Jio hmunpui Reliance Corporate Park-ah

India rama mobile phone service ṭhangduang tak Jio hian tun September 5, 2026 hian kum 10 a tling dawn a. He Jio tin jubilee thleng tur pual hian Jio leh a neitu Reliance Industries chuan India ram state ṭhenkhata journalist-te Mumbai-ah sáwm khawmin, August 24, 2026 khan an hmunpui an fanpui a ni. Journalist-te hi state pakhat aṭangin pakhat zel an thlang a, state tin aṭangin an thlang lêm lo thung. Kei pawh min rawn sáwm ve hlauh a, hmarchhak state aṭangin mi panga kan tel a ni.

Min sáwmtute an hausa turú bawk a, hotel changkâng tâwkah min thlentir ka ring a, a dik tak chuan Taj Hotel ka mitthla deuh roh! Mahse, Reliance hian Navi Mumbai-ah khualbûk ṭha em em mai - Beverly Park Residence an nei a, chutah chuan min thlentir. Beverly Park Residence hi Reliance mikhual, India mi pawh, ramdangmi pawh thlenna tura an siam a ni a, anmahni sawi dana tower 10 lai, chhâwng 17-a sang ṭhah a ni a, India rama 5-star hotel tam tak aiin a lian fê zawk a, a changkang bawk. Ka lo mitthla rauh rauh hotel-ah min thlentir lo mah se, lung a awi viau!

Reliance Corporate Park

August 24, 2026-ah chuan Jio hmunpui, Reliance hmunpui ni bawk, Reliance Corporate Park (RCP), Navi Mumbai-a mi chu min fanpui ta a, pui dung dung tak a ni. RCP hi venhimna an ti khauh viau mai a, mahni langa thlalak pawh phal a ni lo (a rûk chuan a lak theih tho mahna!) RCP hi acre 500 chuanga zau a ni a, Reliance ho sumdawnna pêng hrang hrangte hmunpui awmna a ni. Hna an thawhna hmun in (building) nalh tak tak 20 chuang, ropui tak tak a awm a, intihhlimna hmun (open space) zau ṭha tak, nalh tak tak, hring dep dup a awm. Sport academy a awm nghal bawk a; cricket stadium changtluk tak, football ground ṭha tak leh infiamna chi dang hmunhmate a awm bawk.

Kal kal chhan ber Jio Platforms a nih angin, RCP-a hmun min fanpuite pawh Jio office, bungrua leh khawlte a ni ber a, Reliance hnuaia pêng dang min tlawhpui lem lo. Jio an tih ṭan aṭanga tun thlenga an dinhmun, an hmalakna, hna an thawh dan te min hrilhfiah a ni ber a, sawi dawn chuan sawi tur a tam mai. Chung zinga langsar tak pakhat chu - India rama mobile service kalphung thlak danglamtu an nihna hi a ni. Jio hmalakna avangin service provider dangte pawhin a hmaa an tih ngai loh an tih ve zel a ngai a; chumi hlâwkna chu mipuiin kan lo chhawr ta e mem a ni.

Jio Platforms hi September 5, 2016 khan hawn a ni a, 4G service an kalpui ṭan nghal. Tunah hian 5G network hmangtu mi nuai 2,685 an nei tawh a, March 31, 2026 khan India rama a hmasa ber turin mi dang thil ring miah loa 5G network an hawng. Kum 2026-ah hian India rama wireless data traffic-a 60% chu Jio a ni, an ti a; Jio hmangtute'n thla khata data an hman chu chawhrualin mi pakhatin 42.3 GB zel an hmang ang a nih thu an sawi. Tuna Jio-in an hmalakna lian tak pakhat chu artificial intelligence (AI) a ni a, JioBrain an ti.

