Kan police-te hi khawng deuh teh se

Tunhnaia H Ramdinpuii (15), Mualṭhuam Norh chu thah a ni a, Lunglei Police leh Forensic Science Laboratory lamin theihtawp chhuahin an chhui a, khawtual mite puihna nen an hnuchhuiah hlawhtlinna an chang a ni. Hnu chhuitute leh Mualṭhuam North mipuite an fakawm takzet.

Chutihruala ka vei em em chu, H Ramdinpuii thihna chungchangah hian social media lamah thudik tawk lo a darh nasa hle. Mimal nun nghawng dawt dawt thei thilte pawh a darh a ni. Heng thudik lo thehdarhtute hi man an awm awm ka la hre hauh lo. Kan police-te hian hetianga social media-a thudik tawk lo thehdarh a, mipui ti chiai ṭhinte hi man hmak hmak se ka va ti tak em.

Mi tam tak chuan social media-ah an duh duh an thehdarh mai zel a ni. Hetiang ringawta social media hman a nih chhoh zel chuan kan ram leh hnam tan a pawi chho zel dawn. Chuvangin, social media-a duh duhin, dawt pawh pawisa hauh loa, thu an thehdarh ṭhin hi tihreh a ngai. Chumi atan chuan kan police-te hi tun ai hian khawng deuh se ka ti hle.

Politics thilah pawh nise, dawt chiang tak hmanga social media kaltlanga inbeihte hi ṭha ka ti hauh lo. Political party-te'n Cyber Crime lama FIR an thehluh kan hre ta zeuh zeuh a, a lawmawm ka ti hle. Chhunzawm zel nise ka ti takzet. Politics thilah pawh nise, social media-a dawt lutuka inbeih hi Mizo Kristiante tih atan a mawi loa, kan ram leh hnam tan a ṭha hek lo.

Chuvangin, social media lama duh duh sawi tawp mai ṭhin, thudik lo thehdarh ṭhinte hi chu kan police-te hian man hmak hmak mai se ka ti takzet. Man an awm chuan media lamah thehdarh zel se, chu chuan mi tam tak a fimkhur tirin, an hlauhthawn phah ngei ang. H Ramdinpuii thihna aṭang hian social media lama thu post-ah kan police-te an khawng lehzual a ngaihzia ka hmu.

- Lalrinsiama