Kan mi lârte u, insûm deuh teh u! In veng YMA kha 'An hnawk' i ti ngam bik em?

Tunlai chu Tuikual North Branch YMA leh an venga Kan Inchung Cafe an inṭhêṭhù tihte social media lamah ka lo hmu ve a. A zialo hle mai; a zia-in a daih lo a niang e!

He thil mipuiin kan lo hriat ve chhan bulpui ber chu, Kan Inchung Cafe neituin Tuikual North YMA chunga ngaihdam a dilna video darh kha a nih hmel a. Mi tam takin social media-ah an sawi zui a, chung zingah chuan kan mi langsar leh lâr te pawh an tel. Chung kan mi langsar/lar neihte chuan Cafe neitu an ṭan a, YMA an dem deuh tlangpui niin ka hmu.

Ka rilrua awm ta chu, "Cafe neitu ṭan a, YMA demtute khan, Cafe neitu ang khan an awmna khua/veng ṭheuh branch YMA kha 'An hnawk' tiin an sawi ngam bik ang em?" tih hi a ni? An ngam hian ka ring lo a, an duh ka ring hek lo. Chuti si ngati nge YMA an dem a, cafe neitu an ṭan tlat? A chhanna chu–thil an ngaihtuah chiang lo a, an rilrua awm ang ang an sawi zung zung vang a ni.

Kan mi lârte u, insûm deuh teh u. Thil eng emaw a awma in lo inrawlh chhên hian in intimualpho mai mai. In lâr tawh si!

Social media-a ka thil hmuh vêk hi ka'n sawi tel teh ang. "Ngaihdam dil hi tu lakah pawh ni se, thiamthu sawi zuah zuah chunga dìl chi a ni ngai lo. 'Kan thiam lo a ni, ka lo sawi sual palh a ni, thiamthu sawi tur ka nei lo e, khawngaih takin min ngaidam ru,' tih mai chi a ni."

- Lalduhmawia