'ROPUI' LEH HLA TLAR KHAT CHHÛNGA THU MAL PAKHAT THLÛK DÂN TUR

'Chhandamtu, i ropui zârah hahchawlhna nuam a awm' tih Dura Chawngthu lehlina ‘ropui’ (KHB 421; 2026 no.473) hi grammar-a verb intransitive leh adjective ni si, noun anga kan hman ṭhin gerund/gerundial a ni a. Hei hi Lalpa Ṭawngṭainaa ‘ram te, thiltihtheihna te, ropui te’ tiha ‘ropui' tih nen hian grammar-a an nihna a inang reng a, a thlûk dan tur pawh Zonuam tih thlûk anga thlûk tur a ni. Syllable pahniha a hmasa zâwk (ro) hi ri sâng tawi hat a ni a, a hnuhnung zâwk (pui) hi ri hniam tawi hat a ni thung.

Mi tam takin Mizorama thu leh hla lama ril tak (fam ta) thu ziah vawrh darhin Whatsapp group hrang hrangah te Lal biaknaa 'ROPUI' tih hi 'ROPUINA' tih tur a ni, tiin an sawi ṭhin a; an ṭanna hi a dik si lo. 1 Chronicles 29:11-ah, ‘... ropuina te, thil tih theihna te, chawimawina te, hnehna te’ tih sentence a awm avangin Lalpa ṭawngṭainaa 'ropui' tih hi 'ropuina' tih tur a ni chuang lo a ni.

Chuvangin, hla hriltute pawhin Kristian Hla Bua ‘ropui’ tih hi Zonuam tih thlûk anga Ropui hi thlûk ni se, a dik zaih mai ang.

– Dr.J.T.V.L. Ngheta