Thu dik lo ziaka thehdarh a pawi

'Dindini case chhuina kawnga mi pawimawh SP Muantea sawn a ni hi a hun lo mang e!' tih thu August 28, 2026 khan social media-ah thehdarh a ni a, he thu ziaktu pawh media lama mi langsar tak, Pu Vanneihthanga a ni. Kha thuziak kha ka chhiar ve a, thil hre chiang lo taka ziah a ni tih ka hre nghal a. A zialo ka ti a, sawrkar tan phei chuan a huatthlala duh viau maithei.

Kha thuziak paragraph hmasa berah chuan Mualṭhuam North tleirawl thihna nen sawi zawmin, "Chutiang hna laklawh, mipui ngaihven rawn an buaipui mek lai a, Lunglei SP sawn a ni tlat mai hi a mak viau a ni! Sawn a nih chhan sawifiahna a awm lova, khawiah nge an post dawn tih sawifiahna a la awm bawk hek lo," tia ziah a ni.

A ziaktu hian thil a hre chiang lo tak zet a ni. Mualṭhuam North tleirawl a bo hma khan Lunglei SP Pu J Lalmuankima transfer order a chhuak tawh. Tleirawl lainatawm tak khan August ni 3, 2026 zan dar 8:30 vel aṭanga chin hriat loha awm a ni a, Pu J Lalmuankima transfer order erawh chu August ni 3, 2026 chhun lamah a chhuak tawh. Transfer order leh Mualṭhuam North tleirawl thihna leh hnu chhuina hian inzawmna a nei lo hulhual a ni.

"Eng vangin nge sawn a nih? Khawiah nge an sawn dawn? Heihi mipui zawhna lian tak a ni bawk a." a ti a; "Sawn a nih chhan sawifiahna a awm lo va," a ti bawk. Mipui zawhna a tih hi, a ziaktu zawhna mai a ni zawk lo maw? Sawrkar hnathawk transfer order-ah transfer an nih chhan ziah a ni ngai lo a, ṭawngkaa sawifiahna pawh a awm ngai lo tih a hre lo a nih hmel. "Khawiah nge an sawn dawn?" Chhanna–August ni 3, 2026-a transfer order-ah khan a awmna tur tihchian nghal vek a ni.

"Mizoramah Police officer, a bikin SP level chin chunglam sawn hi a huhova siksawi hi tih phung a ni a," tiin, hun ṭhenkhata (vawi 2) MPS ṭhenkhat siksawi dan a ziak a. "Tun ṭum anga Lunglei SP a hma hruaia sawn chhuah hmasak a ni kher hi a mak viau a, zawhna a awm lo theilo a ni!" a ti bawk.

Lunglei SP chhuak ta Pu J Lalmuankima hi amah chauh sawn a ni lo va, a transfer order-ah hian amah bakah MPS officer dang 5 lai sîksawi (sawn) a ni.

Mizo mipui hriat hlawh, mi tam takin an ngaihsanin thil hre chiang si lova thu a ziak vak mai hi a zialo angreng. A thu ziak leh sawi te hi a dik tura ngai ve tlat mi tam tak an awm bawk si. A ziah dan hi thil ni thei àwm ang taka lang, thil nihna dik tak ni miah si lo a ni a, hetiang chi hi 'conspiracy theory' an ti a. Mi tam tak rilru hruai sual theihna, rilru dik lo puttir theihna, helna rilru neihtir theihna a ni ṭhin.

Chuvangin, ka ziah chhan ber chu–mi tam tak chhiar tur leh ngaihthlak tura thu ziak leh sawiah hian mi tin kan fimkhur a ngai em em tih hi a ni. Mi hriat hlawh tawhte phei chu an fimkhur a ngai lehzual. Thu dik lo thehdarhtu ni lo turin i fimkhur tlang ang u.

- Zoramchhana