"I WILL ALWAYS LOVE YOU" HLA PHENA DOLLY PARTON HRINGNUN THAWNTHU CHU
Sap hla phuah thiam leh zai thiam em em Dolly Parton (kum 80) chuan ni 25.8.2026-ah he khawvel hi a lo chhuahsan ve ta a. A hla phuah, “I Will Always Love You” tih kha khawvêla hla hlawhtling leh lâr berte zînga mi a ni ti ila kan sawi sual lo’ng chu! Tin, he hla hi inngaihzawnna inkar atana phuah a ni lo hi a mak teh daih a nia. He hla phena thawnthu awm, Dolly-i leh a mentor Porter Wagoner-a te inkar, he hla Elvis Presley-a sak a phal ve loh dan leh he hla a hausakpui tak dan te hi a ngaihnawmin kan rawn tar lang dawn a ni. Tin, thutlukna siam thiam a lo pawimawhzia pawh Dolly-i nun aṭang kan hmuh te pawh hi tute tan pawh inzir nan leh entawn tlak a ni.
1. A Bul Ṭanna – Dolly Leh Wagoner Intawn Dan:
‘The Porter Wagoner Show’ chu America ramah kum 1961 aṭanga kalpui ṭan a ni a. A lar vanglai phei chuan kar khat chhungin mi maktaduai 3 velin he show hi an en ṭhin a ni. He show-a zai ṭhin Norma Jean (Pretty Miss Norma Jean tia lar em em) chuan pasal a neih duh avangin he show hi a chhuahsan a. Porter Wagoner-a chuan a thlaktu tur zawn a ngai ta a. Chutih lai chuan Dolly Parton-i hi hmeichhe tleirawl kum 21 mi, lâr vak lo, bul ṭantir chauh a la ni a. Mahse, Porter-a hian a zai thiamna chu a lo hmu ru kiau mai a, a TV show-a zai ṭhin tur chuan a thlang ta a ni. Tichuan, Dolly-i chu Mizoram buai hnu lawk, kum 1967 September thla khan ‘The Porter Wagoner Show’ TV Show hmingthang takah chuan a vawikhat nan a inlan ve ta a ni. Porter Wagoner hi a hunlaia country music khawvela a mi lian leh lar em em mai a ni.
He an intawnna hi Dolly-i hringnun atana vanneihna bulṭanna lian ber a tling ta bawk. Kum 7 chhung zet chu an pahnih hian khawvela country music duo hlawhtling berte zinga mi ni turin album 13 ngawt an siam dun nghe nghe a, lawmman tam tak an dawng dun bawk a ni. Porter-a chu Dolly-i nunkawng hruaitu (mentor) ropui niin, Dolly-i pawhin zah em em ṭhin a ni.
2. An Inṭhen Dan: Hla Hmanga Inthlahna
Kum 7 an thawh dun chhung khan hlawhtling hle mah se mahni thu duh ve ve niin, an luhlul dun em em a, an inhnial nasa ṭhin hle. An inngeih loh dan chu Dolly-i chuan, “Ui leh kel thlun pawlh ang mai kan ni,” a ti hial. Kum 1974 a lo thlen chuan, Dolly-i hian Wagoner-a thlazar hnuai aṭanga chhuah a, a mimal (solo) nunkawng (career) bulṭan a hun tawh tih a hria a, mahse Wagoner -a chuan a chhuahtir a phal si lo.
Ṭawngka maia chhuah dilna chu dil hlawhtlin chi niin Dolly-i chuan a hre ta lo a. Wagoner-a chu hla hmanga thurawn pek chu a thlang ta zawk a. Tuk khat chu Wagoner-a pisa-ah lutin, ṭingṭang nena a hla phuah thar chu a va saksak ta a; chu hla chu "I Will Always Love You" ngei mai hi a ni.
If I should stay
I would only be in your way
So I'll go, but I know
I'll think of you every step of the way
And I will always love you
I will always love you
You, My darling, you, mm-mm
(I kiangah ka awm reng chuan, I kawng daltu mai ka ni dawn a. Chuvang chuan ka kalsan ang che, Mahse, ka ke pen tin hian, Nang bawk a ni ka dawn ṭhin tur chu. Ka hmangaih reng ang che, ka hmnagih fo ang che, ka duhtak!)
Chu hla chuan Wagoner-a mittui a titla hial a, “He hla hi i hla phuah tawhah chuan a la ṭha ber a ni, min chhuahsan thei ang mah se he hla hi keiman ka tichhuak phawt tur a ni,” tiin zah tak leh inrem takin Dolly-i chu a hnuai aṭang chaun a chhuahtir ta a ni.
