Mizoram mamawh computer exam centre
Mami chu competitive exam tana inbuatsaih mek Mizo nula fel tak a ni a. Kum tluanin exam turin hah takin a zir a, coaching tan pawisa tam tak a seng a. Exam a han hun chiah chu a exam card-ah chuan Agartala ah exam tur a ni tih a lang ta tlat mai. Agartala-ah a zuk kal a, a bo a, a exam centre chu tlai takah a thleng a. Kum tluana a inpuahchahna chu a thlawn mai a lo ni ta.
Mizoramah hian computer exam centre mumal kan nei lo hle a. India rama competitive exam lian ho chu Ion Digital Zone, Mualpuiah kan exam tlangpui a ni.
Exam centre kan mamawh belh nasa
NEET exam chu Computer Based Test (CBT) mode-in kalpui a ni tawh dawn a. A awmzia chu, tun dinhmunah chuan Mizo zirlai tam zawk chu Mizoram pawnah an exam a ngai dawn a ni. Hei hi zirlai rethei tan chuan phurrit a tling tham dawn a, kalpui nei lo tan phurrit a ni tham dawn a ni. Mi thiam tak tak tur kha testing centre kan neih loh vangin an talent kha kan chhawr ṭangkai thei lo dawn a ni. NEET mai bakah exam hrang hrang RRB, SSC, chartered accountant tih leh a dang tam tak Mizoram chhunga exam duhte hian an exam theih loh phah dawn a. Sum senna a tam a, a huphurhawm. Home town-ah exam leh hah taka zin hnua exam centre zawn chawp bawka exam chu a inang thei lo.
CBT centre chu engtia din tur nge?
Computer lei ṭeuh a tawk mai lo a; a tlangpuiin franchise zawm ve a ngai. TCS Ion franchise hi India ramah chuan an zawm tlangpui a, anni hian franchise nan hian a tlem berah nuai 15 an la. Chu bakah chuan space, hardware, power tih velah duh dan bik an nei bawk. Din hi thil awlsam a ni lo a, private-in an din tlangpui bawk a ni.
Business ṭha a din nan eng nge thlen ngai?
MPSC hian a exam hi CBT mode vekin conduct thei ta se heng exam centre ho hi Mizoramah a viable dawn a ni. Tun dinhmunah chuan central exam hi kum khatah vawi 7 vel a awm a, thla khata vawi khat income neih loh chang an nei dawn a, exam centre tam tak emaw lian tak din hi a viable rih lo. MPSC hian exam centre hi chhawr ta se a viable phah sawt a rinawm. Hei lo pawh hi tih dan ṭha zawkte pawh a awm ka ring a; kei aia hre zawkte pawhin ngaihtuahna lo seng ula.
Kumin chhoah RRB, NEET, JEE leh CBT dangte zirlaiin an hmachhawn dawn a, MZP pawhin hma a la mek niin a lang. Mizo mipui, NGO leh sawrkar te hian kan ṭhalai, kan zirlaite tan hian sum, tha leh ngaihtuahna kan seng dawn em? Nge hnam dang laka disadvantage lian tak an nei chho tur hi kan thlir liam mai dawn?
- V Lalchhandama