Nl. Lalremsiami Chhuanawmzia Hi

Mizote hian lawmte lâwmpui leh chawimawi phute chawimawina kawngah hma kan sawn ve tawh hle. Ṭapte ṭahpui leh tuarte tawrhpui lam hi chu Mizo tlawmngaihna thûk tak neihsa avang hian infuih tehchiam kan ngai lêm lo. Lâwmte lawmpui lam erawh inzirtir kan ngai deuh. Mahse, tunah hi chuan he lamah pawh hian hma kan sawn ve tawh viau.

Mizo nula fel tak leh tumruh tak, khelkâwm lek thiam êm êm mai, khawvel hriata hming chher mektu Lalremsiami Hmar Zote kan nei hi chu a va'n chhuanawm tehlul êm!

Lalremsiami/Siami hi March 30, 2000 khan Kolasib-ah a piang a, infiam ngaina tak, a bikin hockey khel thiam leh tuichilh tlat a ni. Kum 10 vel lek a nih aṭangin hockey a khel ṭan a, kum 11 a nihin Thenzawl Hockey Academy-ah lutin, 2016-ah National Hockey Academy, New Delhi-ah a lut. Kum khat hnuah India senior team-ah a debut ta a ni.

Hockey-ah a position – forward a ni a, midfield-ah pawh a khel thei. India senior team-ah 2017-a a tel a, India tan official profile-ah vawi 187 a khel tawh a, international goal 46 a ni. Olympics Tokyo 2020-ah palina, Asian Games 2018-ah silver leh 2022-ah bronze medal. Youth Olympics 2018-ah silver, Asia Cup 2017-ah gold, Asian Champions Trophy 2023 leh 2024-ah gold ve ve. FIH Rising Star of the Year 2019 a ni a, Hockey India Asunta Lakra Award (U-21) 2019 a ni. Mizoram aṭanga Arjuna Award dawng hmasa ber tur a ni. A hlawhtlinnate hi a va'n ropui tehlul êm!

Arjuna Award-ah eng nge a dawn? Arjuna Award hi sport discipline hrang hranga outstanding performance neite chawi-mawina a ni. Official criteria-ah kum 4 chhung performance, leadership, sportsmanship leh discipline te ngaihtuah a ni. Mizoram tan chuan he achievement hi record thar a ni. Mizoram aṭanga Olympic-ah female sportsperson kal hmasa ber pawh a ni bawk.

Kolasib khua, district leh Mizoram leh hnam, India timualphotu ni lova tihmingṭhatu Nl. Lalremsiami chhuan-awmzia hi sawifiah sen rual a ni lo. Sorkar pawhin an theih tawkah an chawimawi thiam hle. Zoram pum leh Zoram khawvela Zo hnahthlak zawng zawngte pawhin kan chawimawi thiama kan hlut a va'n pawimawh êm! Pathian nung betu kan nih angin hma a sawn chhoh zel theih nan leh a nu leh pa chhungkua leh ṭhenrual unaute hian theihtawp chhuaha kan chawimawi a, kan ṭawngṭaipui reng a ṭha hle.

Hetih lai karah hian, miin dinnmun ṭha a chan veleha hrethiam ve mai duh lo, îtsîkna leh elrêlna ṭha lo tak nena lo châng khiau ṭhin an awm. Hei hi tun thlenga kan la zir hlawhtlin theih loh, zirlai subject harsa tak kan neih mek a ni. Miin dinhmun ṭha a chan veleh an chhiatna lai kawng hrang hrang, dâwt leh thu belhchian dâwl lo hmanga fawm khawma vawrh darh ching leh rêl phar ching an tam thei hle.

Kan mi hmingṭha, chhuanawm leh chawimawi tlakte hi kan lawmpuiin kan chawimawi ve duh lo va, kan lo îtsîk ru hle a nih pawhin ngawi rengin awm ngam mai ṭhin ila. Mahse, mi nuna buai tak tak, mahni nihna bak baka lan mawi tum ṭhin; Mizo zingah kan la tam ṭhin.

Hawh u, Zo fate hi harhin, kan ram rohlu, mi huaisen leh chhuanawm tak takte hi theihtawp chhuahin i chawimawi zel ang u.

-Dr. C. Lalrampana