FAMILY PENSION-AH THIL MAK A THLENG!

North Eastern Reorganisation Act, 1971 hmangin Mizoram Union Territory a lo din khan, Finance Department hi 1972-ah a ding zui ve nghal a. Mizoram Directorate of Accounts & Treasuries hi May 1975 khan din a ni ve leh ta a ni.

Tunah hian Chief Controller of Accounts (CCA) hnuaiah Director -1; Joint Director-1; Deputy Director-1; Assistant Director-1; Treasury Officers-11; Staff : 271.=G/T 286 an awm mek niin a lang.

Directorate of Accounts & Treasuries din hnuah kum 51 a vei ta mek. Mizoram Treasury hnuaiah Pensioners; 39,954 an awm. Heta tang hian Family Pension dawngtu : 11,194 an awm.

Mizoram Legislative Assembly 1984-85 Budget Speech-ah Finance Department-in chiang taka a record danin Mizoram Government employees-te GPF accounts chu Accountant General, Shillong aṭangin 1 April 1983 aṭang khan Mizoram kutah hlan a ni. Chutah chuan, “363 old pending pension cases pawh A.G., Shillong aṭangin 1st January, 1983,” hian hlan tel nghal a ni tih pawh chiang taka tarlan a ni. Tin, mi 120 chu pensionary benefits pek tura authorize tawh an nih thu tarlan a ni bawk. Mizoramin Pension case a khawih achin kum 43 lai a liam ve leh tawh.

Mizoramin Pension a chin fel ve theih hnuah abikin Family pension case-ah thil mak tak tak a thleng mek. Chu'ngte chu tlem tarlang ila, a ṭha awm e.

◆ Family Pension la mekin nupui emaw pasal a neih leh chuan Family Pension a la thei tawh lo va, mahse, la zui mek zel an awm.

◆ Sawrkar hnathawk fa hrin ni lo emaw dan ang taka fa lak ni lo, Birth Certificate lem siama Family Pension la mek an awm.

◆ Sawrkar hnathawk ni reng chung sia mahni nu leh pa emaw fate emaw Family Pension late an awm mek.

◆ Pensioner ni reng sia mahni nu emaw pa emaw fate emaw family pension la mekte an awm.

◆ Pasal nei reng chung sia pasal nei lo anga inziak a, nu emaw pa emaw pasal sun takte Family Pension la mekte an awm.

◆ Family pension lak duh avanga mahni nu leh pate thih ni emaw pasalte thih ni/inṭhen ni tidanglama family pension la mekte an awm.

Aizawl North & South Treasury Office-in August 14, 2026 Zirtawpnia Kohhran hrang hrang Headquarters 34 an koh khawm khan khitiang case khi Family Pension latute zingah an awm ngei tih a hriat theih. A zahthlak takzet. Zah nachang lah kan hre thlawt si lo. FP lak duh vanga nupui/pasal inṭhen si lo, inṭhen anga divorce certificate nei thei te, pasal nei reng si, nei zuai, nuthlawi zui leh ta anga inchhal te, nupui/pasal nei lai reng si, nei miah lo anga inchhal ngamte leh VC/LC lehkha signed-sa la chhuaka mahni duhdana dahkhat mai ngamte an awm bawk.

Mizoram Kristiante khawsak mek dan hi a va'n rapthlak tehlul êm! Kum 2024- Sorkar hnathawk Aikal la [proxy] zawn chhuah a nih ṭum khan Aikal la mi 3,565 hmuh chhuah an ni a, hemi aṭang hian Sikul Education-ah: 1,115; Health & Family Welfare-ah :624; Power & Electricity-ah: 253 leh Department dang zawngah: 1,373 hmuh chhuah an ni. Heng zawng zawng zinga mak danglam ber mai Guinness World Record-a lang tham leh mak danglam bik tak chu ‘Mitthi tawh si aikal [proxy] la mi 9’ lai an awm thei hi a ni. Heng mitthi tawh 9-te hi lo tho lehin an aikal tur rawn dah felin an thi nawn leh ta tihna em ni ang le? A va'n rapthlak tehlul êm!

A&T hotute manganna tawh mek pawh hi namnul mai theih chi a ni lo. A taka an hmachhawn mek a ni. Dik lo taka F/P la mekte tan PPO surrender hun window period hi 1st July - 30th Sept. 2026 thleng hawn a ni. Hemi hun chhunga PPO pe lette tan an lak tawh dahlet [refund] a ngai lo vang a, action pawh lak zui a ni lo vang. Sept.30, 2026 hnua manchhuahte erawh na taka action nen um zui tur an ni. Luhlul lui zelte tan chuan phurrit tak a ni ngei ang. Jail bang zut tlakte pawwhin an la zut mahna le?

A&T office-in kohhran 34 an kohkhawm nia lang chiang ta ber mai chu sorkar dept. hrang hrang, NGO/VC/LC leh kohhran thlengin dik lohna bawlhhlawhin min khuh paw thur ṭhin a ni tih hi a ni. Tu nge a meizang hlaptu? Tu nge a kaikuang? Tu dik loh ber nge tih chu ṭau meichher chhite nen pawh zawn hmuh a har khawp ang.

A&T office lam pawh hian Family Pension la mek mi 11,194 zing aṭang hian mi eng zat nge dik lo taka F/P la mektu [pension defaulter] tih an hre thei lo hi thil mak a ni. Aikal la [proxy] awm zat pawh chhui chhuah theih a nih chuan F/P defaulter zat pawh hi an hre thei tur a ni. Mizoram pumah Treasury Officer 11 chauh an awm a, hotu lu & staff-te nen an vaiin thawktu mi 286 vel zet an awm niin a lang. Uluk takin bial tinah pension defaulter zawn chhuah hna thawkin spot verification neiin ‘Headcount’ nei se, defaulter man chhuah apiang tihtawwpsak hmak hmak ngam zel se, a thlawna mipui sum tham ral mek hi a bo duak thei dawn a ni.

- Dr. C. Lalrampana