NUPUI THIKTHUCHHIA

Ni khat chu ka ṭhianpa hi tlai Office ban hnuah thil eng emaw min tihtlaipui lawk turin fawnin (phone) ka sawm a, min hnial hreh tih hriat tak hian, aw ban deuh tak hian a aw hram a. Inthiam vak lo tak chungin Office ban tawh hnu chuan keima mi mal thil kan ti khawtlai ta a, Thlasik ni rei loh lai a nih avangin khua a thim hma hle a, khaw thim thet thetah kan thil tih chu kan zo hman hram a. In lam pana kan haw kawngah chuan, ka ṭhianpa chuan, "Kan nu chu a lo thinrim leh hle tawh ang chu, office ban hun pangngai aia haw tlai hian, min ringhlel ve ziah ringawt mai", a ti bal bal a, Kei chuan, "I haw tlai chhante i sawi mai lawm ni," ka ti a, Ani chuan, sawi mah ila, a awih ngai chuang hlei ne'm, a ti mai a. Kan inṭhen dawn chuan, ka ṭhianpa hnenah, Eng emaw avanga kan haw tlai hian, nupuite hnenah chuan, chhuanlam awihawm tak kan siam thiam tur a ni a. A bikin an chhungkhat laina lamhnaite avanga haw tlai kan nih thu, 'Dawt var' sawi mai tur, ka tizauh a, kan inṭhen ta a.

Ka ṭhianpa hi thingtlang aṭanga khawpuia lehkha zira lo awm niin, khawpui pa hausa fanu nula senior amah aia upa zawk nupuiah a nei a, a thikthu a chhe em em mai a. Tunah hian Office pakhat-ah a nghet loin hna a thawk ve a, mi in hnuai luahin veng pakhatah a nupui fanaute nen an khawsa mek a ni. Office hmun khata thawk kan nih loh avangin kan inhmu zen zen lo a, Ni khat chu Bazar-ah kan inhmu nawlh mai a, an chhungkua an ṭhat tlan leh ṭhat tlan loh ka zawt a, nui deuh vur vur pah hian, "ṭha tlang e, Lo kal teh, thingpui dawr-ah hian i chawl lawk teh ang" tiin thingpui dawrah min kai lut a. Thingpui kan in pah chuan a nupui thikthuchhia a tih lawm dan, nui huk huk pahin heti hian a sawi a.

Kan thawhpui nula pakhat hi kan nu hian a thik tlat mai a, veng khata chengho an nih ṭhin vanga inhria an a ni nghe nghe a. Kar hmasa pawh khan kan thawhpui nula chuan a birth day-ah a thawhpuite zanriah chaw ei pui turin min sawm hlawm a, Chu mi chungchang thu pawh chu kan nu ka hrilh ngam lo a ni, ka hrilh chuan ka kal ve a phal dawn lo hrim hrim a.Tunah hian kan thawhpui nulate awmna vengah hian kan nu chhungte pawh an la awm ve a, Ka nupui chhungte chu kalpahin an ṭha leh ṭhat lohte ka zawt a. In lo nghaktu naupang chuan an ṭhat thuin min lo chhang mai a. Kan thawhpui-nute inah chuan, chaw chu kan han ei ho ta laih laih a, chaw ei khawm ngang kan ni a, ei kham hnuah pawh kan titi atalangin kan haw tlai ta phian a. In ka thlen chuan kan nu chu a lo tum nasa ngang mai a, biak pawh huphuhawm tak a ni a, ṭhutphaha ṭhu pahin, "I chhungte kan tlawh kual zawk e, ka ti a, I nu hi chuan min duat ṭhin lutuk a, chaw ei rawh a titlat a, chaw ei kham hnuah pawh eng eng emaw hi min ei tir leh a, ka va puar tak em," puar hmel takin kan ti zaih a. ka puar reng lah tak a. Ka nupui hmel chu thawklehkhatin a danglam nghal vek mai a. Hlim hmel tak hian, "I inbual duh em, Hei tui lum pawh a awm a nia, kan siam a nge" tiin ka inbualna tur chu phur takin a siam ta a, tiin min hrilh bawrh bawrh a.

A nih leh, ka thil pawimawh min tihtlaipui tlai khan, engtin nge i inphat mar tak a, tiin ka zawt a. "A ni tak, kha mi tlaia kan inṭhen dawn a, i thusawi aṭang khan a lawm, tih dan tur ka hriat tak ni. Kan in lam pana mahni chauha ka kal lai khan tih dan tur ka ngaihtuah nasa mai a. Chutah thil pakhat ka ngaihtuah chhuak ta a. Kha mi ni khan, ka nupui ṭhiannu, College a kalpui ṭhin thingtlanga pasal nei chu, kan office-ah a rawn leng hlauh mai a, thingpuite ka lo inpui a. Chu chu ka ngaihtuah chhuak a, kan nu hnenah chhuanlamah ka hmang ta a. In ka thlen chuan, "Nui, i lo buai em? Vawiin tlai kan ban dawn ṭep-ah I ṭhinnu Mawii kha, a lo leng a, a thlennaah min va thlah rawh a ti a, thingpui in loa ka haw a phal leh si lo a, ka tlai phah ta vek a lawm," ka ti zung zung a, kan nu chuan, "Awi a, Mawii chu, hmuh ve ka va chak tak e, an ṭha tlang em," a ti ve ta luam a, thinrim miah lovin, lungawi takin kan awm ta a nih kha. Tunah chuan kan nu thikthuche lutuk tih lungawi dan tur i zarah ka hre ta a nih hi, a ti a, kan nui dun bawrh bawrh a.

- Hausanga Hauzel