KAN PA PUI ROH HI

Tlai khat chu kan veng ṭhenawmah thil pawimawh tiin ka leng a, ka kal tumna ka thlen hmain ka hmaah hian pa pakhat hi a kal pai chawn chawn mai a. Kal ngil chu a tum ve hle tih chu a hriat a, Mahse, a thei ngang lo ni tur a ni. Kawng sirah chuan a ṭhu-mu ta tawp mai a, Ka'n en chian nak chuan ka hmel hriat a lo ni reng a, ka kalna tur lam chu an In awmna a ni tho bawk avangin, "ṭhianpa, ṭanpui i ngai em ni?" tiin ka zawt a, ṭawng seh chilh deuh nak hian, " Khawngaihin kan In-ah min hruai haw teh aw," a ti a. A ban chu ka koki-ah la choin, kuah titih hian an in tleng chuan ka hruai ta a.

An in kan thlen chuan, an fate naupang tete leh a nupui chuan phawk deuh tak hian min lo en thap mai a, An nu chu rang taka lo tho chhukin, "Awi ka pa pui roh hi chuan min va ti zak ṭhin tak em! Zu in hi a sim thei ngang lo a nih hi, Camp aṭangin nimin maiah a lo chhuak a, tunah a rawn rui haw leh ta a ni maw? "Ka thin hian a tur thin lo," tiin a pasal samah a kek nawk nawk a, a hnung zang-ah chuan a tum zawt zawt mai bawk a, ṭhutthlengsei-ah chuan a pawt ṭhu nghal ta hnawk mai a ni. An pa a lo tih dan chuan ka ngaih dan a pel ve ta deuh a, "In pa hi zu in mi a nih avangin i zah lo a nih pawhin, chhungkaw pa ber a ni ve a, i zahna i tilang tur a ni dawn lawm ni, Mipate hi hmeichhiate hian zahna an lan tir hi Pathian thu nen pawh a inmil a ni, ka ti ve ta ngat a. Awm pawh awm rei duh lovin ka chhuah san ta daih a.

A hnu kum thum velah chuan an vengah inkhawpui hmanga ka kal ṭumin inkhawm banah Biak In aṭanga ka chhuak chu, pawnah chuan hmana a zu rui ka kuah haw tak nupui khan min lo chang ran mai a, "Vawiin tlai chu kan Ina chaw ei turin ka lo chang che a nih hi, kan Kohhran hruaitute pawh ka hrilh vek tawh a, mi dang Ina i thlen ka rem ti lo hrim hrim,' a ti tlat a. An ina chaw ei tur chuan kan inzui haw ta a. An In pana kan kal lai chuan, "Kan pa zu rui i rawn kuah haw ṭum a, i thusawi "Mipate hi hmeichhiate hian zahna an lan tir hi Pathian thu nen pawh a inmil a ni," i tih kha, ka ngaihtuah zui nasa mai a. Kan pa hi zah tur angin ka lo zah tawk lo hle tih ka inhre chhuak a, ka theih ang angin ka zahna ka tilang ta a ni. A hnathawk lo hawte hian, thil dang ka tih lai dah ṭhain ka lo buaipui vat vat ṭhin ta a, a chawhmeh duh zawng nia ka hriatte hi ka lo siam hram hram zel bawk a ni. Zan mut dawnahte hian a lukham hi a ngai reng pawh ni mah sela, "I pa lukham hi a nuam lo ang" tiin ka let thawk thawk a, ka beng thak thak ṭhin a, A muttui phah ve hlein ka hre ṭhin.

Ni khat chu kan ṭhenawmten an vawk an hralh a, an vawk leh kan vawk chu an intiat chiah avangin an hralhna man ang zat chuan kan vawk hi lei duh chu awm se chu hralh ve mai pawh ka pawiti lo tih thu hi ka sawi a. A chhan chu kan hautak em mai tiin a thuphungin ka sawi mai mai a, a karlehah chuan, zankhat chu vawk lei duh hi an rawn leng thut mai a, kei chuan, "A pa thu thu hi a ni mai, hralh a phal chuan a man zat turte pawh a hrethiam vek ang, kei chu hmeichhia ina awm chawt mai hi ka ni a, mi ningkhawng pawh hi ka hre ve tak tak lo, ka titlat a. Kan pa chu rawn ṭawng chhuakin, "A vulhtu kan nu hi a hah tawh em mai a, chuti zata in ngam chuan lei ta che u", a ti ta mai a. A mak ka ti ngei mai, kar hmasaa kan ṭhenawmte vawk hralhna man zat ang chiah khan a rawn chhiar ve ta mai a, a hria pawha ka ngaih loh, a thuphunga ka sawi mai mai kha a lo hre reng niin, Kan pa hi engmah lungkham leh enghelh nei pawha ka lo ngaih loh kha a ni a. Amaha rinna ka nghah chuan a rin tlak dawn tih ka hre ta a ni.

Tlai khat chu maw, kan pa hnathawh hlanin zu ka lo lei a, zanriah kan ei dawn chuan thingpui inna noah kan chhungkaw kimin ka thli ta dal mai a, "I pa hi kan chhungkaw innghahna a ni a, kan tana ṭha lo tur hi eng mah a ti duh lo ang, Chuvangin, zu in pawh hi kan chhungkaw tan a pawi lo a ni ang, i pa hian a in tlat mai, keini pawh hian in ve ila a pawi ka ring lo a, ka lo lei ta mai a ni" ka ti a. Kan pa chu a ngawi vang vang a, a mittui a rawn hnam ta zawih zawih a, "Zu hi kan chhungkaw tan a ṭha lo a ni, kan chhungkua hian tu man kan in tur a ni lo, kei pawhin ka nghei hmiah tawh ang" a ti a, ka zu lei sa chu a leihbaw ta vek a. Tunah chuan zu a in ngai ta reng reng lo a, Kan kohhrana Pavalai pawlah pawh hruaitute zingah a tel tawh nghe nghe a sin, Ka lawm lutuk a, chaw eipui che hi ka chak em a ni, Hei hun remchang a awm hlauh a nih hi. Awi a!.., ka pa pui roh hi, a tih dan thiam chuan a lo patling thei hle mai, keima tih khawloh vek kha a lo ni hi, a ti bawrh bawrh a, Zanriah tuihnai tak mai a lo buatsaih chu ka ei ho ta a.

- Hausanga Hauzel