3. Thutlukna Ril : Elvis Presley-a Sak A Phal Loh Dan
Kum 1974 vel khan “The King of Rock 'n' Roll” tia hmingthang em em Elvis Presley chuan he hla hi sak chhawn (cover) a duh thu Dolly-i a rawn dil a. King of Rock 'n' Roll meuhin a hla saka a rawn dil chu Dolly-i pawh a hlim em em mai a, a ṭhiante pawh a hrilh hial. Mahse, studio-a an luh hma ni chiahin Elvis-a manager khirh zet, Colonel Tom Parker, chuan Dolly-i chu a rawn be lehin, “I hriat tur chu Elvis-a hian mi hla a sak reng rengin, a hlawkna chanve chu a chang ṭhin tih hi a ni,” (“You know, we don't record anything with Elvis unless we get at least half the publishing) tiin a rawn sawi khanglang a.
Dolly-i thinlung a na hle a, zan khuaa a ṭah hnuin heti hian a hrilh ta a. “Hla te hi ka fate ang an ni a, ka upat huna min chawmtu tur an ni. Ka hla tana thihna thlen theitu hi ka pe thei lo che u a ni,” tiin Elvis-a sak chu a phalsak ta lo a ni. Ama copyright hum tlat a duh vanga khawvel zaithiam lâr ber a lo hnial ngam khan Dolly-i thutlukna siam tura a huaisenna leh finna tar lang a ni.
4. He Hla A Hausakpui Dan:
Dolly-i’n Elvis-a laka a publishing rights a lo hum tlatna khan a hnuah ropuina leh sum tam tak a rawn thlen ta zawk a. Kum 1992 khan mi hang zaithiam em em Whitney Houston chuan a film channa ‘The Bodyguard’ soundtrack atan he hla hi ropui zetin a rawn sa nawn leh ta a. He Whitney-i version hi khawvel chanchina single hralh hnem ber pawl a ni ta hial a ni.
Dolly-i’n copyright a lo neih tlat avang khan, a copyright royalties (sum lut) zawng zawng chu a hui ta vek a. Whitney-i version chauh aṭang pawh hian Dolly hian Dollar maktaduai 10 aia tam a lalut a ni. A hunlai kum 1990 chhohah phei chuan tam tak a ni. Dolly-i chuan fiamthu titakin, “Elvis-a manager khan min laksak lo kha ka lawm hle a ni, a chhan chu he hlain sum a lakluh ringawt pawh hian Elvis-a in ‘Graceland’ kha vawi tam tak ka lei thei tawh tlat a ni,” a ti hial a ni.
Dolly Parton leh Porter Wagoner te chanchin hian hmangaihna, inzah tawnna leh kan finna te hi hman thiam a pawimawhzia min zirtir awm e. He hla “I Will Always Love You” hi inthlahna hla a nih rualin, tute tan pawh thutlukna dik siam thiam a pawimawhin malsawmna tam tak rawn kengtu pawh a ni thei tih a chiang a ni.
Thu nawi te te:
* Kum 1992 khan Whitney Houston chuan a film chan hmasak berna (debut), ‘The Bodyguard’ soundtrack atan he hla hi a thlang a. Mahse, a original country music anga sa chhawng lovin, Pop leh Soul ziarang (genre) hmangin a thlak danglam ta daih a. A tifuh ngang mai, hlawhtlinna tam tak a chan veleh phah bawk a ni.
* Whitney-i sak (version) hi khawvel pumah copy maktaduai 40 aia tam hralh chhuah a ni a. Hmeichhe solo artist singles hla hralh tam ber (best-selling single by a female solo artist of all time) a nihtir ta hial a ni.
* He hla hi America rama hla ṭha tehna ropui ber Billboard Hot 100 chart-ah a zawnin kar 14 chhung zet No. 1 a ni thei a. Hemi hun lai hian, chutiang record siam thei vetu hla dang an la awm ngai lo.
* America ram chauh ni loin, khawvel ram hrang hrang, ram 34-ah ngawt singles chart-ah a No. 1 a ni vek thei a ni.
* Kum 1994 Grammy Awards-ah khan he hla avang hian Whitney-i hian lawmman hlu tak tak, ‘Record of the Year leh Best Female Pop Vocal Performance’ a dawn phah bawk a ni.
* He hla music video hi kum zabi 20-na (20th Century) chhunga mimal zaithiam (solo act) video zinga YouTube-a entu (views) 1 Billion nei tling thei hmasa ber a ni bawk.
# Kevin Costner-a Ruahmanna Fing
* Whitney Houston-in he hla a rawn lârpui em em chhan lian tak pakhat nia an sawi ṭhin chu Kevin Costner (a film producer) thurawn vang a ni. Hla bulṭanna a hânga fiah zeta Whitney-i zai kha a ni. Rimawi lama mi thiam te chuan radio lamah hralh a kal lo ang tiin an hnial nasa hle na a, mahse Kevin Costner-a chuan a duh dan ang chuan a kaltlangpui ta tho a. A hânga Whitney-i zai chuan mi tam tak thinlung khawihin, a larpuiin a hlawhtlinpui zui ta em em a ni.
- Rohmingthanga Ralte, Assistant Professor
Dept. of Mizo, Govt. Hrangbana College