mai leh a Gate Pui sang tak mai chu ka tan a hmuhnawm ngei mai. Chu gate-ah chuan ka la lawnliam ang tih ka chhut pha reng reng lo!

Admission form te kan han la chhuak ve ta a, matric markshhet leh testimonial te kha a copy thehluh tel a ngai a, a copy typewriter-a chhu thei kan han zawng ve ta a. Lehkhapuan Legal size a, Remington Typewriter ngeia chhut chu kan han attest-tir ta a. XEROX tih vel kha a rim a ra pawh kan la hre lo hrim hrim a ni. Office tlem té kha chuan Photocopy khawl chu an lo nei awm e.

Note bu pakhat leh pen kan neih chuan a tawk kan ti rih phawt mai a. A ahna’n erawh China Bag Hring (CHINA GREEN BAG) ngat kan duh thung. Aizawla awm te leh thingtlang aṭanga kalte pawhin kha Bag Hring ngei mai kha kan uniform a ni ta ber a. Sikul ang khan Uniform hak a ngai tawh lo bawk a, thawveng riau hian kan inhria a ni. Mahse, uniform a awm tak lohah chuan ka tan buaina ral a lian ta. Thawmhnaw ngai kar tluana han hak kha chu a ruka hmelṭha tih deuh kan nei ve tih bak ngaihzawng nei lo mah ila, nuam lo tihna chhumpui hian min zin hnan ve chuk chuk ṭhin.

Kan Bag Hring pawn lamah chuan, langsar tak leh mi dang pawhin an chhiar theih ngei turin kan class leh kan subject kan han ziak ngei mai a. Kei pawhin a hnuaia mi ang hian ka han ziak ve kalh mai a:

1st YEAR, PU (Sc)

Roll No. 109

PUC

Ka lung kha a va han awi tak em!!!!

College kal tura kan han chhuak hi, sikul kal tur kan ni tawh lo, KAN CLASS DAWN TLAT. Kan U pakhat, U Thlani hian nula pakhat college kal tur, "Kha sikul i kal dawn em ni?" an tih a, ani'n, "KA CLASS DAWN" a lo tih thu a sawi ka hriat khan ka rilru chuan ka dem mawlh lo, a âwm ka ti, ka pawmpui thlap, keini pawh sikul kan kal tawh lo, kan CLASS tawh zawk tlat!

Class kal tur leh haw turte tan Bus pahnih, 'PACHHUNGA UNIVERSITY COLLEGE' tih inziahna leh, 'NORTH EASTRN HILL UNIVERSITY' tih inziahnate a awm a. Bus-a kan han ṭhu fel chiah hi inhnialna tur kan zawng nghal a, “Pa pakhat hi tukverhah a zuangthla a, a mawngphe a hmu hman/hmu hmanlo,” tih vel te. He thu phei hi chu tun thleng hian thutlukna kan la siam thei lo!

Class han kal takah chuan off period te a lo awm a. Ṭhianpa Zira te nen, “Nula hmai hlai deuh, powder heh zet mai i rim ang u,” kan han tih tawh hi chuan Canteen-ah kan lut a, kil khatah Carron Board, thingpui in pahin kan pen ta ṭhin a – kan class room hnuai ground floor-a Canteen ngeiah khan.

Class kal kan ni miau a, off period-ah Zodin Cinema Hall-a chhun dar 2 show en turin Venghlui chho ulh em em te kha kan tlan chhuak chho deuh mai zel a. Sikul Uniform kan ha tawh lo miau alawm! Sap film pakhat 'SPLASH' kan en hnuah kha chuan, splash kha cinema en tih nan kan hmang ta a. Kan splash dawn em ni ang kan tih kha chuan Venghlui chho kan thleng nghal deuh zel mai maw le!

Class kha kan han kal em em khawp a, zingkarah Hrangbana College-a Mizo class, Pu B.Lalthangliana lecture te kha kan chhim ṭhin bawk zu nia.

Remna leh muanna a awm theih nan Students’ Joint Action Committee (SJAC) huaihawt 'HUNGER STRIKE'–ah te kan han tel ve leh ang lawp lawp a. June 30, 1986 zanriah eikhama “REMNA AN SIGN” tih kan hriat rualin Chanmari kawn kan pan khawm a, motor awmchhun remchang ang angah kan chuang a, Tractor-a chuan kha chu ka thiam lo khawp mai, ka tla dawn tlata hriatna ka nei a, ka fimkhur khawp mai. Chanmari kawnah kan zai, kan lam tlaivar kha a ni ta ber e, kan va hlim em, khami zan te kha.

Lehkhabu te hi a la vang khawp mai a, chuvang chuan canteen thlang lawka Library changtlung zetah, nula hmai hlai kan rim zawhah kan chhuk ṭhin a. Zirlaibu ho kha chu a kawmah 'NEHU NEHU NEHU NEHU' tih hi a inchhu khat ṭhap mai a ni.

Hawilopari, Mizo ṭawnga novel ziah hmasak ber, kum 1936-a L. Biakliana (1918–1941) ziah hi Library-ah khan a awm a. Class kal loh lai hun awlah kan chhiar ṭhin a, a ngaihnawm a, lunglai ril a fan a, kar loah Hawilopari zunah kan uai nghal der mai kha a nia.

Khatih laia CLASS kal ho kha eizawnna hrang hranga buaiin, mahni seh seh mualah kan ti a ni ta mai si. Kan Class kalpui ṭhenkhatten piallei thuah riatah chham ang min zalsan a, Mizo Idol 2025- Emmanuel Lalremruata pa, ṭhianpa Hriata pawh a tel ve a, ngaih a zual ṭhin e. Kan puipa BM-a (C. Lalbiakmawia) zarah ṬAMPUI TUI HÂNG tuina hria kan pung chho zel mai a, hei hian thlai thar market te pawh a nghawng ve hial mai thei asin!

Hetiang ngaihtuaha rilru khawvelin Pachhunga University a fan mek laiin dt.31.03.2025 zanah, Tourist Lodge, W.Phaileng aṭangin a hnuaia hla thu hi a lo chhuak hlawl mai a. Ka thiam ang tawk tawkin a key ka bel mawlh mawlh a, ka Traveller Guitar (YAMAHA) ka kuah lawk a, ka sa a, ka record ta nghal bawk a:-

Kan Pi Pute tualzal nun a,

Hmangaihna parmawi lo lang;

Hawilopari zun zam a uai zawngten,

Lungchim tein;

(Pachhunga University College) Library kan bel, kan bel kan bel leh ṭhin.

Kan ṭhenrual lungduh zawngte,

Khawilam tluang nge in zawh le;

BMa Ṭampui tuihang ṭawmpui chung Zelin,

Lungmuang tein;

(Pachhunga University College) Library I bel I bel I bel leh ang u.

- Hrangchhuana Sailo

Emai: hsailo_pg@yahoo.com

MB: 9436352280 / 8873095663