September 5, 2016-a Jio Platforms hawn a nih hnuah Jio hi India rama mobile phone service provider zinga ṭhang chak ber a ni a, hmarchhak bial bikah phei chuan a ṭhang chak lehzual. Hmarchhak bialah chuan Jio hian tlangzarh a nih kum 2016 khan subcriber mi nuai 1,07,000 vel chauh a neih laiin, June 2026-ah chuan mi 47,02,000 vel an nei tawh a, Airtel (mi 68,09,000 vel) erawh an la pha lo deuh. Chutihrualin, kum 10 chhunga NE-a Jio ṭhanna hi 4,294.39% a nih laiin, Airtel ṭhanna chu 67.31% a ni thung.

JIO PLATFORMS DINHMUN TAWI

◆ Jio hian thawktu mi 11,303 an nei.

◆ Home broadband hmangtu mi nuai 271 an nei (March 31, 2026 dinhmun).

◆ JioTV, Jio Hotstar, JioCloud leh thil dang tam tak an nei a, hmangtu an tam hle.

◆ Thingtlang hmun kilkhawr atan JioSpaceFiber (satellite broad-band connectivity) an pe.

◆ India rama customer mi nuai 5244 vel an nei.

◆ Kum 2024 khan cheng vbc 1,09,558 an la lut a, kum 2026-ah chuan cheng vbc 1,46,885 a kai chho.

Nita Mukesh Ambani Cultural Centre

Reliance Corporate Park min fanpui zawh hian Mumbai khawpui lailia Dhirubhai Ambani Square huam chhung, Jio World Centre-a Nita Mukesh Ambani Cultural Centre min fanpui leh a, hei pawh hi pui riu reu tak a ni. Thil chi hrang hranga chei mawi a ni a, a chhuat leh step-te kha a tle sêt sût hlawm vek mai a, a pui hem hem teh e. Thawktu tam tak an awm a, chung zingah chuan hmarchhak mi eng emaw zat an awm a, Mizo pawh an awm nual a, mahse, kan tlawh lai hian an off lai tak a lo ni hlawm. Manipur lama Hmar nula pakhat erawh ka hmu fuh hlauh.

Nita Mukesh Ambani Cultural Centre hi India hnam thil chi hrang hrang tihhmsawnna leh venhimna atana Mukesh Ambani nupui Nita Ambani, Reliance Foundation hotunuin a din a ni a, March 31, 2023 khan hawn a ni. A hawnnaah hian Penelope Cruz leh khawvela mi lar dang eng emaw zat an tel an ti. Centre dinna atan hian cheng vbc 120 vel an hmang niin an sawi. A chhungah hian thil chi hrang hrang a awm a, mawi tak veka chei a ni a. Conference hall leh studio ṭha changkang tak tak a awm a, hmun ṭhenkhatah puan leh chhuatphah an lo tah mawlh mawlh a, India rama hnam hrang hrangte thuam (traditional dress) pholanna leh zawrhna a awm a, VIP/VVIP-te chawlh hahdamna tur bullet proof pindante pawh a awm.

Ṭhutna (seat) changkang tak 2,000 awmna theatre - Grand Theatre an tih kha a 'bon' tak zet a, khatiang theatre hmang tur kha chuan neih ṭê ṭâw hle a ngai ta ve ang. Lift/elevator mawlh mai kha - khawvela lift lian ber a ni a, square ft 277-a zau, mi 200 chuang lenna leh khai zo a ni - Aizawla kan sitting room lian tak ang hi a ni mai!

India ramah hian Ambani chhungkuain huháng an ngahzia an sawi ṭhin a, Mumbai-ah a nasa lehzual a. Chu chu Jio/Reliance sàwmna anga an hmunhmate min fanpuina aṭang hian ka zuk ‘feel’ pha ve deuh! Mukesh Ambani hi ka hmu châk lêm lo a, a nupui Nita Ambani erawh a chhiat loh reuh êm avangin ka hmu châk fu (zâwngte mit hup chungin); mahse, hmuh chu a teuhin a hnai lo!

- K Zothanpara