He ni lawmawm hun tawite hi
Kan nghahhlelh em em Krismas chu ni tlemte chauhin min dang ta! A lo thleng ang a, a liam leh mai dawn. Tun hun hi a nawm lai ber chu a ni zawk mah awm e. A hun leh ni chu a lo thleng mai a, ‘A va rei lo em, a va uihawm em!’ kan ti a, a liam a ni chawpchilh mai.
Zaithiam/ hla phuah thiam fam ta Roliana Ralte chuan he hun hlutzia, nghah-hlelhawmzia, mah se reilotea a liam leh tak vung vung
ṭhin si dan te hi hmu chiang em emin - ‘Hmanah chuan len-rual duhte nen, fakhla saa tlaikhua varin, hlim ni ral tur ui em emin, Lal lo piang hlimte’n kan lawm,’ a lo ti vawng vawng tawh. Ni e, he hun lawmawm hi ui leh am em emin kan hmang a, ui em em mahila, kan chelh din zawh rual lah ni si lo.
Tichuan, kan hmang dawn chauh emaw kan tih laiin a liam leh ta vuah vuah mai ṭhin si a, a lo thlen leh hun chu damrei nghah thil a lo ni leh ta mai si ṭhin.
The Shadows ho hla lar zet, ‘Mary Anne’ hla thu min ti hre chhuak : ‘How slow the moments go, but how fast they fly, the next time i see Mary Anne’ tih hi. A bialnu hmuh leh kawm a chak em em hmuh leh kawm nan khan hun hi kal muang a ti lulai khawp a, mah se an han intawng a, an han inkawm ta cheng a, hun chu kal chak a ti leh ta lutuk si a. Hetiang chiah hian Krismas pawh hi kan nghakhlel em em a, mah se a lo thleng a, a liam chawpchilh a ni leh mai ṭhin si a!
Albert Einstein-a’n a Theory of Relativity a hrilhfiah dan pawh ka hrechhuak bawk. ‘I bialnu/ bialpa nen minute 5 hun in hmang a, rei lo hi i ti lulai khawp a, i kham lo a. Minute 5 chhung chiah tho meiling han ṭhut thung teh, chatuan ai pawhin rei i ti si ang - minute 5
ṭheuh ṭheuh. Chu chu Theory of Relativity chu a ni,’ a tia lawm. Krismas pawh hi kan nghahhlelh em avangin a lo thleng ang a, a liam leh nghal mai dawn bawk, rei lo kan ti leh ngawt ang. A va han uihawm lawk em!
Nang leh kei chuan kan nghakhlel a, hlim taka kan hman theih avangin rei lo kan ti a ni mahna. Mahse awmlai vei leh lusun fa te, retheih bakberh leh chet lei leh rahbi tleu laklawh vanga Krismas huphurh ngawih ngawihte chuan he hun reilote emaw kan tih hi hreawm tiin chatuan tlukin rei an lo ti ve ngawih ngawih mai thei asin.
Chuvangin, kumin Krismas chu kan theih ang leh phak ang tawkin rethei chanhai leh awmlai vei, lusunte tan hun hmang ṭheuh ang u aw. Krismas chibai ule.
- Ramhluna Hnamte