WHAT THE BIBLE SAYS!

Lal Isuan ṭawngṭai dan tur min zirtir a. Pathian kan koh dan tur chu "kan Pa" tih emaw "ka Pa" tih emaw a ni. Keini hian "Lalpa" kan ti zel si. Thuthlung Hlui hun lai kha chuan Pathian sawi nan "Lalpa" tih hi an hmang ṭhin a. Pathian tih hi an hmang ve bawk chauh a. Lal Isua min zirtir ang kha kan ṭawngṭai dan tur chu a ni. He ṭawngṭaina hi mimalin emaw mi eng zatin emaw a ruala kan hman chu a dik tho ang. Mahse a thu ngawt ni lova, ṭawngṭai dan kalhmang "pattern" a ni tel ang tih hriat tur a ni. Pathian kan address dan tur chu Lalpa tih ni lovin “ka Pa” emaw “kan Pa” emaw tia biak tur a ni. Kan Pa emaw ka Pa emaw tih hi kan zei lo a nih pawhin "Lalpa kan Pathian" tih chu a dik ang. Lal Isua hian Pathian hi "Paa neih" turin min duh a. Lalpa tih chuan A lalna lam a entir a, Pa tih erawh chuan min hringtu, min hmangaihtu, min duattu, nêl taka kan biak tur a nihna a lantir. "I lalram lo thleng rawh se" tih hi khawvelah Pathian lalna ram "Kingdom of God" lo thleng tura dilna a ni. Pathian lalrama luh hi piantharna a ni (Johana 3:3,5; Kol 1:13). Piantharnaah hian Lal Isua chu kan tana lala neih tur a ni a. Chu chu Pathian lalrama luh tihna a ni.

Pathian lalram hi kan khawvela thleng mek a ni. Thlarau lam lalram (spiritual kingdom) a ni. Pathian lalram, leilung ngeia lo awm tur chu Lal Isua Second Coming-ah A rawn din ang. Leilung luah khawvel lalram a la awm dawn a nih chu. Chu chu lo thleng tura dil tur a ni. Hei hi chu kan dil loh ber thil a ni awm e â! He lalram hi chu thlarau lam lalrama member ni tawhte luhna tur a ni. Lal Isua "thlarau lam lalramah chuan i lût tawh em?"

Kawng khat dang, “Mi sual lakah chuan min chhandam zawk ang che,” tih hi! Sual tura thlemna tih hi kan ni tin sualna sawi a ang nâ a, kawng dang kawh a nei âwm asin. "Sual tura thlemna" tih hi New Revised Standard Version chuan "time of trial" a ti. Chu chu "fiahna hun" a ni. "Misual lakah chuan min chhandam zawk ang che," tiha misual tih hi Todays English Version chuan "the Evil One" a ti. “Mi pakhat, sual tak, ropui leh thiltithei tak” a kawh a rinawm hle. IVP The Bible Background Commentary chuan Bible scholar ṭhenkhat chuan Lal Isua lo kal leh hma chiaha lo thleng tur Hrehawmna Nasa Tak, laka himna dil tura tirhna niin an suggest e a ti. I piangtharin chu hrehawmna nasa tak Lal Isuan A sawi (Matt 24:21,22) lo thleng tur chu vana chhohsanin him takin i awm thei dawn em?

Kan Bible-a inziak ve lo, “Lalram tê, thiltihtheihna tê, ropuina te” tihte hi Lal Isua min zirtir kan ti thei hauh lo. Kutziak bu ṭha ṭha tam takah he lai thu hi a awm lo. Mahse ṭawngṭaina thu ṭha tak chu a ni. Chuvangin, "Lal Isuan min zirtir angin i ṭawngṭai rual ang u" kan tih si a, min zirtir tih lanna awm si lo sawi tel ve hi a sual ang em? Sap ṭawnga “the kingdom and the power and the glory” tih hi engtin nge kan tih zel dawn? Glory chu "noun" thil hming a ni a, definite article "the" hian a tichiang lehzual a. Ropuina ti lova Ropui te tih ngawt hi a dik thei lo ve â! Adjective ni sa pawh hi a hmaa "the" an dah chuan noun-ah a chang zawk alawm! The good and the bad kan tih chuan "thil a ṭha leh ṭha lote" sawina noun-ah a chang daih a ni. "Hman lai tih dan" emaw "kan lo tih ṭhin dan a nia" tia seh ngheh ringawt tur a ni lo. Ropuina a ni e!

- F Lal Thanzuala. 9436141242